ប្រែសម្រួល : កញ្ញាដាលីស (ស្ពុតនិក) ៖ ចាប់តាំងពីការបង្ហាញខ្លួនដំបូងរបស់វានៅក្នុងតំបន់ដុនបាសកាំភ្លើងធំបញ្ចេញភ្លើងកម្តៅធន់ធ្ងន់របស់រុស្ស៊ីបានទទួលកេរ្តិ៍ឈ្មោះល្បីយ៉ាងរហ័សសម្រាប់សមត្ថភាពរបស់វាក្នុងការវាយប្រហារបំផ្លិចបំផ្លាញប្រឆាំងនឹងបន្ទាយសត្រូវ យានជំនិះ និងនរណា ដែលស៊យស្ថិតក្នុងតំបន់ភ្នក់ភ្លើងរបស់វា។ តើអាវុធបែបនេះមានប្រភពមកពីណានិងដំណើរការដោយរបៀបណា? វេបសាយ Sputnik សូមពន្យល់ដូចខាងក្រោម។
ប្រព័ន្ធផ្សព្វផ្សាយលោកខាងលិចនិងអ៊ុយក្រែនបានចំណាយពេលជាច្រើនសប្តាហ៍ដើម្បីវិភាគលើប្រព័ន្ធកាំភ្លើងធំបញ្ចេញភ្លើងកម្តៅ TOS-1A Solntsepyok (មានន័យថា ភ្លើងព្រះអាទិត្យក្តៅរលាក ព្រះអាទិត្យក្តៅរលាក ឬ ព្រះអាទិត្យឆេះ) បន្ទាប់ពីមានការបញ្ជាក់ពីយោធារុស្ស៊ីថាអាវុធនេះត្រូវបំពាក់ជាមួយក្បួនយន្តហោះវរជនរបស់រុស្ស៊ី ដែលចូលរួមក្នុងប្រតិបត្តិការយោធាពិសេស។ ប្រព័ន្ធផ្សព្វផ្សាយរបស់អាម៉េរិកអះអាងថា ប្រព័ន្ធអាវុធនេះបានក្លាយជាគោលដៅចម្បងសម្រាប់ដ្រូនរបស់អ៊ុយក្រែនដោយមានអ្នកសង្កេតការណ៍ការពារជាតិម្នាក់ថែមទាំងអះអាងទៀតថាត្រូវតែបំផ្លាញអាវុធនេះឱ្យបានមុន មុនពេលពួកវាមានឱកាសទៅដល់ខ្សែត្រៀមជួរមុខ និងបង្កការបំផ្លិចបំផ្លាញដល់ទាហានអ៊ុយក្រែន។
តើអាវុធកម្តៅជាអ្វី?
មានដើមកំណើតនៅពាក់កណ្តាលទីមួយនៃសតវត្សទី ២០ អាវុធកម្តៅនេះមានការផ្ទុះជាពីរដំណាក់កាល ដែលមានប្រេងឥន្ធនៈរាវដែលអាចឆេះបាន ឬ ប្រេងរំអិលងាយឆេះខ្លាំង។នៅពេលទៅដល់គោលដៅរបស់វា ការផ្ទុះមួយនឹងពង្រាយប្រេងឥន្ធនៈឬសារធាតុរំអិលលើបរិស្ថានជុំវិញ បន្ទាប់មកការផ្ទុះបន្ទាប់បន្សំនឹងស៊ីអុកស៊ីសែនទាំងអស់នៅក្នុងបរិវេណជុំវិញដោយបង្កើតលំហមួយដែលមានកម្តៅរហូតដល់ទៅ ៣.០០០ អង្សាសេ។
សព្វាវុធកម្តៅដ៏ទំនើបនេះមានប្រភពដើមចេញពីសង្គ្រាមលោកលើកទីពីរ នៅពេលដែលវិស្វករអាល្លឺម៉ង់បង្កើតប្រព័ន្ធបំផ្ទុះឧស្ម័នកម្តៅសម្រាប់ប្រព័ន្ធគ្រាប់រ៉ុក្កែត Nebelwerfer 41 ដែលមានបំពង់កាណុង ១៥ សង់ទីម៉ែត្រចំនួន ៦។ អំឡុងពេលបាញ់ ប្រព័ន្ធនេះនឹងចាប់ផ្តើមបំផ្ទុះគ្រាប់កម្តៅឧស្ម័នចំនួនប្រាំគ្រាប់ ដែលតាមពីក្រោយដោយការបាញ់គ្រាប់ធម្មតាទី៦ ដែលនឹងបំផ្ទុះចំហាយឧស្ម័ននិងបណ្តាលឱ្យមានការផ្ទុះដ៏ធំនិងបង្កើនសីតុណ្ហភាពក្តៅកម្រិតខ្ពស់។
ប្រទេសបន្ទាប់ទៀតដែលផលិតអាវុធនេះគឺសហរដ្ឋអាម៉េរិក ទុកប្រើក្នុងសង្គ្រាមវៀតណាម ដែលអាវុធនោះមានឈ្មោះថា Mk 153 SMAW និង AGM-114N Hellfire II។
ហើយបន្ទាប់មកទៀតសហភាពសូវៀតបានចាប់ផ្តើមផលិតអាវុធបែបនេះក្នុងអំឡុងទសវត្សរ៍ ១៩៨០ ដែលមានឈ្មោះថា PRO-A។ អាវុធនេះត្រូវបានប្រើក្នុងសង្គ្រាមអាហ្វហ្គានីស្ថានក្នុងឆ្នាំ១៩៨៨។
ក្រោយមកអាវុធបញ្ចេញកម្តៅ TOS-2 ត្រូវបានផលិតឡើងនៅរុស្ស៊ី និងដាក់ឱ្យប្រើក្នុងឆ្នាំ ២០២១ រហូតដល់បច្ចុប្បន្ន៕
ប្រព័ន្ធកាំភ្លើងធំបញ្ចេញភ្លើងកម្តៅ TOS-1A Solntsepyok របស់រុស្ស៊ី ដែលប្រើក្នុងសមរភូមិដុនបាស
TOS-1A Solntsepyokត្រូវបានបំផ្លាញក្នុងសមរភូមិអ៊ុយក្រែន