ប្រែសម្រួលៈបំណង(ដេល្លីម៉េល)៖ ការប្រយុទ្ធគ្នានៅក្នុងរដ្ឋធានីរបស់ស៊ូដង់បានផ្ទុះឡើងអស់ជាច្រើនម៉ោងកាលពីដើមថ្ងៃអាទិត្យនៅមួយថ្ងៃក្រោយការប្រយុទ្ធផ្តាច់ផ្តិលជីវិតរវាងកងប្រជាការពារនិងកងទ័ពរៀបរយ ដែលបណ្តាលអោយស្លាប់មនុស្សយ៉ាងតិច៥៦នាក់និងជិត៦០០នាក់រងរបួស។
ផ្សែងហុយលើអាគារនៅក្បែរអាកាសយានដ្ឋានក្រុងកាទួមកាលពីថ្ងៃ១៥មេសា ចំពេលមានការប៉ះទង្គិចរវាងកងទ័ពនិងកងជីវពលស៊ូដង់
ក្រោយការផ្ទុះនិងសម្លេងបាញ់កាំភ្លើងបានលាន់ឮពេញដងវិថីនៃទីក្រុងកាទួម(Khartoum) ក្រុមជីវពលមួយបាននិយាយថាពួកគេចូលកាន់កាប់វិមានប្រធានាធិបតី អាកាសយានដ្ឋានក្រុងកាទួមនិងទីតាំងសំខាន់ៗដទៃទៀត។ទោះជាយ៉ាងណា យោធាបានបដិសេធការអះអាងរបស់ក្រុមជីវពល និងកាលពីយប់ថ្ងៃសៅរ៍ កងទ័ពអាកាសស៊ូដង់បានអំពាវនាវអោយប្រជាជននៅក្នុងផ្ទះ នៅពេលខ្លួនបន្តវាយប្រហារតាមផ្លូវអាកាសលើមូលដ្ឋានពួកជីវពលក្នុងក្រុមដែលហៅខ្លួនឯងថា«កងកម្លាំងគាំទ្ររហ័ស(RSF)»។
គណៈកម្មាធិការគ្រូពេទ្យស៊ូដង់បាននិយាយថា ចំនួនស្លាប់សរុបអាច៥៦នាក់ និងថាអ្នកស្លាប់រាប់សិបនាក់ជាសមាជិកកងកម្លាំងសន្តិសុខ តែមិនរាប់បញ្ចូលអ្នកស្លាប់កាលពីព្រឹកថ្ងៃអាទិត្យទេ។ចំនួនអ្នករងរបួសមានប្រមាណ៦០០នាក់ និងថាអ្នកស្លាប់មួយចំនួនមិនត្រូវបានបញ្ជូនទៅកាន់មន្ទីរពេទ្យដោយសារពិបាកដឹកជញ្ជូនក្នុងអំឡុងពេលប៉ះទង្គិចគ្នា។
អំពើហិង្សានេះបានផ្ទុះឡើងក្រោយមានភាពតានតឹងអស់ប៉ុន្មានសប្តាហ៍រវាងមេដឹកនាំយោធា លោកអាប់ដែល ហ្វាតតា អាល់-ប៊ឺហាន(Abdel Fattah al-Burhan)និងអនុប្រធានរបស់លោក ដែលជាមេបញ្ជាការកងជីវពល ឈ្មោះម៉ូហាម៉េដ ហាំដាន ដាកឡូ(Mohamed Hamdan Daglo) អំពីផែនការធ្វើសមាហរណកម្មពួកជីវពលកងកម្លាំងគាំទ្ររហ័សRSFរបស់លោក ដាកឡូជាកងទ័ពរៀបរយ។
ការធ្វើសមាហរណកម្មនេះជាផ្នែកសំខាន់មួយនៃកិច្ចពិភាក្សាដើម្បីសំរេចឡើងកិច្ចព្រមព្រៀងមួយ ដែលនឹងនាំប្រទេសទៅរកការគ្រប់គ្រងដោយស៊ីវិលវិញ ហើយបញ្ចប់វិបត្តិនយោបាយសេដ្ឋកិច្ច ដែលបង្កឡើងដោយរដ្ឋប្រហារយោធាឆ្នាំ២០២១។
ក្នុងពេលជាមួយគ្នា អគ្គលេខាអង្គការសហប្រជាជាតិបានអំពាវនាវអោយមានការឈប់ប្រយុទ្ធគ្នាជាបន្ទាន់ ហើយពិភាក្សារកផ្លូវបន្ថយការប្រឈមមុខគ្នាជាមួយប្រធានាធិបតីអេហ្ស៊ីបនិងប្រធានគណៈកម្មាធិការសហភាពអាហ្វ្រិក។
មេដឹកនាំយោធា លោកអាប់ដែល ហ្វាតតា អាល់-ប៊ឺហាន
មេបញ្ជាការកងកម្លាំងគាំទ្ររហ័សRSFលោក ម៉ូហាម៉េដ ហាំដាន ដាកឡូ
ចំពោះវិបត្តិនេះ អង្គការសម្ពន្ធភាពអារ៉ាប់ តាមសំណើរបស់អេហ្ស៊ីបនិងអារ៉ាប៊ីសាអូឌីត គ្រោងបើកកិច្ចប្រជុំបន្ទាន់មួយនៅថ្ងៃអាទិត្យដើម្បីពិភាក្សាអំពីស្ថានការណ៍នៅស៊ូដង់។
ការអំពាវនាវក៏ចេញពី ប្លុកអាហ្វ្រិកនិងតំបន់អារ៉ាប់ សហភាពអឺរ៉ុប បារាំង តួកគី អ៊ីតាលី រុស្ស៊ីនិងអ៊ីរ៉ង់។
តែក្នុងកិច្ចសម្ភាសន៍មួយជាមួយសារព័ត៌មាន Sky News Arabiaលោក ដាកឡូ បាននិយាយថាលោកអាប់ដែល ហ្វាតតា អាល់-ប៊ឺហាន ជាឧក្រិដ្ឋជន ដែលត្រូវតែប្រគល់ខ្លួន ។លោកបានបដិសេធថាRSFមិនបានចាប់ផ្តើមវាយគេមុនទេ។
ចំណែកកងទ័ពបានប្រកាសថាលោក ដាកឡូ ជាឧក្រិដ្ឋជនដែលត្រូវចាប់ខ្លួន និងថា«RSFជាក្រុមជីវពលឧទ្ទាម»មួយដែលមិនមានអ្វីត្រូវចរចាឬពិភាក្សាជាមួយទៀតទេ៕
ប្រជាជនរត់កាត់រថយន្តយោធាមួយនៅក្រុងកាតួម