ប្រែសម្រួលៈបំណង(ដេល្លីម៉េល)៖ នាវាចម្បាំងអាម៉េរិកUSS Milius បានបើកកាត់ច្រកសមុទ្រតៃវ៉ាន់កាលពីថ្ងៃអាទិត្យ នៅក្នុងអ្វីដែលកងទ័ពជើងទឹកអាម៉េរិកពណ៌នាកាលពីថ្ងៃចន្ទថាជា«ដំណើរឆ្លងកាត់តាមធម្មតា»មួយ តែវាកើតឡើងតែបួនប្រាំថ្ងៃក្រោយចិនបញ្ចប់សមយុទ្ធយោធាឡោមព័ទ្ធកោះតៃវ៉ាន់ ដើម្បីជាការព្រមានរដ្ឋាភិបាលទីក្រុងតៃប៉ិះដែលនៅតែចិញ្ចឹមចិត្តសមគំនិតជាមួយអាម៉េរិកដើម្បីពង្រឹងកម្លាំងផ្តាច់ខ្លួនរបស់ខ្លួន។
ចិន ដែលចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួន បានបញ្ចប់សមយុទ្ធនៅជុំវិញកោះតៃវ៉ាន់ជាផ្លូវការកាលពីយប់ថ្ងៃចន្ទសប្តាហ៍មុន។វាត្រូវបានធ្វើឡើងតាមការព្រមានទុកជាមុន ចំពោះជំនួបរបស់ប្រធានាធិបតីកោះតៃវ៉ាន់ ជាមួយប្រធានសភាអាម៉េរិក ដោយសារតែរដ្ឋាភិបាលទីក្រុងប៉េកាំងយល់ឃើញថាវាជាការជ្រៀតជ្រែកចូលក្នុងកិច្ចការផ្ទៃក្នុងរបស់ចិននិងជាការគាំទ្ររបស់អាម៉េរិកចំពោះអត្តសញ្ញាណផ្តាច់ខ្លួនរបស់តៃវ៉ាន់ចេញពីមហាចិនដីគោក។
កងនាវាទីប្រាំពីរអាម៉េរិក បាននិយាយថា នាវាពិឃាតបំពាក់កាំជ្រួចបញ្ជានាំផ្លូវ USS Miliusបានធ្វើ«ការឆ្លងកាត់ច្រកសមុទ្រតៃវ៉ាន់តាមធម្មតា»កាត់ដែនទឹកដែល«សេរីភាពនាវាចរណ៍ក្នុងលំហសមុទ្រនិងការហោះកាត់ ត្រូវច្បាប់អន្តរជាតិអនុញ្ញាត»។
វាបានបន្ថែមថា ការឆ្លងកាត់របស់នាវានេះបង្ហាញការប្តេជ្ញាចិត្តរបស់អាម៉េរិកចំពោះតំបន់ឥណ្ឌូប៉ាស៊ីហ្វិកមួយ សេរីនិងបើកចំហ។
នាវាចម្បាំងអាម៉េរិកបើកឆ្លងកាត់ច្រកសមុទ្រនេះម្តងក្នុងមួយខែ និងក៏ធ្វើបេសកកម្មស្រដៀងគ្នានៅក្នុងសមុទ្រចិនខាងត្បូងដ៏មានជម្លោះ។
កាលពីសប្តាហ៍មុននាវាUSS Milius បានបើកទៅកៀកកោះគ្រប់គ្រងដោយចិននៅសមុទ្រចិនខាងត្បូង ជាហេតុនាំអោយរដ្ឋាភិបាលទីក្រុងប៉េកាំងថ្កោលទោសភ្លាមៗ។
សូមបញ្ជាក់ថាទោះជាប្រកាសបញ្ចប់សមយុទ្ធយោធាកាលពីថ្ងៃចន្ទសប្តាហ៍មុន ក៏ចិននៅបន្តសកម្មភាពយោធានៅជុំវិញកោះតៃវ៉ាន់ តែបន្ថយទំហំរបស់វា។នៅព្រឹកថ្ងៃចន្ទទី១៧មេសានេះ ក្រសួងយោធាតៃវ៉ាន់បាននិយាយថា ខ្លួនបានសង្កេតឃើញយន្តហោះចិន១៨គ្រឿងនិងនាវាចិនចំនួនបួនគ្រឿងធ្វើសកម្មជុំវញកោះតៃវ៉ាន់នៅរយៈពេល២៤ម៉ោងកន្លងទៅ៕