ប្រែសម្រួលៈបំណង(Beijing Daily)៖មនុស្ស២១នាក់បានស្លាប់ក្នុងអគ្គិភ័យនៅផ្នែកខាងកើតនៃអាគារមន្ទីរពេទ្យមួយក្នុងទីក្រុងប៉េកាំង នេះបើតាមសេចក្តីរាយការណ៍របស់កាសែតBeijing Dailyកាលពីថ្ងៃអង្គារ។
អគ្គិភ័យបានចាប់ផ្តើមនៅម៉ោងប្រមាណ១២និង៥៧នាទីរសៀល និងរលត់វិញនៅជិតមួយម៉ោងក្រោយ បន្ទាប់ពីក្រុមអគ្គិភ័យបានរួសរាន់ទៅកាន់កន្លែងកើតហេតុនៅមន្ទីរពេទ្យឆាងហ្វឹង(Changfeng)ក្នុងក្រុងប៉េកាំង នេះបើតាមសារព័ត៌មានខាងលើ។
កាសែតដដែលបាននិយាយថា មនុស្សសរុប៧១នាក់ត្រូវបានជម្លៀសនិងផ្ទេរទៅកាន់កន្លែងផ្សេងក្រោយការការជួយសង្គ្រោះ។គិតត្រឹមម៉ោង៦ល្ងាច មនុស្ស២១នាក់បានស្លាប់ក្រោយបញ្ជូនទៅព្យាបាល។
ប្រជាជនម្នាក់បានសរសេរបង្ហោះក្នុងបណ្តាញសង្គមថា«វាជាសោកនាដកម្ម។ខ្ញុំឃើញហេតុការណ៍នេះចេញបង្អួចផ្ទះរបស់ខ្ញុំ។មនុស្សជាច្រើនបានចេញពីបន្ទប់មកឈរលើប្រអប់ម៉ាស៊ីនត្រជាក់នៅពេលថ្ងៃត្រង់ និងខ្លះលោតចុះមកក្រោមតាមបង្អួច»។
អគ្គិភ័យនៅតាមមន្ទីរពេទ្យកម្រកើតមានណាស់នៅចិន និងមូលហេតុនៃអគ្គិភ័យនេះកំពុងស្ថិតក្រោមការស៊ើបអង្កេតនៅឡើយ៕
មន្ទីរពេទ្យឆាងហ្វឹងក្នុងក្រុងប៉េកាំង កើតមានអគ្គិភ័យកាលពីថ្ងៃអង្គារ ដោយសម្លាប់មនុស្ស២១នាក់
មនុស្សជាច្រើនចេញមកឈរលើធុងម៉ាស៊ីនត្រជាក់ពេលភ្លើងឆាបឆេះក្នុងបន្ទប់ពេទ្យ និងខ្លះលោតចុះមកក្រោម