ដោយៈសុផល/ភ្នំពេញ៖ ក្លិបអ្នកកាសែតកម្ពុជា (ក.អ.ក) នឹងរៀបចំការជួបជុំសមាជិកជាង៥០០នាក់ជាថ្មីម្ដងទៀត ដើម្បីផ្សព្វផ្សាយក្រមសីលធម៌នៃវិជ្ជាជីវៈសារព័ត៌មានរបស់ខ្លួន។ការផ្ដួចផ្ដើមគំនិតក្នុងការជួបប្រជុំអ្នកសារព័ត៌មាននាពេលនេះ ត្រូវបានធ្វើឡើងនៅក្នុងបរិបទនៃការអបអរទិវាសេរីភាពសារព័ត៌មានពិភពលោក៣ឧសភាផងដែរ។
ការជួបជុំនេះនឹងប្រព្រឹត្តិទៅនៅវិទ្យាស្ថានជាតិអប់រំនារសៀលថ្ងៃសុក្រទី២១ខែមេសាក្នុងសប្តាហ៍នេះ។
យោងតាមសេចក្តីប្រកាសព័ត៌មានរបស់ក.អ.ក នៅថ្ងៃទី ១៩ខែមេសាឆ្នាំ២០២៣បានឱ្យដឹងថាវេទិកានេះត្រូវបានចែក ចេញជាបីវគ្គ។ ក្នុងនោះវគ្គទី១៖ ចាប់ផ្ដើមពីម៉ោង២រសៀល ដល់ម៉ោង៥ល្ងាច គឺជាវគ្គពិភាក្សា សួរដេញដោល និងចែករំលែកពិសោធន៍ព្រមទាំងចំណេះដឹងស្ដីពីការអនុវត្តវិជ្ជាជីវៈ និងក្រមសីលធម៌សារព័ត៌មាន។ នៅក្នុងវគ្គនេះ លោក ពុយ គា ដែលជាប្រធានក្លិបអ្នកកាសែតកម្ពុជានឹងធ្វើបទបង្ហាញអត្ថបទក្រមសីលធម៌របស់ក្លិបអ្នកកាសែត
ដល់សមាជិកទាំងអស់។ ក្នុងពេលនោះដែរ ក៏មានវត្តមានអ្នកកាសែតជើងចាស់ ដែលពិសោធន៍យូរឆ្នាំរបស់កម្ពុជា និងបរទេស (អូស្រាលី បារាំង អាល្លឺម៉ង់ និងថៃ) ១០រូប រង់ចាំឆ្លើយសំណួរ និងចែករំលែកពិសោធន៍របស់ពួកគេផងដែរ។
វគ្គទី២ ចាប់ពីម៉ោង៥ ដល់ម៉ោង ៦ល្ងាច គឺជាវេទិកាសំណេះសំណាលរបស់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ជាមួយសមាជិកក្លិបអ្នកកាសែតកម្ពុជានិង វគ្គទី៣ ជាពិធីបរិភោគអាហារសាមគ្គី ដែលភ្ជាប់មកជាមួយនឹងការចាប់រង្វាន់ជាច្រើនដែលឧបត្ថម្ភដោយវិស័យឯកជន និងសប្បុរសជនដែលគាំទ្រ និងលើកស្ទួយវិស័យសារព័ត៌មានកម្ពុជា។
លោក ពុយ គា ប្រធានក្លិបអ្នកកាសែតកម្ពុជា មានប្រសាសន៍ថា៖«នេះជាវេទិកាដ៏ធំមួយនៅក្នុងប្រវត្តិនៃវិស័យសារព័ត៌មានដែលបើកឱ្យមានការពិភាក្សាវែកញែកអំពីក្រមសីលធម៌នៃវិជ្ជាជីវៈសារព័ត៌មានដែលជាប្រធានបទដ៏ក្តៅនៅក្នុងយុគសម័យឌីជីថល»។
លោកបានបន្ថែមថា៖«ខ្ញុំមានជំនឿជឿជាក់ថា វេទិកានេះនឹងជួយពង្រឹងសមត្ថភាពអ្នកសារព័ត៌មានឱ្យកាន់តែប្រសើរ ជាពិសេស ក្រមសីលធម៌ និងវិជ្ជាជីវៈនេះតែម្តងដែលជាខែលការពារអ្នកព័ត៌មានពីការរិះគន់ និងប្តឹងផ្តល់…»។
គួរកត់សម្គាល់ថា វិស័យសារព័ត៌មាននៅកម្ពុជាត្រូវបានយកចិត្តទុកដាក់ពីសំណាក់មហាជនទូទៅ និងពីវិស័យឯកជនជាច្រើនផងដែរ។ ហេតុដូច្នេះហើយបានជាការជួបជុំអ្នកសារព័ត៌មាននៅក្នុងក្របខណ្ឌក្លិបអ្នកកាសែតកម្ពុជា ទទួលបានការគាំទ្រជាស្មារតី និងសម្ភារផង ពីវិស័យឯកជនក្នុងស្រុក និងបរទេស ដែលធ្លាប់ជាដៃគូរបស់ក្លិបអ្នកកាសែតកម្ពុជា៕សរន / N
