ប្រែសម្រួល : កញ្ញាដាលីស (ដេល្លីម៉េល) ៖ក្នុងដំណើរទស្សនកិច្ចលើកដំបូងរបស់លោកទៅកាន់ទីក្រុងគៀវចាប់តាំងពីការឈ្លានពានរបស់រុស្ស៊ីកាលពីជាងមួយឆ្នាំមុន ប្រធានអង្គការណាតូ លោក ជែន ស្តូលធិនបឺក (Jens Stoltenberg)បានប្រកាសកាលពីថ្ងៃព្រហស្បតិ៍ទី២០មេសាថា “ទីកន្លែងត្រឹមត្រូវ”របស់អ៊ុយក្រែនគឺស្ថិតក្នុងសម្ពន្ធភាពយោធាមួយនេះហើយបានសន្យាគាំទ្របន្ថែមទៀតសម្រាប់ប្រទេសនេះ ។
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បានជំរុញឱ្យលោកស្តូលធិនបឺក ដែលជាអ្នកដើរតួយ៉ាងសំខាន់ក្នុងការជំរុញការគាំទ្រពីសមាជិកណាតូអំពាវនាវអោយមានការគាំទ្រកាន់តែច្រើនថែមទៀតពីពួកគេ រួមទាំងយន្តហោះចម្បាំង កាំភ្លើងធំ និងរថពាសដែក។
វិមានក្រឹមឡាំងបានផ្តល់ហេតុផលជាច្រើនសម្រាប់ការធ្វើសង្គ្រាមប៉ុន្តែបាននិយាយម្តងទៀតកាលពីថ្ងៃព្រហស្បតិ៍ថាការរារាំងអ៊ុយក្រែនពីការចូលរួមក្នុងអង្គការណាតូនៅតែជាគោលដៅសំខាន់នៃការលុកលុយរបស់ខ្លួន ដោយលើកហេតុផលថា សមាជិកភាពរបស់រដ្ឋាភិបាលក្រុងគៀវក្នុងសម្ពន្ធភាពយោធានេះនឹងបង្កការគំរាមកំហែងដល់រុស្ស៊ី។
ក្រុមមេដឹកនាំរបស់ណាតូបាននិយាយក្នុងឆ្នាំ ២០០៨ ថា អ៊ុយក្រែននឹងចូលរួមសម្ពន្ធភាពនេះនៅថ្ងៃណាមួយ ហើយលោកស្តូលធិនបឺកបានសន្យាម្តងទៀតពេញមួយសង្គ្រាមនេះទោះបីជាអង្គការនេះមិនបានបង្កើតផ្លូវ ឬកាលវិភាគសម្រាប់សមាជិកភាពក៏ដោយ។
លោកស្តូលធិនបឺកបានប្រាប់សន្និសីទសារព័ត៌មានមួយថា “ខ្ញុំសូមបញ្ជាក់ឱ្យបានច្បាស់ថា ទីកន្លែងត្រឹមត្រូវរបស់អ៊ុយក្រែនគឺនៅក្នុងគ្រួសារយូរ៉ូអាត្លង់ទិក (Euro-Atlantic)។ ទីកន្លែងត្រឹមត្រូវរបស់អ៊ុយក្រែនគឺនៅក្នុងអង្គការណាតូ”។
លោកហ្សេលេនស្គីបាននិយាយថា លោកមានអំណរគុណចំពោះការអញ្ជើញមកកាន់កិច្ចប្រជុំកំពូលរបស់អង្គការណាតូកាលពីខែកក្កដានៅទីក្រុងវីលនៀស (Vilnius) ប្រទេសលីទុយអានីប៉ុន្តែបាននិយាយថា ប្រទេសរបស់លោកត្រូវការផែនទីបង្ហាញផ្លូវសម្រាប់ការក្លាយជាសមាជិក។
លោកបាននិយាយថា “ពេលវេលាបានមកដល់សម្រាប់ក្រុមមេដឹកនាំ (សម្ពន្ធមិត្ត) ដើម្បីកំណត់ការរំពឹងទុកនៃការទទួលសមាជិកភាពណាតូរបស់អ៊ុយក្រែន ដើម្បីកំណត់រូបមន្តនៃចលនារបស់អ៊ុយក្រែនឆ្ពោះទៅរកគោលដៅនេះ និងដើម្បីកំណត់ការធានាសន្តិសុខសម្រាប់រដ្ឋរបស់យើងសម្រាប់អំឡុងរយៈពេលនៃចលនាបែបនេះ ពោលគឺសម្រាប់អំឡុងរយៈពេលមុនពេលក្លាយជាសមាជិកភាពណាតូ”។
លោកស្តូលធិនបឺកបាននិយាយថា គាត់និងលោកហ្សេលេនស្គីបានពិភាក្សាអំពីកម្មវិធីគាំទ្ររបស់ណាតូសម្រាប់អ៊ុយក្រែន។
លោកស្តូលធិនបឺកបាននិយាយថា “នេះនឹងជួយអ្នកឱ្យផ្លាស់ប្តូរពីឧបករណ៍និងគោលលទ្ធិនៃសម័យសូវៀតទៅរកស្តង់ដារណាតូ និងធានាឱ្យមានអន្តរប្រតិបត្តិការពេញលេញជាមួយសម្ពន្ធមិត្ត។ ណាតូឈរនៅជាមួយអ្នកនៅថ្ងៃនេះ ថ្ងៃស្អែក និងជាដរាប”។
លោកបានកត់សម្គាល់ការប្រកាសកាលពីថ្ងៃព្រហស្បតិ៍ដោយប្រទេសដាណឺម៉ាកនិងហូឡង់ថា ពួកគេមានគម្រោងផ្តល់ឱ្យអ៊ុយក្រែននូវរថក្រោះប្រយុទ្ធ Leopard 2 ដែលត្រូវបានកែលម្អឡើងវិញយ៉ាងហោចណាស់ចំនួន ១៤ គ្រឿងទៀតនៅដើមឆ្នាំ ២០២៤៕
លោកស្តូលធិនបឺកជួបលោកហ្សេលេនស្គីក្នុងទីក្រុងគៀវកាលពីថ្ងៃព្រហស្បតិ៍