ប្រែសម្រួលៈបំណង(ស្ត្រេតថែមស៍)៖ អគ្គលេខាអង្គការសហប្រជាជាតិលោក ជេនស៍ ស្តូលថិនប៊ឺក បាននិយាយកាលពីថ្ងៃសុក្រថា លោកមានជំនឿថា អ៊ុយក្រែនអាចវាយដណ្តើមបានទឹកដីដែលបាត់បង់មកវិញនៅក្នុងការវាយបកដែលគេទន្ទឹងរង់ចាំយូរមកហើយ នៅពេលសម្ពន្ធមិត្តរបស់អ៊ុយក្រែនប្តេជ្ញាគាំទ្រឥតងាករេសំរាប់រដ្ឋាភិបាលទីក្រុងគៀវនៅជំនួបសំខាន់មួយដែលរៀបចំដោយអាម៉េរិក។
តំណាងមកពីប្រមាណ៥០ប្រទេសកាលពីថ្ងៃសុក្របានជួបជុំគ្នានៅអាល្លឺម៉ង់ដើម្បីពិនិត្យមើលសមត្ថភាព ប្រព័ន្ធនិងការផ្គត់ផ្គង់ផ្សេងៗគ្នាទាំងអស់ដែលអ៊ុយក្រែនត្រូវការដើម្បីវាយបកលើកងកម្លាំងរុស្ស៊ីដណ្តើមទឹកដីមកវិញ។
លោកស្តូលថិនប៊ឺក បានប្រាប់អ្នកកាសែតនៅកិច្ចប្រជុំរបស់សម្ពន្ធមិត្តណាតូនៅអាល្លឺម៉ង់ថា «ខ្ញុំមានជំនឿចិត្តថា ពួកគេឥឡូវស្ថិតក្នុងទីតាំងមួយដែលអាចរំដោះទឹកដីបន្ថែមទៀត»។លោកបានឆ្លើយតបទៅនឹងសំណួរអំពីថាតើអ៊ុយក្រែនមានអ្វីដែលខ្លួនត្រូវការដើម្បីធ្វើការវាយប្រហារដោយជោគជ័យហើយឬនៅ។
អគ្គលេខាអង្គការណាតូលោក ជេនស៍ ស្តូលថិនប៊ឺក និយាយទៅកាន់អ្នកកាសែតនៅកិច្ចប្រជុំរបស់អង្គការណាតូនៅអាល្លឺម៉ង់ កាលពីថ្ងៃសុក្រ
លោកស្តូលថិនប៊ឺកបានចូលរួមកិច្ចពិភាក្សានៅមូលដ្ឋានទ័ពអាកាស រ៉ាមស្តាញ(Ramstein)ក្រោយធ្វើដំណើរកាលពីថ្ងៃព្រហស្បតិ៍ទៅកាន់ទីក្រុងគៀវ។
នៅក្នុងរដ្ឋធានីរបស់អ៊ុយក្រែន លោកបានជួបប្រធានាធិបតី វ៉ូឡូឌីមៀ ហ្សេឡេនស្គី ដែលបានទទូចសុំអោយសម្ពន្ធមិត្តលោកខាងលិចបញ្ជូនយន្តហោះចម្បាំងបន្ថែមនិងកាំជ្រួចចម្ងាយឆ្ងាយដើម្បីជួយបណ្តេញទាហានរុស្ស៊ី។
លោកស្តូលថិនប៊ឺក ទទួលស្គាល់ថាវាត្រូវការការពិភាក្សាគ្នាសំរាប់ការគាំទ្រថ្មីនៅពេលសង្គ្រាមឈានចូលឆ្នាំទីពីរ តែក៏បញ្ជាក់ថា សព្វាវុធដែលបានផ្តល់អោយហើយនៅបន្តដំណើរការ។
រដ្ឋមន្ត្រីការពារជាតិអាម៉េរិកលោក ឡយ អូស្ទីន ដែលទទួលរៀបចំកិច្ចពិភាក្សានៅរ៉ាមស្តាញ ក៏បាននិយាយថា បញ្ហាសំខាន់បីត្រូវលើកមកពិភាក្សា គឺ«ការការពារដែនអាកាស គ្រាប់រំសេវនិងគ្រឿងជំរុញអោយដំណើរការទៅបាន» ដោយលោកចង់សំដៅគ្រឿងភស្តុភានិងការគាំទ្រដទៃទៀត។លោកថា «ការគាំទ្ររបស់យើងសំរាប់កងកម្លាំងសេរីភាពនៅអ៊ុយក្រែននៅរឹងមាំនិងជាក់ស្តែង។យើងនឹងបន្តគាំទ្រអ៊ុយក្រែនដរាបណាប្រទេសនេះនៅត្រូវការ»។
រដ្ឋាភិបាលទីក្រុងមូស្គូបានប្រតិកម្មទាំងកំហឹងចំពោះកិច្ចប្រជុំនៅរ៉ាមស្តាញដោយក្រសួងការបរទេសរុស្ស៊ីបាននិយាយថាអំពើរបស់សម្ពន្ធមិត្តនេះសំរាប់អ៊ុយក្រែន«បញ្ជាក់ពីការចូលពាក់ព័ន្ធរបស់គេក្នុងជម្លោះនេះនិងចូលរួមក្នុងការរៀបចំប្រតិបត្តិការយោធា»។
អ្នកនាំពាក្យវិមានក្រឹមឡាំងលោក ឌីមីទ្រី ប៉េស្កូវ ក៏បានចោទប្រកាន់អង្គការណាតូថា ព្យាយាម«ទាញអ៊ុយក្រែនទៅក្នុងសម្ពន្ធភាពរបស់ខ្លួន» និងបង្ហាញថារុស្ស៊ីត្រឹមត្រូវក្នុងការបើកប្រតិបត្តិការសឹកកន្លងមកដើម្បីធានាសន្តិសុខរបស់ខ្លួន៕