ប្រែសម្រួល : កញ្ញាដាលីស (ខៅសូដ) ៖ “រថភ្លើងផ្លែឈើ” ដែលដឹកទុរេននិងមង្ឃុតចំនួន ២៣ កុងតឺន័រ បានទៅដល់ទីក្រុងគុនមីងនៃខេត្តយូនណាន ភាគនិរតីនៃប្រទេសចិនកាលពីថ្ងៃពុធទី១៩មេសា ខណៈអ្នកនាំចេញរបស់ថៃច្រើនឡើងងាកទៅរកផ្លូវដែកចិន-ឡាវ ដើម្បីចូលទៅកាន់ទីផ្សារចិនឱ្យបានរហ័ស។
រថភ្លើងនេះបានចាកចេញពីឡែមឆាបាង (Laem Chabang) ជាកំពង់ផែដ៏សំខាន់របស់ថៃ ហើយត្រូវបើកឆ្លងកាត់ផ្លូវដែកចិន-ឡាវ។
លោកស្រី អូរ៉ាតថៃ យូអាត្រាគុល (Orathai Euatrakool) អាយុ ៦៧ ឆ្នាំ ជាអតីតអ្នកជំនាញនាំចេញនាំចូលរុក្ខជាតិនៃក្រសួងកសិកម្មនិងសហករណ៍របស់ថៃ បានសង្កេតឃើញកំណើននៃការនាំចេញទុរេនថៃក្នុងរយៈពេលប៉ុន្មានឆ្នាំកន្លងមកនេះ។
លោកស្រីអូរ៉ាតថៃបានប្រាប់ទីភ្នាក់ងារសារព័ត៌មានស៊ីនហួថា “ពីមុនមក ទុរេនមួយចំនួនធំត្រូវបានដឹកជញ្ជូនទៅកាន់ប្រទេសចិនតាមផ្លូវគោកនិងផ្លូវសមុទ្រ ប៉ុន្តែផ្លូវទាំងនេះគឺមិនអាចទាយទុកជាមុនបានទេ ដោយសារតែកត្តានានាដូចជាអាកាសធាតុមិនល្អ ដែលជួនកាលត្រូវចំណាយពេលលើសពី ២០ ថ្ងៃទើបទៅដល់”។
បច្ចុប្បន្ននេះ ទំនិញអាចទៅដល់ទីក្រុងគុនមីងក្នុងរយៈពេលតែបីថ្ងៃប៉ុណ្ណោះ បន្ទាប់ពីត្រូវបានដឹកតាមផ្លូវដែកចិន-ឡាវពីប្រទេសថៃ ជាកន្លែងដែលទុរេនទុំច្រើនទៀតត្រៀមនាំចេញ។ ទុរេនកាន់តែចាស់ រសជាតិកាន់តែឆ្ងាញ់៕
ទុរេនថៃឥឡូវចំណាយពេលតែបីថ្ងៃដឹកដល់ចិន មិនមែនជាង២០ថ្ងៃដូចពីមុនទៀតទេ