ប្រែសម្រួលៈបំណង(ស្ត្រេតថែមស៍)៖ ក្រសួងការបរទេសចិនកាលពីថ្ងៃអាទិត្យទី២៣មេសាបាននិយាយថាអនុរដ្ឋមន្ត្រីការបរទេសចិន លោកសាន់ វ៉េដុង(Sun Weidong)បានធ្វើការប្រឆាំងតវ៉ាទៅឯកអគ្គរដ្ឋទូតកូរ៉េខាងត្បូងចំពោះ«ពាក្យសម្តីខុសឆ្គង»របស់ប្រធានាធិបតីកូរ៉េខាងត្បូងស្តីពីតៃវ៉ាន់។
ក្នុងកិច្ចសម្ភាសន៍មួយជាមួយទីភ្នាក់ងារសារព័ត៌មានរ៉យទ័រ ប្រធានាធិបតី យូន ស៊ុកយ៉ូល បាននិយាយថា កំណើនភាពតានតឹងជុំវិញកោះតៃវ៉ាន់បណ្តាលមកពីការប៉ុនប៉ងកែប្រែស្ថានភាពជាក់ស្តែងដោយប្រើកម្លាំង ហើយលោកប្រឆាំងចំពោះការផ្លាស់ប្តូរដូច្នេះ។
លោកយូនបាននិយាយថា« បញ្ហាតៃវ៉ាន់ធម្មតាមិនជាបញ្ហាមួយរវាងចិននិងតៃវ៉ាន់ទេ តែដូចកូរ៉េខាងជើងដែរ វាជាបញ្ហាសកលមួយ»។
តែក្រសួងការបរទេសចិនបាននិយាយថា សម្តីរបស់យូន«មិនអាចទទួលយកបានទាំងស្រុង»។លោកសាន់បាននិយាយថា«មេដឹកនាំកូរ៉េខាងត្បូងមិនបាននិយាយអំពីគោលការណ៍ចិនមួយ តែបែរជាប្រៀបធៀបបញ្ហាតៃវ៉ាន់ទៅនឹងបញ្ហាឧបទ្វីបកូរ៉េ។កូរ៉េខាងជើងនិងខាងត្បូងជារដ្ឋមានអធិបតេយ្យ ដែលចូលរួមក្នុងអង្គការសហប្រជាជាតិ។បញ្ហាឧបទ្វីបកូរ៉េនិងតៃវ៉ាន់ខុសគ្នាដាច់..មិនអាចប្រៀបធៀបគ្នាបានឡើយ»។
ការតវ៉ារបស់លោកសាន់កើតឡើងក្រោយពីសប្តាហ៍មុន ក្រសួងការបរទេសចិនបានរិះគន់កូរ៉េខាងត្បូងនិងណែនាំថារដ្ឋាភិបាលទីក្រុងសេអ៊ូលគួរដោះស្រាយបញ្ហាពាក់ព័ន្ធតៃវ៉ាន់ដោយប្រយ័ត្នប្រយែង។
កូរ៉េខាងត្បូងបានតបវិញដោយកោះហៅឯកអគ្គរដ្ឋទូតចិនមកស្តាប់ការតវ៉ាប្រឆាំងចំពោះការលើកឡើងរបស់រដ្ឋាភិបាលទីក្រុងប៉េកាំង៕
ប្រធានាធិបតីកូរ៉េខាងត្បូង យូន ស៊ុកយ៉ូល បង្កភាពតានតឹងដោយសារតែបញ្ហាតៃវ៉ាន់