ប្រែសម្រួល : កញ្ញាដាលីស (ស្ត្រេតថែមស៍) ៖ អតីតប្រធានាធិបតីរុស្ស៊ី លោក ឌីមីទ្រី ម៉េតវេដេវ (Dmitry Medvedev) បាននិយាយកាលពីថ្ងៃអាទិត្យទី២៣មេសាថា ប្រសិនបើក្រុមប្រទេស G-7 ធ្វើចំណាត់ការហាមឃាត់ការនាំចេញទៅកាន់ប្រទេសរុស្ស៊ី នោះរដ្ឋាភិបាលក្រុងមូស្គូនឹងឆ្លើយតបវិញ ដោយបញ្ចប់កិច្ចព្រមព្រៀងគ្រាប់ធញ្ញជាតិនៅសមុទ្រខ្មៅដែលអនុញ្ញាតឱ្យមានការនាំចេញគ្រាប់ធញ្ញជាតិសំខាន់ៗពីអ៊ុយក្រែន។
ទីភ្នាក់ងារសារព័ត៌មានក្យូដូរបស់ជប៉ុនបានរាយការណ៍កាលពីសប្តាហ៍មុនដោយស្រង់ប្រភពរដ្ឋាភិបាលជប៉ុនថា ប្រទេស G-7កំពុងពិចារណាលើការហាមឃាត់ស្ទើរតែទាំងស្រុងលើការនាំចេញទៅកាន់ប្រទេសរុស្ស៊ី។
គំនិតផ្តួចផ្តើមគ្រាប់ធញ្ញជាតិសមុទ្រខ្មៅត្រូវបានឈានដល់ការសម្របសម្រួលរបស់អង្គការសហប្រជាជាតិនិងតួកគីកាលពីខែកក្កដាឆ្នាំមុន។វាបានបើកកំពង់ផែសមុទ្រខ្មៅរបស់អ៊ុយក្រែនចំនួនបី បន្ទាប់ពីការលុកលុយរបស់រុស្ស៊ីអស់រយៈពេលប្រាំខែ។
កិច្ចព្រមព្រៀងនេះត្រូវបានបង្កើតឡើងដើម្បីកាត់បន្ថយវិបត្តិស្បៀងអាហារពិភពលោក និងដើម្បីជួយគាំទ្រដល់អ៊ុយក្រែន ដែលសេដ្ឋកិច្ចរបស់ខ្លួនពឹងផ្អែកខ្លាំងលើការនាំចេញកសិផល។
រុស្ស៊ីបានគំរាមម្តងហើយម្តងទៀតថានឹងលុបចោលការចូលរួមរបស់ខ្លួននៅក្នុងកិច្ចព្រមព្រៀងគ្រាប់ធញ្ញជាតិដែលនឹងត្រូវផុតកំណត់នៅថ្ងៃទី ១៨ ខែឧសភា។
លោកម៉េតវេដេវបាននិយាយនៅក្នុងសារបង្ហោះនៅលើបណ្តាញ Telegram របស់គាត់ថា “គំនិតចេញពីពួកមនុស្សឆ្កួតនៅ G-7អំពីការហាមឃាត់ការនាំចេញទាំងស្រុងមកកាន់ប្រទេសរបស់យើងតាមលំនាំដើមរបស់ពួកគេគឺមានភាពស្រស់ស្អាត ដល់ថ្នាក់វាបង្កប់ន័យការហាមឃាត់សងសឹកមកលើការនាំចូលពីប្រទេសរបស់យើង រួមទាំងប្រភេទទំនិញដែលមានលក្ខណៈរសើបបំផុតសម្រាប់ G7″។
លោកបានបន្ថែមថា “ក្នុងករណីបែបនេះ កិច្ចព្រមព្រៀងគ្រាប់ធញ្ញជាតិនិងអ្វីៗជាច្រើនទៀតដែលពួកគេត្រូវការនឹងបញ្ចប់សម្រាប់ពួកគេ”។
G-7កំពុងពិភាក្សាអំពីការផ្លាស់ប្តូរវិធីសាស្ត្រដាក់ទណ្ឌកម្មរបស់ខ្លួន ដូច្នេះការនាំចេញទៅកាន់ប្រទេសរុស្ស៊ីនឹងត្រូវបានហាមឃាត់ដោយស្វ័យប្រវត្តិ លុះត្រាតែពួកវាត្រូវបានបញ្ចូលក្នុងបញ្ជីផលិតផលដែលបានកំណត់ជាមុន ដែលអនុញ្ញាតឱ្យដឹកជញ្ជូនទៅកាន់ប្រទេសនេះ។
ក្រោមក្របខណ្ឌបច្ចុប្បន្ន ទំនិញត្រូវបានអនុញ្ញាតឱ្យលក់ទៅរុស្ស៊ី លុះត្រាតែពួកវាត្រូវបានដាក់ក្នុងបញ្ជីខ្មៅ៕
កិច្ចព្រមព្រៀងនេះត្រូវបានបង្កើតឡើងដើម្បីកាត់បន្ថយវិបត្តិស្បៀងអាហារពិភពលោក និងដើម្បីជួយគាំទ្រដល់អ៊ុយក្រែន