ប្រែសម្រួល : កញ្ញាដាលីស (ប៊ីប៊ីស៊ី) ៖ ប៉ូលីសកេនយ៉ាបានគាស់សាកសពចំនួន ៤៧ នាក់ចេញពីផ្នូរនៅជិតទីក្រុងមាត់សមុទ្រ ម៉ាលីនឌី (Malindi) ខណៈពួកគេកំពុងស៊ើបអង្កេតអាចារ្យម្នាក់ ដែលគេនិយាយថាបានប្រាប់ឱ្យសាវ័ករបស់គាត់បង្អត់អាហារដល់ស្លាប់ដើម្បីបានជួបព្រះយ៉េស៊ូ។
សាកសពកុមារបានស្ថិតក្នុងចំណោមអ្នកស្លាប់ទាំងនោះ។ ប៉ូលីសបាននិយាយថា ការគាស់សពចេញពីផ្នូរកំពុងបន្ត។
ផ្នូររាក់ៗគឺស្ថិតនៅក្នុងព្រៃសាកាហូឡា (Shakahola) ជាកន្លែងដែលសមាជិក១៥ នាក់នៃព្រះវិហារគ្រិស្តឈ្មោះថា Good News International ត្រូវបានជួយសង្គ្រោះកាលពីសប្តាហ៍មុន។
មេដឹកនាំព្រះវិហារនេះ លោក ផូល ម៉ាកេនហ្ស៊ី អិនថេង (Paul Makenzie Nthenge) កំពុងជាប់ឃុំ ដោយរង់ចាំការបង្ហាញខ្លួននៅតុលាការ។
ទូរទស្សន៍រដ្ឋ KBC បានពណ៌នាគាត់ថាជា “មេដឹកនាំសាសនា” ហើយបានរាយការណ៍ថារហូតមកដល់ពេលនេះ ផ្នូរចំនួន ៥៨ ត្រូវបានកំណត់។
ផ្នូរមួយក្នុងចំណោមនោះត្រូវគេជឿថាមានសាកសពសមាជិក ៥ នាក់នៃគ្រួសារតែមួយ គឺ កូនបីនាក់និងឪពុកម្តាយរបស់ពួកគេ។
លោកអាចារ្យអិនថេងបានបដិសេធថាមិនបានប្រព្រឹត្តខុស ប៉ុន្តែត្រូវបានបដិសេធមិនឱ្យនៅក្រៅឃុំទេ។ លោកទទូចថាលោកបានបិទព្រះវិហារក្នុងឆ្នាំ ២០១៩។
តាមការចោទប្រកាន់ លោកបានប្រាប់សាវ័ករបស់គាត់ឱ្យបង្អត់អាហារដើម្បី “ជួបព្រះយេស៊ូ”។
កាសែតប្រចាំថ្ងៃរបស់កេនយ៉ា The Standard បាននិយាយថា គ្រូពេទ្យនឹងយកសំណាក DNAនិងធ្វើតេស្ដិ៍ដើម្បីកំណត់ថាតើជនរងគ្រោះស្លាប់ដោយសារបង្អត់អាហារឬយ៉ាងណា។
ប៉ូលីសបានចាប់ខ្លួនលោកអិនថេងកាលពីថ្ងៃទី ១៥ ខែមេសា បន្ទាប់ពីបានរកឃើញសាកសពមនុស្សបួននាក់ ដែលសង្ស័យថាបានបង្អត់អាហារខ្លួនឯងរហូតដល់ស្លាប់។
លោក វីកទ័រ គូដូ (Victor Kaudo)មកពីមជ្ឈមណ្ឌលយុត្តិធម៌សង្គមក្រុងម៉ាល់លីនឌី បានប្រាប់ទូរទស្សន៍ Citizen TV ថា “នៅពេលយើងនៅក្នុងព្រៃនេះហើយមកដល់តំបន់ដែលយើងឃើញឈើឆ្កាងដ៏ធំនិងខ្ពស់មួយ យើងបានដឹងថាមានមនុស្សច្រើនជាងប្រាំនាក់ត្រូវបានកប់នៅទីនោះ”។
រដ្ឋមន្ត្រីក្រសួងមហាផ្ទៃកេនយ៉ា លោក គីធួរ៉េ គីនឌីគី (Kithure Kindiki) បាននិយាយថា ព្រៃទំហំ ៨០០ អារ (៣២៣ ហិកតា) ត្រូវបានហ៊ុមព័ទ្ធ និងប្រកាសជាទីតាំងឧក្រិដ្ឋកម្ម។
កេនយ៉ាគឺជាប្រទេសជឿសាសនាងប់ងល់មួយ ហើយពីមុនៗមកធ្លាប់មានករណីមនុស្សត្រូវបានបញ្ឆោតឱ្យចូលព្រះវិហារឬសាសនាដែលមានគ្រោះថ្នាក់និងគ្មានច្បាប់៕
ប៉ូលីសកំពុងបន្តកាយផ្នូរជាច្រើនដើម្បីរកសាកសពបន្ថែមទៀតក្នុងព្រៃសាកាហូឡា