ប្រែសម្រួល : កញ្ញាដាលីស (ដេល្លីម៉េល) ៖ ក្រុមតោខៀវ Chelsea កំពុងពិចារណាលើការផ្ទេរកីឡាករនីម៉ា (Neymar)ប្រសិនបើក្លិប Paris St Germain ជ្រើសរើសលក់ខ្សែប្រយុទ្ធវ័យ ៣១ ឆ្នាំរូបនេះក្នុងរដូវក្តៅនេះ នេះបើយោងតាមកាសែត Daily Mirror ។ យ៉ាងហោចណាស់មានក្លិប Premier Leagueមួយផ្សេងទៀតត្រូវគេនិយាយថាបានស្ថិតក្នុងចំណោមអ្នកដែលចាប់អារម្មណ៍លើកីឡាករប្រេស៊ីលរូបនេះ។
កីឡាករ លីអូនែល ម៉េសស៊ី គឺជាខ្សែប្រយុទ្ធម្នាក់ទៀតដែលមានលទ្ធភាពចាកចេញពី PSG ដោយកាសែត Daily Mail រាយការណ៍ថា ខ្សែប្រយុទ្ធវ័យ ៣៥ ឆ្នាំរូបនេះចង់ត្រឡប់ទៅ Barcelona វិញ។ កាសែតនេះអះអាងថា ក្លិបយក្សអេស្ប៉ាញនេះនឹងត្រូវរៃអង្គាសប្រាក់ឱ្យបានចំនួន ៨៨ លានផោន និងបង្កើន “កម្រិតសេដ្ឋកិច្ចក្លិប” ដើម្បីអាចនាំយកប្រធានក្រុមអាហ្សង់ទីនរូបនេះត្រឡប់ទៅកីឡដ្ឋាន Nou Camp វិញ។
ចំណែកខ្សែការពារ អារ៉ុន ហ៊ីកគី (Aaron Hickey) វ័យ ២០ ឆ្នាំរបស់ Brentford បានក្លាយជាគោលដៅរបស់ Manchester City នេះបើយោងតាមការចុះផ្សាយរបស់កាសែត The Sun។ ខ្សែការពារសញ្ជាតិស្កុតឡែនរូបនេះត្រូវបានរាយការណ៍ថាមានតម្លៃខ្លួនប្រហែល ៣០ លានផោន។
អតីតខ្សែប្រយុទ្ធ Liverpool និងអង់គ្លេស រ៉ប់ប៊ី ហ្វូល័រ (Robbie Fowler) កំពុងត្រូវបានផ្សារភ្ជាប់ទៅនឹងតួនាទីអ្នកចាត់ការនៅក្នុងក្លិបមួយរបស់អង់គ្លេស។ កាសែត The Sun រាយការណ៍ថា អតីតកីឡាករវ័យ ៤៨ ឆ្នាំរូបនេះកំពុងពិចារណាដាក់ពាក្យសុំការងារនៅក្លិប Tranmere Rovers ក្នុងក្របខណ្ឌ League Two៕
Chelsea នឹងទិញយកនីម៉ា ប្រសិនបើរូបគេចាកចេញពី PSG