ប្រែសម្រួល : កញ្ញាដាលីស (VNExpress) ៖ ប្រធានាធិបតីកូរ៉េខាងត្បូងលោក យូន ស៊ុកយ៉ូល បាននិយាយកាលពីថ្ងៃអង្គារទី២៥មេសាថា សម្ពន្ធភាពកូរ៉េខាងត្បូង-អាម៉េរិកត្រូវតែ”ហក់ចូលទៅក្នុងដំណាក់កាលថ្មី” ដើម្បីរួមគ្នាជម្នះនូវវិបត្តិដ៏ស្មុគស្មាញ រួមទាំងការថយចុះកំណើនសេដ្ឋកិច្ច ការប្រកួតប្រជែងខាងបច្ចេកវិជ្ជាជាមួយគូប្រជែងយុទ្ធសាស្ត្រ និងការប្រែប្រួលអាកាសធាតុ។
ថ្លែងមួយថ្ងៃមុនកិច្ចប្រជុំកំពូលនៅទីក្រុងវ៉ាស៊ីនតោនជាមួយប្រធានាធិបតី ចូ បៃដិន លោកយូនបានប្រាប់ព្រឹត្តិការណ៍មួយដែលរៀបចំដោយសភាពាណិជ្ជកម្មអាម៉េរិកថាសម្ពន្ធភាពសន្តិសុខទ្វេភាគីគួរតែ “វិវឌ្ឍទៅជាខ្សែសង្វាក់ផ្គត់ផ្គង់និងសម្ពន្ធភាពបច្ចេកវិជ្ជាប្រកបដោយភាពច្នៃប្រឌិតនាពេលអនាគត”។
លោកបាននិយាយថា សេដ្ឋកិច្ចរបស់ប្រទេសទាំងពីរបានកំពុងជួបបញ្ហាប្រឈមថ្មីៗ ហើយការធ្លាក់ចុះនៃសេដ្ឋកិច្ចកំពុងធ្វើឱ្យបរិយាកាសវិនិយោគមិនស្ងប់។
លោកយូនបាននិយាយថា “ការប្រកួតប្រជែងដើម្បីអនុត្តរភាពបច្ចេកវិជ្ជា បញ្ហាថាមពលនិងវិបត្តិអាកាសធាតុកំពុងធ្វើឱ្យមានភាពមិនច្បាស់លាស់បន្ថែមទៀតលើសកម្មភាពអាជីវកម្មពីមួយថ្ងៃទៅមួយថ្ងៃ”។
លោកយូនបាននិយាយថា រាប់ចាប់ពីការបណ្តាក់ទុនរួមគ្នាដែលពាក់ព័ន្ធនឹងក្រុមហ៊ុនកូរ៉េខាងត្បូងនិងក្រុមហ៊ុនអាម៉េរិកក្នុងឆ្នាំ១៩៦៥កូរ៉េខាងត្បូងបានក្រោកឡើងក្លាយជាប្រទេសឈានមុខគេលើពិភពលោកក្នុងការផលិតអង្គចងចាំដែលស្មើនឹង ៦០ ភាគរយនៃចំណែកទីផ្សារពិភពលោក។
លោកយូនបាននិយាយថា “កិច្ចសហប្រតិបត្តិការនេះគួរតែពង្រីកឱ្យហួសពីបន្ទះឈីបទៅកាន់បច្ចេកវិជ្ជាកំពុងរីកចម្រើននាពេលអនាគតនានាដូចជា AI, Quantum, SMR (Small Modular Reactors) និងអ្វីៗច្រើនទៀត”។
លោកបាននិយាយថា បច្ចេកវិជ្ជាស្នូលពីសហរដ្ឋអាម៉េរិកនិងសមត្ថភាពផលិតកម្រិតខ្ពស់របស់កូរ៉េខាងត្បូងនឹង “បង្កើតការសហការគ្នាដ៏ធំដែលនឹងផ្តល់ផលប្រយោជន៍ដល់ប្រទេសទាំងពីរ”។
លោកយូនបាននិយាយថា លោកសង្ឃឹមថា ក្នុងអំឡុងទស្សនកិច្ចរបស់លោក ប្រទេសទាំងពីរនឹងបញ្ជាក់សាជាថ្មីអំពីឋានៈរបស់ពួកគេជាសម្ពន្ធមិត្តពិតនិងដៃគូបច្ចេកវិជ្ជាទំនើបដើម្បីបង្កើតឱកាសអាជីវកម្មប្រកបដោយភាពច្នៃប្រឌិត។”ការវិនិយោគទ្វេភាគីរបស់យើងត្រូវតែពង្រីកទាំងបរិមាណនិងគុណភាពដើម្បីកសាងខ្សែសង្វាក់ផ្គត់ផ្គង់ដែលមានស្ថិរភាពនិងភាពធន់ជាងមុន”។
លោកបាននិយាយថា ប្រទេសទាំងពីរគឺជាដៃគូដ៏ល្អសម្រាប់ “មិត្តរួមការងារ”ដែលជាការនិយាយសំដៅលើដំណើរការដែលដឹកនាំដោយអាម៉េរិកក្នុងការកាត់បន្ថយការពឹងផ្អែកលើប្រទេសចិនសម្រាប់ទំនិញនិងសម្ភារៈសំខាន់ៗ ទោះបីជាលោកមិនបាននិយាយចំឈ្មោះប្រទេសចិនក៏ដោយ។
លោកយូនបាននិយាយថា រដ្ឋាភិបាលរបស់លោកកំពុងធ្វើការដើម្បីបង្កើតបរិយាកាសទីផ្សារដោយយុត្តិធម៌និងអាចព្យាករណ៍បាន និងផ្តល់ឥណទានពន្ធសំខាន់ៗដើម្បីជួយសម្រួលដល់ការវិនិយោគដ៏ក្លាហានដោយក្រុមហ៊ុនអាម៉េរិក។
លោកបាននិយាយថា “សាធារណរដ្ឋកូរ៉េនិងសហរដ្ឋអាម៉េរិកបានផាត់ពណ៌គំនូរព្រាងដ៏អស្ចារ្យជាមួយគ្នាអស់រយៈពេល ៧០ ឆ្នាំមកហើយ។ រយៈពេល ៧០ ឆ្នាំខាងមុខរួមគ្នានឹងក្លាយជាដំណើរនៃការបំពេញគំនូរព្រាងជាមួយនឹងពណ៌ដែលត្រូវគ្នា”៕
លោកយូនមកដល់សភាពាណិជ្ជកម្មអាម៉េរិកកាលពីថ្ងៃអង្គារ