ប្រែសម្រួល : កញ្ញាដាលីស (ដេល្លីម៉េល) ៖ ជនសង្ស័យឧក្រិដ្ឋកម្មសង្គ្រាមស៊ូដង់ម្នាក់ ជាផ្នែកនៃរបបអ៊ីស្លាមនិយមដែលត្រូវបានបណ្តេញចេញពីអំណាចក្នុងឆ្នាំ ២០១៩ បានរត់គេចពីពន្ធនាគារ ខណៈការប្រយុទ្ធគ្នាដ៏ខ្លាំងក្លាបានអង្រួនប្រទេសនេះកាលពីថ្ងៃពុធទី២៦មេសា ដោយបង្កើនការបារម្ភសម្រាប់បទឈប់បាញ់ដ៏ផុយស្រួយ។
នៅថ្ងៃទីពីរនៃបទឈប់បាញ់រយៈពេលបីថ្ងៃ សាក្សីបានរាយការណ៍អំពី “ការវាយប្រហារតាមអាកាសយ៉ាងធ្ងន់ធ្ងរ” នៅទន្លេនីលខាងកើត ដែលស្ថិតនៅភាគខាងកើតនៃរដ្ឋធានីកាទុំ និង”ការផ្ទុះដ៏ធំនៅទិសដៅនៃជំរំយោធា”។
សាក្សីបានប្រាប់ទីភ្នាក់ងារសារព័ត៌មាន AFPថា យន្តហោះចម្បាំងបានហោះនៅភាគខាងជើងជាយក្រុងកាទុំ ដោយនាំឱ្យមានការបាញ់កាំភ្លើងប្រឆាំងយន្តហោះយ៉ាងខ្លាំងក្លាពីកងជីវពល។
នៅភាគខាងត្បូងទីក្រុងកាទុំ ការបាញ់កាំភ្លើងយន្តត្រូវបានរាយការណ៍នៅជិតផ្ទះមួយក្នុងចំណោមផ្ទះនានាដែលគ្រប់គ្រងដោយមេបញ្ជាការកងជីវពលលោក ម៉ូហាម៉េដ ហាមដាន ដាកឡូ (Mohamed Hamdan Daglo) ដែលដឹកនាំកងកម្លាំងគាំទ្ររហ័ស (RSF) ប្រដាប់អាវុធធុនធ្ងន់ចូលធ្វើសង្គ្រាមប្រឆាំងនឹងកងកម្លាំងប្រដាប់អាវុធក្រោមការដឹកនាំរបស់មេបញ្ជាការកងទ័ព លោក អាប់ឌែល ហ្វាតតា អាល់ បឺហាន (Abdel Fattah al-Burhan)។
កងទ័ពបាននិយាយកាលពីថ្ងៃពុធថា ខ្លួននឹងបញ្ជូនអ្នកតំណាងម្នាក់ទៅកាន់ទីក្រុងជូបា (Juba) រដ្ឋធានីនៃប្រទេសស៊ូដង់ខាងត្បូងនៅជិតខាង ដើម្បីពិភាក្សាជាមួយកងជីវពល RSF”តាមគំនិតផ្តួចផ្តើមរបស់ IGAD” ដែលជាប្លុកតំបន់អាហ្វ្រិកខាងកើត។
កងកម្លាំងប្រដាប់អាវុធបាននិយាយថា កិច្ចចរចាគឺមានបំណង “បន្តបទឈប់បាញ់រយៈពេល ៧២ ម៉ោង” ខណៈបទឈប់បាញ់បច្ចុប្បន្ន ដែលភាគច្រើនត្រូវបានព្រងើយកន្តើយនឹងត្រូវបញ្ចប់នៅល្ងាចថ្ងៃព្រហស្បតិ៍នេះ។
នៅក្នុងភាពចលាចល ដែលបានសម្លាប់មនុស្សរាប់រយនាក់ បង្កឱ្យមានការភៀសខ្លួន និងបង្កការប៉ះពាល់ដល់ផ្នែកមនុស្សធម៌កាន់តែជ្រាលជ្រៅនោះ លោក អាម៉េដ ហារុន (Ahmed Harun)ដែលមានទំនាក់ទំនងជាមួយនឹងរបបរបស់បុរសខ្លាំង អូម៉ា អាល់បាសៀ (Omar al-Bashir) ដែលគេបណ្តេញចេញពីអំណាចនោះ បាននិយាយកាលពីថ្ងៃអង្គារថាគាត់និងអ្នកផ្សេងទៀតបានរត់គេចពីពន្ធនាគារ។
លោកហារុនត្រូវបានតុលាការព្រហ្មទណ្ឌអន្តរជាតិ (ICC)តាមចាប់ខ្លួនពីបទឧក្រិដ្ឋកម្មសង្គ្រាមទាក់ទងនឹងការបង្កើតកងជីវពលចានចាវីដ (Janjaweed) របស់របបលោកបាសៀប្រឆាំងនឹងជនជាតិភាគតិចមិនមែនអារ៉ាប់នៅតំបន់ដាហ្វួ (Darfur)។
ចាប់តាំងពីឆ្នាំ ២០០៣ ជម្លោះបានធ្វើឱ្យមនុស្សប្រហែល ៣០០.០០០ នាក់ស្លាប់ និង ២,៥ លាននាក់ត្រូវភៀសខ្លួន នេះបើយោងតាមអង្គការសហប្រជាជាតិ។
កងជីវពល RSF របស់លោកដាកឡូគឺកើតចេញមកពីកងជីវពលចានចាវីដនេះឯង។
បន្ទាប់ពីជាប់នៅក្នុងគុកទទេស្អាត កូបឺ (Kober) នៅក្នុង “ការបាញ់ប្រហារនៃសមរភូមិបច្ចុប្បន្ន” លោកហារុនបាននិយាយនៅក្នុងសុន្ទរកថាតាមទូរទស្សន៍ដែលបានថតទុកជាមុនថា គាត់និងសមាជិកអតីតរបបចាស់ផ្សេងទៀតបានយក “ការការពារខ្លួនយើងដាក់នៅក្នុងដៃរបស់យើងផ្ទាល់”។
ការិយាល័យរដ្ឋអាជ្ញា ICC បាននិយាយថា ខ្លួនកំពុងតាមដានការវិវឌ្ឍនេះ ប៉ុន្តែបានបន្ថែមថាមិនមានការបញ្ជាក់ឯករាជ្យអំពីស្ថានភាពអ្នកជាប់ឃុំនៅគុកកូបឺទេ៕
យន្តហោះចម្បាំងបានហោះនៅភាគខាងជើងជាយក្រុងកាទុំ ដោយនាំឱ្យមានការបាញ់កាំភ្លើងប្រឆាំងយន្តហោះយ៉ាងខ្លាំងក្លាពីកងជីវពល