ប្រែសម្រួល : កញ្ញាដាលីស (ដេល្លីម៉េល) ៖ យន្តហោះចម្បាំងរបស់ស៊ូដង់បានវាយលុកលើកងជីវពលក្នុងទីក្រុងកាទុំកាលពីថ្ងៃព្រហស្បតិ៍ ទី២៧មេសាខណៈការប្រយុទ្ធគ្នាយ៉ាងសាហាវនិងការលួចប្លន់បានផ្ទុះឡើងនៅក្នុងតំបន់ដាហ្វួ (Darfur)ខណៈកងទ័ពនិងកម្លាំងជាគូប្រជែងបានយល់ព្រមបន្តបទឈប់បាញ់ដែលមានស្រាប់ បើទោះបីជាការប្រយុទ្ធបានបន្តផ្ទុះឡើងក៏ដោយ។
ក្នុងពេលតែប៉ុន្មានម៉ោងចុងក្រោយនៃបទឈប់បាញ់ចំនួនបីថ្ងៃដែលត្រូវបានរំលោភម្តងហើយម្តងទៀតគ្រោងបញ្ចប់កាលពីពាក់កណ្តាលអធ្រាត្រថ្ងៃព្រហស្បតិ៍ តែកងទ័ពនិងកងកម្លាំងគាំទ្ររហ័ស (RSF)ដែលជាក្រុមធ្វើសង្គ្រាមនឹងគ្នា បានប្រកាសពន្យារបទឈប់បាញ់ ៧២ ម៉ោងទៀត បន្ទាប់ពីរងសម្ពាធពីអារ៉ាប៊ីសាអូឌីតនិងសហរដ្ឋអាម៉េរិក។
មានកិច្ចខិតខំប្រឹងប្រែងបទឈប់បាញ់ជាច្រើនលើកចាប់តាំងពីការប្រយុទ្ធគ្នាបានផ្ទុះឡើងកាលពីថ្ងៃទី ១៥ ខែមេសា រវាងកងទ័ពរបស់ស៊ូដង់ដែលដឹកនាំដោយឧត្តមសេនីយ៍ អាប់ឌែល ហ្វាតតា អាល់ បឺហាន (Abdel Fattah al-Burhan) និងកងកម្លាំងប្រដាប់អាវុធ RSF ដែលបញ្ជាដោយអនុប្រធានរបស់គាត់ដែលជាគូប្រជែងនឹងគ្នាគឺ លោក ម៉ូហាម៉េដ ម៉ាមដាន ដាកឡូ (Mohamed Hamdan Daglo) ។ បទឈប់បាញ់ទាំងអស់គឺសុទ្ធតែបរាជ័យ។
អាជ្ញាធរបរទេសពាក់ព័ន្ធដែលព្យាយាមជួយបញ្ចប់ការប្រយុទ្ធគ្នានេះ បានស្វាគមន៍កិច្ចព្រមព្រៀងឈប់បាញ់ដែលបានបន្តនេះ និង ជំរុញឱ្យអនុវត្តវាពេញលេញ។
នៅក្នុងសេចក្តីថ្លែងការណ៍រួម សហភាពអាហ្វ្រិក អង្គការសហប្រជាជាតិ អារ៉ាប៊ីសាអូឌីត អារ៉ាប់រួមអេមីរ៉ាត អង់គ្លេស និងសហរដ្ឋអាម៉េរិកបានសាទរចំពោះ”ការត្រៀមខ្លួនសម្រាប់ភាគីទាំងពីរក្នុងការចូលរួមក្នុងកិច្ចសន្ទនាឆ្ពោះទៅរកការបង្កើតការបញ្ឈប់អរិភាពយូរអង្វែង និងធានាឱ្យជំនួយមនុស្សធម៌ចូលបានដោយគ្មានឧបសគ្គ”។
ពួកគេបាននិយាយថា ការធ្វើដូច្នេះបាននឹងនាំឱ្យមានការអនុវត្តផែនការកាត់បន្ថយជម្លោះ ដែលបានបង្ហាញនៅក្នុងផែនការថ្ងៃទី ២០ ខែមេសាដើម្បីសន្តិភាព៕
ការប្រយុទ្ធកាន់តែខ្លាំងក្លាក្នុងក្រុងកាទុំត្បិតមានបទឈប់បាញ់នៅនឹងកន្លែង