ប្រែសម្រួល : កញ្ញាដាលីស (ដេល្លីម៉េល) ៖ ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើងបាននិយាយថា ប្រទេសរបស់នាងនឹងសម្ញែងកម្លាំងយោធារបស់ខ្លួនច្រើនឡើងដើម្បីឆ្លើយតបទៅនឹងកិច្ចព្រមព្រៀងថ្មីរវាងសហរដ្ឋអាម៉េរិកនិងកូរ៉េខាងត្បូងក្នុងការបង្កើនការទប់ស្កាត់នុយក្លេអ៊ែរដើម្បីទប់ទល់នឹងការគំរាមកំហែងនុយក្លេអ៊ែររបស់កូរ៉េខាងជើងដែលលោកស្រីអះអាងថាវាបានបង្ហាញនូវអរិភាពខ្លាំងរបស់ពួកគេចំពោះរដ្ឋាភិបាលក្រុងព្យុងយ៉ាង។
នាង គីម យ៉ូចុង ក៏បាននិយាយប្រមាថផ្ទាល់ខ្លួនចំពោះប្រធានាធិបតីអាម៉េរិក ចូ បៃដិន ដែលបន្ទាប់ពីកិច្ចប្រជុំកំពូលជាមួយប្រធានាធិបតីកូរ៉េខាងត្បូង យូន ស៊ុកយ៉ូលកាលពីថ្ងៃពុធ បានថ្លែងថា រាល់ការវាយប្រហារនុយក្លេអ៊ែររបស់កូរ៉េខាងជើងលើសហរដ្ឋអាម៉េរិកឬសម្ពន្ធមិត្ត ជាលទ្ធផលនឹងក្លាយជាទីបញ្ចប់នៃរបបណាដែលហ៊ានធ្វើសកម្មភាពបែបនេះ។
ជំនួបរបស់លោកបៃដិនជាមួយលោកយូននៅទីក្រុងវ៉ាស៊ីនតោនបានកើតឡើងចំពេលមានភាពតានតឹងកាន់តែខ្លាំងឡើងនៅឧបទ្វីបកូរ៉េខណៈល្បឿននៃការសម្ញែងអាវុធរបស់កូរ៉េខាងជើងនិងសមយុទ្ធយោធារួមគ្នារវាងអាម៉េរិកនិងកូរ៉េខាងត្បូងបានកើនឡើងនៅក្នុងវដ្តនៃការឌឺដងដាក់គ្នា។
ចាប់តាំងពីដើមឆ្នាំ២០២២ មក កូរ៉េខាងជើងបានបាញ់សាកល្បងមីស៊ីលប្រហែល ១០០ គ្រាប់រួមទាំងការបង្ហាញមីស៊ីលផ្លោងឆ្លងទ្វីបដែលបង្កើតឡើងដើម្បីបាញ់ទៅដល់ដីគោកអាម៉េរិកនិងការបាញ់សាកល្បងមីស៊ីលរយៈចម្ងាយខ្លីមួយចំនួន ដែលកូរ៉េខាងជើងពណ៌នាថាជាការហាត់សមធ្វើជាវាយនុយក្លេអ៊ែរលើកូរ៉េខាងត្បូង។
មេដឹកនាំកូរ៉េខាងជើង លោក គីម ជុងអ៊ុន ត្រូវបានគេរំពឹងយ៉ាងទូលំទូលាយថានឹងបង្កើនភាពតានតឹងនៅប៉ុន្មានសប្តាហ៍ខាងមុខឬប៉ុន្មានខែខាងមុខខណៈលោកបន្តពន្លឿនយុទ្ធនាការមួយក្នុងគោលបំណងពង្រឹងឋានៈរបស់កូរ៉េខាងជើងជាមហាអំណាចនុយក្លេអ៊ែរ ហើយនៅទីបំផុតនឹងបើកការចរចាសម្បទានសេដ្ឋកិច្ចនិងសន្តិសុខជាមួយសហរដ្ឋអាម៉េរិកចេញពីឋានៈមហាអំណាចនុយក្លេអ៊ែរនេះឯង។
ក្នុងអំឡុងកិច្ចប្រជុំកំពូល លោកបៃដិននិងលោកយូនបានប្រកាសពីកិច្ចខិតខំប្រឹងប្រែងទប់ស្កាត់នុយក្លេអ៊ែរថ្មីដែលអំពាវនាវឱ្យមានការចូលចតនាវាមុជទឹកនុយក្លេអ៊ែររបស់អាម៉េរិកជាទៀងទាត់នៅកូរ៉េខាងត្បូងជាលើកដំបូងក្នុងរយៈពេលជាច្រើនទសវត្សរ៍ និងជំរុញការហ្វឹកហាត់រវាងប្រទេសទាំងពីរ។ ពួកគេក៏បានប្តេជ្ញាចិត្តផងដែរចំពោះផែនការនានាសម្រាប់ការពិគ្រោះយោបល់ប្រធានាធិបតីទ្វេភាគីនៅក្នុងព្រឹត្តិការណ៍នៃការវាយប្រហារនុយក្លេអ៊ែររបស់កូរ៉េខាងជើងការបង្កើតក្រុមពិគ្រោះយោបល់នុយក្លេអ៊ែរ និងការធ្វើឱ្យប្រសើរឡើងនូវការចែករំលែកព័ត៌មានស្តីពីផែនការប្រតិបត្តិការនុយក្លេអ៊ែរនិងអាវុធយុទ្ធសាស្ត្រ។
នៅក្នុងការអត្ថាធិប្បាយរបស់នាងដែលផ្សព្វផ្សាយនៅលើប្រព័ន្ធផ្សព្វផ្សាយរដ្ឋ គីម យ៉ូចុងបាននិយាយថា កិច្ចព្រមព្រៀងអាម៉េរិក-កូរ៉េខាងត្បូងបានឆ្លុះបញ្ចាំងពី “ឆន្ទៈអរិភាពនិងសកម្មភាពគឃ្លើនបំផុត” របស់សម្ពន្ធមិត្តប្រឆាំងនឹងកូរ៉េខាងជើង ហើយនឹងរុញសន្តិភាពនិងសន្តិសុខក្នុងតំបន់ឆ្ពោះទៅរក “គ្រោះថ្នាក់កាន់តែធ្ងន់ធ្ងរ”។
លោកស្រីគីម ជាមន្ត្រីគោលនយោបាយការបរទេសកំពូលម្នាក់របស់បងប្រុសរបស់នាង បាននិយាយថា កិច្ចប្រជុំកំពូលនេះបានពង្រឹងជំនឿជាក់របស់កូរ៉េខាងជើងខ្លាំងឡើង ដើម្បីបង្កើនសមត្ថភាពអាវុធនុយក្លេអ៊ែររបស់ខ្លួន។ នាងបាននិយាយថា វានឹងមានសារៈសំខាន់ជាពិសេសសម្រាប់កូរ៉េខាងជើងក្នុងការធ្វើឱ្យល្អឥតខ្ចោះនូវ “បេសកកម្មទីពីរនៃការទប់ទល់នឹងសង្គ្រាមនុយក្លេអ៊ែរ” ដែលទំនងចង់សំដៅលើគោលលទ្ធិនុយក្លេអ៊ែររបស់ប្រទេស ដែលអំពាវនាវឱ្យមានការវាយប្រហារនុយក្លេអ៊ែរជាមុនលើសេណារីយ៉ូដ៏ទូលំទូលាយ ដែលខ្លួនយល់ឃើញជាការគំរាមកំហែងដល់ថ្នាក់ដឹកនាំរបស់ខ្លួន។
លោកស្រីបានពន្លះលោកបៃដិនជុំវិញការព្រមានចំៗរបស់គាត់ថា ការឈ្លានពានដោយប្រើអាវុធនុយក្លេអ៊ែររបស់កូរ៉េខាងជើងនឹងនាំមកនូវទីបញ្ចប់នៃរបបរបស់ខ្លួន ដោយនិយាយថា គាត់កំពុង “គណនាខុសពេកក្រៃនិងក្លាហានដោយគ្មានការទទួលខុសត្រូវ”។ ទោះយ៉ាងណា លោកស្រីបាននិយាយថាកូរ៉េខាងជើងនឹងមិនមែនគ្រាន់តែចាត់ទុកវាជាពាក្យមិនសមហេតុផលពីមនុស្សចាស់ជរាម្នាក់នោះឡើយ។
នាងបាននិយាយថា “នៅពេលដែលយើងពិចារណាថា ការបញ្ចេញមតិនេះត្រូវបានប្រើប្រាស់ដោយផ្ទាល់ដោយប្រធានាធិបតីអាម៉េរិក ដែលជាសត្រូវដ៏អរិភាពបំផុតរបស់យើង វាគឺជាវោហាសាស្ត្រគំរាមកំហែង ដែលខ្លួនគាត់ទេគួរតែត្រៀមលក្ខណៈសម្រាប់ក្រោយពេលមានព្យុះដ៏ខ្លាំង”។
“នៅពេលណាដែលសត្រូវកាន់តែរៀបចំសមយុទ្ធនុយក្លេអ៊ែរនិងបង្កើនសព្វាវុធនុយក្លេអ៊ែរកាន់តែច្រើន ដែលពួកគេដាក់ពង្រាយនៅតំបន់ជុំវិញឧបទ្វីបកូរ៉េ ការអនុវត្តសិទ្ធិស្វ័យការពាររបស់យើងកាន់តែរឹងមាំឡើងនឹងតម្រង់ទិសដោយផ្ទាល់លើពួកគេ”៕
គីម យ៉ូជុង ពន្លះលោកបៃដិនចំពោះការគំរាមរំលាយប្រទេសរបស់នាងចោល ក្នុងករណីកូរ៉េខាងជើងវាយប្រហារនុយក្លេអ៊ែរជាមុន