ប្រែសម្រួល : កញ្ញាដាលីស (អេស៊ាវ័ន) ៖ ប្រទេសចិនមានការវិវឌ្ឍឥតឈប់ឈរ ហើយមនុស្សនិងបច្ចេកវិជ្ជារបស់ចិនក៏វិវឌ្ឍផងដែរ។រាប់ចាប់ពីខ្យល់អាកាសស្អាតនិងរថយន្តបញ្ចេញថាមពលស្អាតរហូតដល់បុគ្គលដែលមានកម្រិតវប្បធម៌ខ្ពស់និងរបៀបរបបរស់នៅប្រកបដោយការបណ្តុះបណ្តាល ការធ្វើបច្ចុប្បន្នភាពផ្នត់គំនិតរបស់យើងអំពីប្រទេសចិនគួរតែចាប់ផ្តើមហើយ។ អ្វីៗដែលកន្លងទៅគឺបង្គន់កខ្វក់និងសីលធម៌មូលដ្ឋាននៃការតម្រង់ជួរត្រូវបានចាត់ទុកថាជាការខ្ជះខ្ជាយពេលវេលា។ ពិតណាស់ ប្រទេសចិនបានក្លាយជាប្រធានបទធំបន្ទាប់ទាក់ទងនឹងបច្ចេកវិជ្ជា និរន្តរភាពនិងការច្នៃប្រឌិត។
ការស្រេកឃ្លានក្នុងការកែលម្អខ្លួនឯងគឺហួសពីការរំពឹងទុកនិងសភាវគតិរបស់មនុស្សទាំងពួង មិនគ្រាន់តែដើម្បីរស់រានមានជីវិតប៉ុណ្ណោះទេប៉ុន្តែក៏ដើម្បីជំនួសតំណែងលេខ១និងធ្វើឱ្យល្អជាងដៃគូប្រជែងលើពិភពលោកផងដែរ ដែលនេះបានធ្វើឱ្យចិនមានឈ្មោះនៅលើផែនទី ជាពិសេសនៅក្នុងឧស្សាហកម្មរថយន្ត។
– វិនិយោគដើម្បីការវិវឌ្ឍ
ក្នុងប៉ុន្មានឆ្នាំចុងក្រោយនេះ ក្រុមហ៊ុនផលិតរថយន្តដែលផលិតនៅប្រទេសចិនបានបោះជំហានយ៉ាងសំខាន់ក្នុងការអភិវឌ្ឍរថយន្តអគ្គិសនី និងរថយន្តហាយប្រ៊ីដដែលស៊ីថាមពលតិចមិនប៉ះពាល់ដល់បរិស្ថាន និងបំពាក់ទៅដោយបច្ចេកវិជ្ជាទំនើបទាន់សម័យ។ ជាក់ស្តែង នេះគឺជាលទ្ធផលនៃការយកចិត្តទុកដាក់របស់រដ្ឋាភិបាលចិនលើការលើកកម្ពស់ការផលិតរថយន្តអគ្គិសនីនិងរថយន្តហាយប្រ៊ីដ រួមជាមួយនឹងការរីកចម្រើនផ្នែកបច្ចេកវិជ្ជា និងសមត្ថភាពច្នៃប្រឌិតរបស់ប្រទេស។
ហេតុដូច្នេះហើយ ចិនបានក្លាយជាប្រទេសផលិតដ៏ធំមួយនិងជាអ្នកប្រើប្រាស់រថយន្តអគ្គិសនីធំជាងគេនៅលើពិភពលោក ដោយក្រុមហ៊ុនផលិតរថយន្តដូចជា BYD និង Great Wall Motor (GWM)នាំមុខគេខាងបច្ចេកវិជ្ជានិងការបង្កើតថ្មីខាងរថយន្តអគ្គិសនី។ ឧទាហរណ៍ជាក់ស្តែង ក្រុមហ៊ុន BYD បានផលិតរថយន្ត Han EV ដែលមានចម្ងាយបើកបរដ៏គួរឱ្យចាប់អារម្មណ៍ជាង ៥២០ គីឡូម៉ែត្រនៅពេលសាកភ្លើងពេញ ដោយធ្វើឱ្យវាក្លាយជារថយន្តអគ្គិសនីដ៏គួរឱ្យចាប់អារម្មណ៍បំផុតមួយនៅលើទីផ្សារ។
ជាធម្មតា ការប្រើប្រាស់បច្ចេកវិជ្ជាទំនើបដូចជាម៉ាស៊ីនទាំងនេះផ្តល់នូវជម្រើសមិនប៉ះពាល់ដល់បរិស្ថានសម្រាប់អ្នកប្រើប្រាស់ស្របពេលជាមួយគ្នានេះបានជួយកាត់បន្ថយការពឹងផ្អែករបស់ប្រទេសលើឥន្ធនៈហ្វូស៊ីលផងដែរ។ បន្ថែមពីលើនេះ ក្រុមហ៊ុនទាំងនេះកំពុងវិនិយោគយ៉ាងខ្លាំងក្នុងការស្រាវជ្រាវ និងការអភិវឌ្ឍដើម្បីកែលម្អមិនគ្រាន់តែដំណើរការទាំងមូលនៃរថយន្តអគ្គិសនីរបស់ពួកគេប៉ុណ្ណោះទេ ប៉ុន្តែថែមទាំងបង្កើនល្បឿនពីកាបូនទាបទៅរកកាបូនសូន្យផងដែរ។
ឧទាហរណ៍ជាក់ស្តែង ក្រុមហ៊ុន GWM បានបណ្តាក់ទុនសរុបចំនួន ១០០ ពាន់លានយ័នដើម្បីផ្តោតលើបច្ចេកវិជ្ជាសំខាន់ៗដូចជាការស៊ីថាមពលទាប បន្ទះឈីបកម្រិតខ្ពស់ក៏ដូចជាឧបករណ៍សិនស័រ (Sensor)ទំនើប ការបញ្ចូនព័ត៌មាននិងបញ្ញាសិប្បនិម្មិត។ ក្រុមហ៊ុនថែមទាំងបានបង្កើតមជ្ឈមណ្ឌល R&D និងមជ្ឈមណ្ឌលច្នៃប្រឌិតបច្ចេកវិជ្ជានៅក្នុងផ្នែកជាច្រើននៃពិភពលោកផងដែរ រួមទាំងសហរដ្ឋអាម៉េរិក កាណាដា អាល្លឺម៉ង់ អូទ្រីស ជប៉ុន កូរ៉េខាងត្បូង និងឥណ្ឌា។
– ថាមពលជំនួស
ឧទាហរណ៍គួរឱ្យកត់សម្គាល់មួយទៀតនៃការរីកចម្រើនរបស់ចិនក្នុងការក្លាយជាអ្នកត្រួសត្រាយខាងបច្ចេកវិជ្ជាគឺឆន្ទៈរបស់ខ្លួនក្នុងការស្វែងរកប្រភពថាមពលស្អាតផ្សេងទៀតសម្រាប់រថយន្ត ដូចជាអ៊ីដ្រូសែនជាដើម។ ជាក់ស្តែង ក្រុមហ៊ុន GWM គឺជាសមាជិកសហគ្រាសរថយន្តចិនដំបូងគេនៃក្រុមប្រឹក្សាអ៊ីដ្រូសែន។ ពិតណាស់ក្រុមហ៊ុនផលិតរថយន្តចិននេះនឹងដាក់បង្ហាញជាផ្លូវការនូវរថយន្តប្រើអាគុយឥន្ធនៈអ៊ីដ្រូសែនក្នុងឆ្នាំ ២០២៥។ ម៉ូដែលថាមពលថ្មីទាំងនេះនឹងត្រូវរួមបញ្ចូលនៅក្នុងរថយន្តជំនាន់បន្ទាប់នៃម៉ាក GWM ចំនួនបួនគឺ Haval, Wey, ORA និង GWM Pickup ។
ប៉ុន្តែសម្រាប់បច្ចុប្បន្ន ក្រុមហ៊ុនផលិតរថយន្តរបស់ចិននានាហាក់កំពុងបង្កើនល្បឿននៃការបង្កើតរថយន្តអគ្គិសនីដូចអ្វីដែលបានជួបប្រទះនៅក្នុងពិព័រណ៍យានយន្តសៀងហៃ ដែលទើបនឹងបញ្ចប់ថ្មីៗនេះ។ ម៉ាកយីហោដូចជា BYD, Xpeng, GWM ក៏ដូចជា HiPhi បានបង្ហាញរថយន្តអគ្គិសនីជាចម្បង។
– អនាគតនៃការបើកបរ
ក្រៅពីរថយន្តអគ្គិសនី ក្រុមហ៊ុនផលិតរថយន្តនិងក្រុមហ៊ុនបច្ចេកវិជ្ជានានារបស់ចិនក៏កំពុងឈានមុខគេផងដែរក្នុងវិស័យបច្ចេកវិជ្ជាបើកបរដោយស្វ័យប្រវត្តិ។ ក្រុមហ៊ុន SAIC Motor ដែលជាក្រុមហ៊ុនផលិតរថយន្តធំជាងគេរបស់ចិន បានចាប់ដៃគូជាមួយក្រុមហ៊ុនបច្ចេកវិជ្ជាយក្ស Alibaba ដើម្បីបង្កើតបច្ចេកវិជ្ជាបើកបរដោយស្វ័យប្រវត្តិ។
ក្រុមហ៊ុនរថយន្តចិនមួយទៀតឈ្មោះ Geely បានសហការជាមួយក្រុមហ៊ុនបច្ចេកវិជ្ជាយក្ស Baidu ដើម្បីបង្កើតបច្ចេកវិជ្ជាបើកបរស្វ័យភាពកម្រិត ៤ ដែលមានន័យថា រថយន្តអាចបើកបរដោយខ្លួនឯងបានដោយមិនចាំបាច់មានអន្តរាគមន៍ពីមនុស្សក្នុងស្ថានភាពភាគច្រើន។
អ្វីដែលគួរឱ្យចាប់អារម្មណ៍ គឺក្រុមហ៊ុនរថយន្តអគ្គិសនីធំបំផុតរបស់ចិន BYD មានមតិខុសពីគេលើការបើកបរដោយស្វ័យប្រវត្តិ។ យោងតាមក្រុមហ៊ុនផលិតរថយន្តនេះបានឱ្យដឹងថា ការបើកបរដោយស្វ័យប្រវត្តិពេញលេញគឺមិនអាចទៅរួចនោះទេ ហើយបច្ចេកវិជ្ជានៅពីក្រោយប្រព័ន្ធជំនួយអ្នកបើកបរបែបនេះនឹងស័ក្តិសមជាងចំពោះការផលិត។ ជាងនេះទៅទៀត វានឹងពិបាកក្នុងការចាប់កំហុសភាគីណាដែលជាប់ពាក់ព័ន្ធនឹងគ្រោះថ្នាក់ចរាចរណ៍ នៅពេលដែលរថយន្តបើកបរដោយខ្លួនឯងត្រូវបានយកមកពិចារណា។
– រថយន្តផលិតនៅប្រទេសចិននឹងក្លាយជារថយន្តល្បីនៅពេលខាងមុខ?
ជាការពិតណាស់ វាតែងតែមានមតិផ្សេងគ្នាពីក្រុមហ៊ុនផ្សេងៗគ្នានិងមនុស្សផ្សេងៗគ្នាលើប្រធានបទស្រដៀងគ្នានេះ ប៉ុន្តែរឿងមួយដែលយើងមិនអាចមិនយល់ស្របតាមនោះគឺការពិតដែលថា រថយន្តផលិតនៅប្រទេសចិនអាចនឹងក្លាយជាអនាគតនៃឧស្សាហកម្មរថយន្ត។
ពិតណាស់ ខណៈមានបញ្ហាប្រឈមមួយចំនួនដែលក្រុមហ៊ុនផលិតរថយន្តចិនជួបប្រទះទាក់ទងនឹងការទទួលស្គាល់ម៉ាកយីហោនិងការយល់ឃើញរបស់អ្នកប្រើប្រាស់ពីជុំវិញពិភពលោក ចិនសព្វថ្ងៃកំពុងប្រឹងប្រែងខ្លាំងណាស់និងវិនិយោគយ៉ាងច្រើនក្នុងការអភិវឌ្ឍនិងផលិតយានយន្តអគ្គិសនីប្រកបដោយភាពច្នៃប្រឌិត។ នេះអាចផ្តល់ឱ្យពួកគេនូវប្រៀបឈ្នះយ៉ាងសំខាន់នៅក្នុងទីផ្សារពិភពលោក ដោយសារតម្រូវការរថយន្ត EV បន្តកើនឡើងឥតឈប់ឈរ។
ដូចគ្នានេះផងដែរ ទំហំដ៏ធំរបស់ប្រទេសនេះបានផ្តល់ប្រៀបប្រកួតប្រជែងខាងអាជីវកម្មនៅក្នុងប្រទេសចិនជាងប្រទេសដទៃនៅលើពិភពលោក។ តួលេខចំនួនកម្មករផលិតមិនគ្រាន់តែរាប់ម៉ឺននាក់ប៉ុណ្ណោះទេ ប៉ុន្តែដល់ទៅរាប់សែននាក់ឯណោះ។ ហើយជាមួយនឹងបុគ្គលិករាប់សែននាក់នៅក្នុងក្រុមហ៊ុនរថយន្តនីមួយៗ ផ្លូវឆ្ពោះទៅកាន់ភាពជោគជ័យគឺកាន់តែងាយសម្រេចបាន ដោយសារផលិតភាពច្បាស់ជាកើនឡើង ដែលអាចនាំឱ្យផលិតផលកាន់តែច្រើនឆាប់បានលក់ចេញ និងតួលេខប្រាក់ចំណូលកាន់តែកើនខ្ពស់។
សំខាន់ជាងនេះទៅទៀតគឺរបៀបដែលក្រុមហ៊ុនផលិតរថយន្តចិនទាំងនេះកំពុងពង្រីកការបោះជំហានជាសកលរបស់ពួកគេតាមរយៈភាពជាដៃគូយុទ្ធសាស្ត្រនិងលទ្ធកម្មនានា។ ឧទាហរណ៍ជាក់ស្តែង ក្រុមហ៊ុន Geely បានទិញម៉ាករថយន្តល្បីៗជាច្រើន រួមមាន Volvo, Polestar និង Lotus ដែលបានជួយបង្កើនការទទួលស្គាល់ម៉ាកយីហោរបស់ខ្លួន និងភាពជឿជាក់នៅក្នុងទីផ្សារអឺរ៉ុប។
ការបណ្តាក់ទុនរួមគ្នាជាយុទ្ធសាស្ត្ររវាងក្រុមហ៊ុន SAIC Motor និង Volkswagen Group ក្នុងឆ្នាំ ១៩៨៥ ក៏បានឃើញការបង្កើតក្រុមហ៊ុន SAIC Volkswagen នៅក្នុងប្រទេសចិនផងដែរ ដែលចាប់តាំងពីពេលនោះមកបានបង្កើតមូលដ្ឋានផលិតកម្មនៅក្នុងក្រុងណាននីង (Nanjing) យីងចេង (Yizheng) នីងប៉ូ (Ningbo) យូរុមឈី (Urumqi) និងឆាងសា (Changsha) ជាបន្តបន្ទាប់។ សូម្បីតែម៉ាកយីហោដែលទើបចាប់ផ្តើមអាជីវកម្មដូចជា HiPhi និង Zeekr ក៏បានដាក់ចេញនូវផែនការដើម្បីចូលទៅក្នុងទីផ្សារអឺរ៉ុបក្នុងអំឡុងពិព័រណ៍យានយន្តសៀងហៃនាពេលថ្មីៗនេះដែរ។
តាមរយៈការចាប់ដៃគូជាមួយម៉ាកល្បីៗស្រាប់និងការប្រើប្រាស់ខ្សែសង្វាក់ផ្គត់ផ្គង់និងបណ្តាញចែកចាយដែលមានស្រាប់របស់ពួកគេ បណ្តាក្រុមហ៊ុនផលិតរថយន្តរបស់ចិនអាចពង្រីកចំណែកទីផ្សារពិភពលោករបស់ពួកគេយ៉ាងឆាប់រហ័ស និងរីកចម្រើនក្លាយជាមហាអំណាចសេដ្ឋកិច្ចពិភពលោកមួយ។ ដូច្នេះ វាសមហេតុផលក្នុងការនិយាយថា ឥទ្ធិពលរបស់ចិននៅក្នុងឧស្សាហកម្មរថយន្តទំនងជានឹងកើនឡើង ហើយចិនអាចនឹងក្លាយជាកម្លាំងលេចធ្លោនៅក្នុងឧស្សាហកម្មរថយន្តនាពេលខាងមុខ។
– អនាគតដែលចៀសមិនរួច
រថយន្តដែលផលិតនៅចិនកំពុងជំរុញដល់អនាគតនៃឧស្សាហកម្មរថយន្ត ជាមួយនឹងភាពជឿនលឿនរបស់ពួកគេក្នុងផ្នែកយានយន្តអគ្គិសនីក៏ដូចជាបច្ចេកវិជ្ជាបើកបរដោយស្វ័យប្រវត្តិផងដែរ។ វិធីសាស្ត្រប្រកបដោយភាពច្នៃប្រឌិតនិងនិរន្តរភាពនេះចំពោះឧស្សាហកម្មរថយន្តអាចមានឥទ្ធិពលយ៉ាងសំខាន់លើទីផ្សារពិភពលោកក្នុងប៉ុន្មានឆ្នាំខាងមុខនេះ។
ខណៈយើងក្រឡេកមើលទសវត្សរ៍ក្រោយ ឥទ្ធិពលនៃក្រុមហ៊ុនផលិតរថយន្តរបស់ចិនលើឧស្សាហកម្មរថយន្តពិភពលោកគ្រោងនឹងមានលក្ខណៈកាន់តែស៊ីជម្រៅ ហើយការរួមចំណែករបស់ពួកគេចំពោះការរីកចម្រើននៃបច្ចេកវិជ្ជាដឹកជញ្ជូនមិនគួរមើលស្រាលនោះឡើយ។ ទិសដៅនេះមិនគ្រាន់តែផ្តល់អត្ថប្រយោជន៍ដល់បរិស្ថានប៉ុណ្ណោះទេ ប៉ុន្តែថែមទាំងផ្តល់ការងារថ្មីៗនិងឱកាសអាជីវកម្មក្នុងវិស័យរថយន្តផងដែរ។ វាជាសក្ខីភាពមួយចំពោះការយកចិត្តទុកដាក់របស់ប្រទេសចិនក្នុងការការពារបរិស្ថាននិងកសាងអនាគតប្រកបដោយចីរភាព។
អាស្រ័យហេតុនេះ ខណៈប្រទេសកាន់តែច្រើនឡើងផ្លាស់ប្តូរឆ្ពោះទៅរកការរចនានិងកិច្ចដំណើរការការងារប្រកបដោយនិរន្តរភាពនិងមិនប៉ះពាល់ដល់បរិស្ថាន ឧស្សាហកម្មរថយន្តរបស់ចិនអាចនឹងឈានមុខគេ។ ជាមួយនឹងការកើនឡើងនៃតម្រូវការសម្រាប់យានយន្តមិនប៉ះពាល់ដល់បរិស្ថាន ឧស្សាហកម្មរថយន្តរបស់ចិនឈរនៅទីតាំងល្អណាស់ដើម្បីក្លាយជាតួអង្គដ៏សំខាន់មួយនៅក្នុងទីផ្សារពិភពលោក៕
រថយន្តអគ្គិសនីចិនកាន់តែធ្វើឱ្យពិភពលោកទទួលស្គាល់បន្តិចម្តងៗ