ប្រែសម្រួលៈបំណង(ដេល្លីម៉េល)៖ ប៉ូលីសបង្ក្រាបបាតុកម្មបារាំងបានរងគ្រោះធ្ងន់ធ្ងរនៅថ្ងៃទិវាពលកម្មអន្តរជាតិ០១ឧសភា ដោយពួកគេមួយចំនួនត្រូវបាតុករប្រើគ្រាប់បែកសាំងដុតអោយឆេះនិងរងការវាយប្រហារដោយកាំជ្រួចនិងរបស់របរផ្សេងៗចំពេលមនុស្សប្រមាណ៨០០.០០០នាក់ចេញមកដើរដង្ហែនៅទូទាំងប្រទេសបារាំងកាលពីថ្ងៃចន្ទទី០១ឧសភា។
យ៉ាងហោចណាស់ប៉ូលីស១០៨នាក់បានរងរបួសក្នុងការប៉ះទង្គិចហិង្សាជាមួយបាតុករនៅតាមដងវិថីនៃទីក្រុងជាច្រើនខណៈពួកគេប្រើឳកាសទិវាពលកម្មអន្តរជាតិនេះបន្តធ្វើការតវ៉ាប្រឆាំងនឹងផែនការកំណែទំរង់សោធននិវត្តន៍របស់ប្រធានាធិបតីអេម៉ានុយអែល ម៉ាក្រុង។ 
រូបភាពបង្ហាញប៉ូលីសឆេះក្រោយរងការគប់គ្រាប់បែកសាំងដាក់នៅក្នុងការប៉ះទង្គិចនៅក្រុងប៉ារីសកាលពីថ្ងៃ១ឧសភា។ទូរទស្សន៍បារាំងបាននិយាយថា ប៉ូលីសបានរលាកមុខនិងដងខ្លួនហើយត្រូវបានបញ្ជូនទៅកាន់មន្ទីរពេទ្យ។
ប៉ូលីសយ៉ាងតិច១០៨នាក់រងរបួស ក្នុងនេះ២៥នាក់នៅក្នុងទីក្រុងប៉ារីស ហើយក្នុងចំណោមមនុស្ស២៩១នាក់ត្រូវបានចាប់ខ្លួននៅទូទាំងបារាំង មាន១១១នាក់នៅក្រុងប៉ារីសនៅពេលអំពើហិង្សាបានផ្ទុះឡើងនៅក្នុងទីក្រុងជាច្រើនចំពេលមានការដើរដង្ហែដែលរៀបចំឡើងដោយសហជីព។
មនុស្សរាប់សិបនាក់ក៏ត្រូវបានចាប់ខ្លួន នៅពេលកុបកម្មរារាំងការដើរដង្ហែទាមទារនៅទិវាពលកម្មអន្តរជាតិនៅទូទាំងបារាំង។បើតាមសហជីព វាជាការតវ៉ាទាមទារធំបំផុតមិនដែនធ្លាប់ជួបនៅរយៈពេលបីទសវត្សរ៍មកនេះនៅពេលពួកអ្នករៀបចំមានគំរោងធ្វើការតវ៉ាទាមទារធំៗនៅទូទាំងបារាំងកាលពីម្សិលមិញដើម្បីប្រឆាំងនឹងការសំរេចចិត្តរបស់រដ្ឋាភិបាលក្នុងការដំឡើងអាយុចូលនិវត្តន៍ពី៦២ទៅ៦៤ឆ្នាំ។
នៅទីក្រុងប៉ារីសតែមួយ មនុស្សជាង៥០០.០០០នាក់បានចេញមកតាមដងវិថី ដោយប៉ូលីសបានប្រើឧស្ម័នហៀរទឹកភ្នែកនិងការបាញ់ទឹកដើម្បីទប់ទល់នឹងពួកគេ។ទិដ្ឋភាពស្រដៀងគ្នាក៏កើតមានចាប់ពីទីក្រុងណង់ធ៍(Nantes)ដល់ម៉ាសី(Marseille) និងការចាប់ខ្លួនកើនដល់ជិត៣០០នាក់៕