ប្រែសម្រួល : កញ្ញាដាលីស (ដេល្លីម៉េល) ៖ ឆ្មាទម្ងន់ ១៨ គីឡូក្រាម ដែលជាប់ឈ្មោះជាឆ្មាធាត់ជាងគេបំផុតរបស់ពិភពលោក ទីបំផុតត្រូវបានម្ចាស់ថ្មីរបស់វាដាក់ឱ្យតមអាហារ។
ឆ្មាឈ្មោះ ភែតឆេស (Patches) ត្រូវបានជួយសង្គ្រោះដោយទីជម្រកសត្វមួយក្នុងទីក្រុងរីចម៉ុន (Richmond) រដ្ឋវើជីនៀកាលពីដើមខែនេះ។មិនយូរប៉ុន្មានផង ឆ្មាឈ្មោលនេះបានក្លាយជាល្បីលើអ៊ីនធឺណិត នៅពេលដែលមណ្ឌលថែទាំនិងគ្រប់គ្រងសត្វរីចម៉ុនបានដាក់វាធ្វើជាសត្វចិញ្ចឹម។
ក្រោមម្ចាស់ថ្មីឈ្មោះ កាយ ហ្វត (Kay Ford) ភែតឆេស ដែលមានទម្ងន់ស្មើនឹងកុមារអាយុ ៤ ឆ្នាំ បានស្រក ៩០ ក្រាមរួចទៅហើយលើរបបអាហារថ្មីរបស់វា។
ត្បិតឆ្មានេះមានទំហំធំមិនធម្មតាក៏ពិតមែន ប៉ុន្តែលោកស្រី គ្រីស្ទី ភីតធឺ (Christy Peters) នាយកនៃមណ្ឌលថែទាំនិងគ្រប់គ្រងសត្វរីចម៉ុន បានប្រាប់កាសែត The Telegraph ថា ផាច់ឆេស “រើសចំណីណាស់”។
លោកស្រីភីតធឺបានបកស្រាយថា ផាច់ឆេសត្រូវបានម្ចាស់មុនសុំចុះចាញ់ ព្រោះមិនអាចមើលថែឆ្មានេះបានតទៅទៀត។
លោកស្រីបាននិយាយថា ប្រតិកម្មដំបូងរបស់លោកស្រីគឺការស្រែកហួសចិត្ត បន្ទាប់ពីបានឃើញ “ឆ្មាធំបំផុតដែលខ្ញុំមិនធ្លាប់ឃើញពីមុន”។
ក្រុមពេទ្យសត្វបាននិយាយថា ទម្ងន់ជាមធ្យមរបស់ឆ្មាក្នុងស្រុក អាស្រ័យលើពូជគឺប្រហែល ៤,៥ គីឡូក្រាម។ កុមារអាយុ ៤ ឆ្នាំមានទម្ងន់ជាមធ្យម ១៧ គីឡូក្រាម។
បន្ទាប់ពីធ្វើតេស្តិ៍រោគវិនិច្ឆ័យលើផាច់ឆេស ក្រុមអ្នកជួយសង្គ្រោះបានរកឃើញថា ឆ្មានេះមានសុខភាពល្អទាំងស្រុង ត្បិតវាត្រូវរស់នៅក្នុងការិយាល័យមួយរបស់ក្រុមសង្គ្រោះ ដោយសារតែវាធំពេកមិនអាចរស់ក្នុងទ្រុងបានក៏ដោយ។
លោកស្រីភីតធឺបានពន្យល់ថា ពួកគេជឿថា ផាច់ឆេសប្រហែលជាស៊ីអាហារមនុស្សជាជាងអាហារឆ្មា ប៉ុន្តែលោកស្រីទទូចថាវាមិនមែនជាឆ្មាល្មោភស៊ីនោះទេ។ លោកស្រីបានបន្ថែមថា “វាពិតជាស៊ីរើសណាស់”៕
ភែតឆេសឥឡូវស្រកបាន ៩០ ក្រាមជាមួយរបបអាហារថ្មីដែលម្ចាស់វាឈ្មោះ កាយ ហ្វត ដាក់ឱ្យស៊ី