ប្រែសម្រួលៈបំណង(ដេល្លីម៉េល)៖ថ្លៃប្រេងឆៅបានធ្លាក់ក្នុងជំនួញនៅអាស៊ីកាលពីថ្ងៃអង្គារទី២ឧសភា ដោយបន្ថែមការធ្លាក់ថ្លៃពីការធ្លាក់នៅក្នុងជំនួញកាលពីមួយថ្ងៃមុន ចំពេលទិន្នន័យសេដ្ឋកិច្ចកិច្ចមកពីចិនបង្ហាញអោយឃើញថាខ្សោយនិងមានការរំពឹងទុកថា ធនាគារកណ្តាលអាម៉េរិកនឹងបង្កើនអត្រាការប្រាក់ដែលនឹងកាន់តែដាក់សម្ពាធលើទីផ្សារប្រេង។
ប្រេងម៉ាកBrentបានចុះ០,៣ភាគរយឬ២៤សេនមកនៅត្រឹម៧៩,០៧ដុល្លារក្នុងមួយបារ៉ែលនៅពេលប្រេងWTIនៅអាម៉េរិកចុះ២៥សេនផងដែរមកនៅត្រឹម៧៥,៤១ដុល្លារក្នុងមួយបារ៉ែល។សូមបញ្ជាក់ថាប្រេងម៉ាកទាំងពីរបានធ្លាក់ចុះអស់ជាង១ដុល្លារក្នុងការជួញដូរវគ្គមុន។
ទីណា តេង អ្នកវិភាគនៅក្រុមហ៊ុនទីផ្សារCMC Marketsបាននិយាយថា«សម្ពាធលើប្រេងគឺមកពីការរើបរើសេដ្ឋកិច្ចនៅចិនមិនសំរេចដូចការរំពឹងទុក ដោយជះផលអាក្រក់លើទស្សនវិស័យនៃតំរូវការប្រេង»។
ទិន្នន័យបានបង្ហាញកាលពីថ្ងៃអាទិត្យថា សកម្មភាពឧស្សាហកម្មរោងចក្រចិនធ្លាក់ចុះនៅខែមេសា ដែលជាការធ្លាក់ចុះលើកដំបូងចាប់តាំងពីខែធ្នូឆ្នាំ២០២២។សូមបញ្ជាក់ថាការរើបរើសេដ្ឋកិច្ចនិងឧស្សាហកម្មចិនចេញពីផលនៃវិធានការប្រឆាំងកូវីដ១៩ត្រូវរំពឹងថានឹងរុញសេចក្តីត្រូវការនៅឆ្នាំនេះ។
ទោះជាទិន្នន័យឧស្សាហកម្មកម្មន្តសាលរបស់ចិនខ្សោយ ក៏មានសញ្ញាវិជ្ជមាននៃការរើបរើ ផ្អែកលើការចំណាយក្នុងអំឡុងពេលឈប់សម្រាកបុណ្យទានប្រាំថ្ងៃនៅក្នុងប្រទេសនាំចូលប្រេងធំបំផុតក្នុងលោកមួយនេះ នេះបើតាមអ្នកវិភាគនៅក្រុមហ៊ុនANZ Research។
ទូរទស្សន៍ចិនCCTV បាននិយាយថា ក្រុមហ៊ុនលក់រាយនិងក្រុមហ៊ុនម្ហូបអាហារធំៗបានឃើញការលក់របស់គេកើនឡើង២១ភាគរយធៀបនឹងពេលដូចគ្នាកាលពីឆ្នាំមុន ផ្អែកលើទិន្នន័យរបស់ក្រសួងពាណិជ្ជកម្ម។ការធ្វើដំណើរ១៩,៧លានជើងត្រូវបានកត់សំគាល់ឃើញនៅទូទាំងប្រទេសចិនក្នុងអំឡុងពេលឈប់សម្រាក។ចរាចរណ៍ក៏កើនឡើង២០ភាគរយធៀបនឹងឆ្នាំ២០១៩។
CCTVបានរាយការណ៍ថា ក្នុងអំឡុងពេលចុងសប្តាហ៍ការធ្វើដំណើរនៅថ្ងៃដំបូងនៃពេលឈប់សម្រាកបានកើនឡើង១៥១,៨ភាគរយធៀបនឹងថ្ងៃដូចគ្នាកាលពីឆ្នាំមុន នៅពេលចំនួនការធ្វើដំណើរតាមផ្លូវអាកាស ផ្លូវគោក ផ្លូវទឹកនិងរថភ្លើងបានកើនដល់៥៦,៩៩លាននៅថ្ងៃនោះ។
តាមពិតស្តុកប្រេងឆៅអាម៉េរិកបានធ្លាក់ដល់សប្តាហ៍ទីបីជាប់គ្នាដែលអាចជួយទប់ថ្លៃប្រេង តែធនាគារអាម៉េរិកដែលនឹងបើកកិច្ចប្រជុំនៅថ្ងៃអង្គារនិងពុធ ត្រូវរំពឹងថានឹងបន្តបង្កើនអត្រាកាប្រាក់ថែមទៀតដែលវានឹងរារាំងសកម្មភាពសេដ្ឋកិច្ចក៏ដូចជាតំរូវការប្រេងនៅអាម៉េរិក៕
ការធ្វើដំណើរនិងការលក់រាយក្នុងអំឡុងពេលឈប់សម្រាកនៅចិនកើនឡើងដែលបង្ហាញអំពីសកម្មភាពសេដ្ឋកិច្ចចិនកំពុងដំណើរការក្រោយការបិទខ្ទប់ប្រឆាំងកូវីដ១៩