ប្រែសម្រួល : កញ្ញាដាលីស (ដេល្លីម៉េល) ៖ រដ្ឋបាលបៃដិននឹងបញ្ជូនទាហានសកម្មចំនួន ១.៥០០ នាក់ទៅកាន់ព្រំដែនអាម៉េរិក-ម៉ិកស៊ិកចាប់ពីសប្តាហ៍ក្រោយនេះតទៅមុនពេលការកើនឡើងនៃជនចំណាកស្រុកដែលបានរំពឹងទុក បន្ទាប់ពីការបញ្ចប់នៃការរឹតត្បិតកូវីដ។
អ្នកនាំពាក្យសេតវិមាននាង ការីន ហ្សង់ព្យែរ (Karine Jean-Pierre)បាននិយាយកាលពីថ្ងៃអង្គារទី២ឧសភាថា បុគ្គលិកយោធានឹងធ្វើការក្នុងផ្នែកវាយបញ្ចូលទិន្នន័យ គាំទ្រឃ្លាំងនិងកិច្ចការរដ្ឋបាលផ្សេងទៀតដើម្បីឱ្យទីភ្នាក់ងារគយនិងការពារព្រំដែនរបស់សហរដ្ឋអាម៉េរិកអាចផ្តោតលើការងារលើទីតាំងជាក់ស្តែង។ នាងហ្សង់ព្យែរបាននិយាយថា កងទ័ព”នឹងមិនអនុវត្តមុខងារអនុវត្តច្បាប់ឬធ្វើអន្តរកម្មជាមួយជនអន្តោប្រវេសន៍ឬជនចំណាកស្រុកទេ។ នេះនឹងធ្វើឱ្យភ្នាក់ងារល្បាតព្រំដែនរួចដៃអាចបំពេញកាតព្វកិច្ចអនុវត្តច្បាប់ដ៏សំខាន់របស់ពួកគេបាន”។
អ្នកនាំពាក្យមន្ទីរបញ្ចកោណឧត្តមសេនីយ៍ ផាត់ រ៉ាយឌ័រ (Pat Ryder)បាននិយាយថា ពួកគេនឹងត្រូវដាក់ពង្រាយរយៈពេល ៩០ ថ្ងៃ ហើយនឹងត្រូវទាញចេញពីកងទ័ពជើងគោកនិងកងម៉ារីន ហើយរដ្ឋមន្ត្រីការពារជាតិ ឡយ អូស្ទីន នឹងព្យាយមបំពេញវិញជាមួយកងឆ្មាំជាតិឬកងទ័ពបម្រុងក្នុងអំឡុងពេលនោះ។ សព្វថ្ងៃមានសមាជិកកងឆ្មាំជាតិ ២.៥០០ នាក់រួចហើយនៅព្រំដែន។
ការដាក់កំហិតទប់ស្កាត់កូវីដ១៩ បានអនុញ្ញាតឱ្យមន្ត្រីអាម៉េរិករុញត្រឡប់ទៅវិញនូវជនចំណាកស្រុករាប់ម៉ឺននាក់ដែលឆ្លងកាត់ព្រំដែនភាគខាងត្បូងប៉ុន្តែការរឹតបន្តឹងទាំងនោះនឹងត្រូវលុបចោលនៅថ្ងៃទី ១១ ខែឧសភា ហើយក្រុមមន្ត្រីព្រំដែនកំពុងត្រៀមខ្លួនសម្រាប់ការកើនឡើងជនអន្តោប្រវេសន៍។ ទោះបីជាមានការរឹតបន្តឹងបែបនោះក្តីក៏រដ្ឋបាលបៃដិននៅតែឃើញចំនួនកើនឡើងនៃអ្នកឆ្លងព្រំដែន ហើយប្រធានាធិបតី ចូ បៃដិន បានឆ្លើយតបដោយការបង្ក្រាបអ្នកដែលឆ្លងដែនខុសច្បាប់ និងបង្កើតផ្លូវថ្មី ដែលមានបំណងផ្តល់ជម្រើសសម្រាប់ការធ្វើដំណើរដ៏គ្រោះថ្នាក់។
សម្រាប់លោកបៃដិន ដែលបានប្រកាសយុទ្ធនាការបោះឆ្នោតឡើងវិញរបស់គណបក្សប្រជាធិបតេយ្យកាលពីមួយសប្តាហ៍មុន ការសម្រេចចិត្តនេះបង្ហាញសញ្ញាថា រដ្ឋបាលរបស់លោកកំពុងចាត់វិធានការយ៉ាងម៉ឺងម៉ាត់ក្នុងការកាត់បន្ថយចំនួននៃការឆ្លងដែនខុសច្បាប់ ដែលជាប្រភពនៃការវាយប្រហារដ៏ខ្លាំងក្លាពីគណបក្សសាធារណរដ្ឋនិងផ្ញើសារទៅកាន់អ្នកបម្រុងនឹងឆ្លងដែនកុំព្យាយាមធ្វើដំណើរមកឱ្យសោះ។ ប៉ុន្តែវាក៏ទាក់ទាញការប្រៀបធៀបដែលមិនគួរឱ្យស្វាគមន៍ផងដែរចំពោះអតីតប្រធានាធិបតីត្រាំ ដែលគោលនយោបាយរបស់លោកបៃដិន បានរិះគន់ជាញឹកញាប់។ ទន្ទឹមនឹងនោះដែរ សភាបានបដិសេធមិនចាត់វិធានការណាមួយទាក់ទងនឹងអន្តោប្រវេសន៍នោះឡើយ។
អតីតប្រធានាធិបតី ដូណាល់ ត្រាំ ធ្លាប់បានដាក់ពង្រាយទាហានសកម្មទៅព្រំដែនដើម្បីជួយដល់បុគ្គលិកល្បាតព្រំដែនដើម្បីទល់ទល់នឹងក្បួនជនចំណាកស្រុកដ៏ធំបន្ថែមពីលើកងកម្លាំងឆ្មាំជាតិដែលកំពុងធ្វើការនៅទីនោះស្រាប់។
នាងហ្សង់ព្យែរបាននិយាយសម្រាលភាពស្រដៀងគ្នាណាមួយរវាងការគ្រប់គ្រងអន្តោប្រវេសន៍របស់លោកបៃដិននិងការប្រើប្រាស់កងទ័ពរបស់លោកត្រាំក្នុងអំឡុងអាណត្តិរបស់គាត់។ នាងបាននិយាយថា “បុគ្គលិកល្បាតរបស់បក្សប្រជាធិបតេយ្យបាននិងកំពុងគាំទ្រ CBP នៅព្រំដែនជិតពីរទសវត្សរ៍មកហើយ។ ដូច្នេះនេះគឺជាទម្លាប់ធម្មតាទេ”៕
លោកបៃដិនដើរកាត់តាមបណ្តោយព្រំដែនអាម៉េរិកនិងម៉ិកស៊ិកត្រង់ចំណុចក្រុងអែលប៉ាសូ រដ្ឋតិចសាស កាលពីថ្ងៃទី ៨ ខែមករា ឆ្នាំ ២០២៣