ប្រែសម្រួលៈបំណង(ដេល្លីម៉េល)៖ រដ្ឋមន្ត្រីការបរទេសចិនបានជួបពិភាក្សាជាមួយប្រមុខយោធាមីយ៉ាន់ម៉ានៅក្នុងរដ្ឋធានីណៃពីដោរកាលពីថ្ងៃអង្គារ ដែលវាកត់សំគាល់ជំនួបរវាងមន្ត្រីជាន់ខ្ពស់បំផុតរបស់ចិនជាមួយឧត្តមសេនីយ៍កំពូលរបស់ប្រទេសនេះចាប់តាំងពីមីយ៉ាន់ម៉ាធ្លាក់ចូលក្នុងភាពវឹកវរក្រោយរដ្ឋប្រហារកាលពីជាងពីរឆ្នាំមុន។
ប្រទេសអាស៊ីអាគ្នេយ៍មួយនេះបាននិងកំពុងកើតមានអំពើហិង្សាប្រដាប់អាវុធចាប់តាំងពីយោធាបណ្តេញរដ្ឋាភិបាលស៊ីវិលរបស់លោកស្រីអ៊ុង សាន ស៊ូជីកាលពីខែកុម្ភៈ ឆ្នាំ២០២១។ចិនដែលជាសម្ពន្ធមិត្តធំមួយនិងជាអ្នកផ្គត់ផ្គង់អាវុធដល់របបយោធាក្នុងប្រទេសនេះ បានបដិសេធមិនព្រមថ្កោលទោសការដណ្តើមអំណាចរបស់ក្រុមយោធាទេ។
យោងតាមសេចក្តីថ្លែងការណ៍មួយចេញពីក្រុមព័ត៌មានរបស់របបយោធាមីយ៉ាន់ម៉ា រដ្ឋមន្ត្រីការបរទេសចិនលោក ឈីន ហ្កាង បានប្រាប់ប្រមុខយោធា មីន អ៊ុង ហ្លាំង ថា«ចិនឈរនៅជាមួយមីយ៉ាន់ម៉ានៅលើឆាកអន្តរជាតិ»។
បើសេចក្តីថ្លែងការណ៍ចេញដោយក្រសួងការបរទេសចិន លោកឈីនបាននិយាយថា«ចិនគាំទ្រគំនិតដែលថាសហគមន៍អន្តរជាតិគួរគោរពអធិបតេយ្យភាពរបស់មីយ៉ាន់ម៉ានិងដើរតួនាទីបែបស្ថាបនាមួយដើម្បីជួយប្រទេសនេះអោយសំរេចបានសន្តិភាពនិងការផ្សះផ្សារជាតិ»។
អ្នកកាន់តែតំណែងមុនលោក គឺលោកវ៉ាង យី បានមកធ្វើទស្សនកិច្ចមីយ៉ាន់ម៉ាកាលពីខែកក្កដា ឆ្នាំមុន ដោយបានជួបសមភាគីមីយ៉ាន់ម៉ា តែមិនបានជួបលោកមីន អ៊ុង ហ្លាំង ទេ។
ប្រព័ន្ធផ្សព្វផ្សាយមីយ៉ាន់ម៉ាបានបង្ហាញលោកឈីន ជួបពិភាក្សាជាមួយលោក មីន អ៊ុង ហ្លាំងនៅក្រុងណៃពីដោរ កាលពីថ្ងៃ២ឧសភា
សេចក្តីថ្លែងការណ៍របស់មីយ៉ាន់ម៉ា បាននិយាយថាអ្នកទាំងពីរបានពិភាក្សា«ទំនាក់ទំនងការទូត កិច្ចសហប្រតិបត្តិការមិត្តភាព សភាពការណ៍ចុងក្រោយនៅមីយ៉ាន់ម៉ា ពាណិជ្ជកម្មតាមព្រំដែន ការវិនិយោគនិងកិច្ចសហប្រតិបត្តិការលើថាមពលនិងអគ្គិសនី»។
លោកឈីន បាននិយាយថារដ្ឋាភិបាលទីក្រុងប៉េកាំងនឹងបន្តគាំទ្រការអភិវឌ្ឍរបស់មីយ៉ាន់ម៉ា ពន្លឿនគំរោងកិច្ចសហការនៅក្នុងរបៀងសេដ្ឋកិច្ចចិន-មីយ៉ាន់ម៉ា(China-Myanmar Economic Corridor)ហើយអនុវត្តគំរោងលើវិស័យកសិកម្ម អប់រំនិងសុខាភិបាល។
រដ្ឋមន្ត្រីការបរទេសចិនក៏បានជួបរដ្ឋមន្ត្រីការបរទេសមីយ៉ាន់ម៉ា ដោយពិភាក្សាអំពីកិច្ចសហប្រតិបត្តិការអន្តរជាតិ។
សូមបញ្ជាក់ថា គំរោងហេដ្ឋារចនាសម្ពន្ធគាំទ្រដោយចិនជាច្រើនស្ថិតនៅមីយ៉ាន់ម៉ាខាងជើងនិងភ្ជាប់ខេត្តយូណានរបស់ចិនដែលមិនជាប់សមុទ្រទៅកាន់មហាសមុទ្រឥណ្ឌា។
រដ្ឋាភិបាលទីក្រុងប៉េកាំងក៏គាំទ្រនិងផ្តល់សព្វាវុធដល់ក្រុមឧទ្ទាមជនជាតិភាគតិចនៅតាមព្រំដែនមីយ៉ាន់ម៉ា នេះបើតាមអ្នកវិភាគ។ក្រុមឧទ្ទាមជនជាតិខ្លះប្រយុទ្ធជាមួយយោធាមីយ៉ាន់ម៉ានៅក្រោយរដ្ឋប្រហារ និងក្រុមឧទ្ទាមស្និទ្ធនឹងចិនមួយកាលពីខែមីនាបានអំពាវនាវអោយចិនជួយបន្ថយវិបត្តិ។
ក្នុងដំណើរទៅកាន់ព្រំដែនចិន-មីយ៉ាន់ម៉ា កាលពីថ្ងៃអង្គារ លោកឈីនបានអំពាវនាវអោយមានកិច្ចសហការនិងមិត្តភាពរវាងប្រទេសទាំងពីរ។
ពួកអ្នកការទូតចិនក៏កំពុងសម្របសម្រួលរវាងមីយ៉ាន់ម៉ានិងបង់ក្លាដែសលើកម្មវិធីមួយសំរាប់ការបញ្ជូនត្រឡប់ជនភៀសខ្លួនរ៉ូហ៊ីងយ៉ាដែលបានភៀសខ្លួនចេញពីមីយ៉ាន់ម៉ាក្រោយការបង្ក្រាបរបស់យោធានៅឆ្នាំ២០១៧។
ក្នុងជំនួបនៅណៃពីដោរ លោកឃីនបានបញ្ជាក់អះអាងឡើងវិញថាចិនគាំទ្រមីយ៉ាន់ម៉ាក្នុងការជំរុញទំនាក់ទំនងជាមួយបង់ក្លាដែស និងថារដ្ឋាភិបាលទីក្រុងប៉េកាំងមានបំណងធ្វើការជាមួយប្រទេសទាំងពីរដើម្បីពង្រីកកិច្ចសហការត្រីភាគី៕