ប្រែសម្រួល : កញ្ញាដាលីស (ប៊ីប៊ីស៊ី) ៖ អង្គការសហប្រជាជាតិបាននិយាយថា មនុស្សជាង ១០០.០០០ នាក់បានភៀសខ្លួនចេញពីប្រទេសស៊ូដង់ចាប់តាំងពីការប្រយុទ្ធគ្នាយ៉ាងសាហាវបានផ្ទុះឡើងរវាងកងកម្លាំងគូប្រជែងកាលពីថ្ងៃទី១៥ខែមេសា។
ក្រុមមន្ត្រីបានព្រមានអំពី “មហន្តរាយពេញទំហឹង” ប្រសិនបើការប្រយុទ្ធគ្នាមិនចប់។
មនុស្ស ៣៣៤.០០០ នាក់ទៀតបានផ្លាស់ទីលំនៅនៅក្នុងប្រទេសស៊ូដង់។
ការប្រយុទ្ធគ្នាកំពុងបន្តនៅក្នុងរដ្ឋធានីកាទុំរវាងកងទ័ពនិងកងកម្លាំងគាំទ្ររហ័ស(RSF) បើទោះបីជាបទឈប់បាញ់បានចូលជាធរមានក៏ដោយ។
កិច្ចខិតខំប្រឹងប្រែងការទូតកំពុងត្រូវបានបង្កើន ដើម្បីព្យាយាមធ្វើឱ្យភាគីជម្លោះចូលមកតុចរចា។
កាលពីថ្ងៃអង្គារទី២ឧសភា ក្រសួងការបរទេសស៊ូដង់ខាងត្បូងបាននិយាយថា កងទ័ពនិងកងជីវពល RSF បានយល់ព្រម “ជាគោលការណ៍” ចំពោះបទឈប់បាញ់ថ្មីរយៈពេល៧ថ្ងៃចាប់ពីថ្ងៃទី ៤ ខែឧសភា ហើយបានសន្យាបញ្ជូនអ្នកតំណាងទៅកាន់កិច្ចចរចា។
សេចក្តីថ្លែងការណ៍របស់ខ្លួនបានធ្វើឡើងមួយថ្ងៃបន្ទាប់ពីបេសកជនពិសេសរបស់អ.ស.បប្រចាំប្រទេសស៊ូដង់ លោក វ៉ុលកឺ ភឺថេស (Volker Perthes) បានប្រាប់ទីភ្នាក់ងារសារព័ត៌មានAP ថា ភាគីទាំងពីរបានយល់ព្រមចរចាបទឈប់បាញ់ “ប្រកបដោយស្ថិរភាពនិងអាចជឿទុកចិត្តបាន”។
លោកបានបន្ថែមថា អារ៉ាប៊ីសាអូឌីតជាកន្លែងដ៏មានសក្តានុពលសម្រាប់កិច្ចចរចា។
ប្រសិនបើការចរចាកើតឡើង វានឹងក្លាយជាជំនួបលើកដំបូងរវាងភាគីទាំងពីរចាប់តាំងពីជម្លោះបានចាប់ផ្តើម។
មនុស្សជាង ៥០០ នាក់ត្រូវបានសម្លាប់ និងជាង ៤.០០០ នាក់បានរងរបួសនៅក្នុងការប្រយុទ្ធគ្នា នេះបើយោងតាមក្រសួងសុខាភិបាលរបស់ស៊ូដង់៕
ការប្រយុទ្ធគ្នាចុងក្រោយនេះបានធ្វើឱ្យវិបត្តិមនុស្សធម៌នៅស៊ូដង់កាន់តែអាក្រក់