ប្រែសម្រួល : កញ្ញាដាលីស (VNExpress) ៖ អាជ្ញាធរក្នុងតំបន់បាននិយាយកាលពីថ្ងៃចន្ទទី៨ឧសភាថា យ៉ាងហោចណាស់មនុស្ស ២១ នាក់បានលង់ទឹកស្លាប់បន្ទាប់ពីទូកមួយបានក្រឡាប់នៅឯទីប្រជុំជនមាត់ឆ្នេរតានួ (Tanur)ក្នុងស្រុកម៉ាឡាបពូរ៉ាម (Malappuram) នៃរដ្ឋកេរ៉ាឡា (Kerala)ភាគខាងត្បូងប្រទេសឥណ្ឌា។
លោក អាប់ឌុល ណាហ្សា (Abdul Nazar)អធិការរងនគរបាលស្រុកម៉ាឡាបពូរ៉ាម បាននិយាយថា ទូកដែលផ្ទុកអ្នកដំណើរមកដីគោកប្រហែល ៤០ នាក់បានក្រឡាប់ ព្រោះវាដឹកហួសចំណុះ។
ប៉ូលិសនិយាយថា ភ្លាមៗគេមិនទាន់ដឹងច្បាស់ថាមានមនុស្សប៉ុន្មាននាក់ទៀតបានស្លាប់នោះទេ ដោយបន្ថែមថា អ្នកដំណើរប្រហែល ១០ នាក់កំពុងសម្រាកព្យាបាលនៅមន្ទីរពេទ្យផ្សេងៗគ្នាហើយមនុស្សជាច្រើនទៀតត្រូវបានបញ្ជូនចេញវិញបន្ទាប់ពីការជួយសង្គ្រោះបឋម។
រដ្ឋមន្ត្រីក្រសួងជលផលនិងអភិវឌ្ឍន៍កំពង់ផែរបស់រដ្ឋកេរ៉ាឡា លោក វី អាប់ឌូរ៉ាហ៊ីម៉ាន់ (V. Abdurahiman)បានប្រាប់អ្នកយកព័ត៌មានថា ចំនួនអ្នកស្លាប់ទំនងជាកើនឡើងខណៈទូកបានជាប់ក្នុងទឹកភក់ ហើយកំពុងត្រូវបានទាញចេញ ដើម្បីជួយសង្គ្រោះអ្នកដែលជាប់នៅខាងក្នុង។
អ្នកនាំពាក្យអាជ្ញាធរគ្រប់គ្រងគ្រោះមហន្តរាយរដ្ឋកេរ៉ាឡា (KSDMA)បានប្រាប់ទីភ្នាក់ងារសារព័ត៌មានរ៉យទ័រថា ហេតុការណ៍នេះបានកើតឡើងនៅវេលាម៉ោង៧យប់នៅស្រុកម៉ាឡាបពូរ៉ាមកាលពីថ្ងៃអាទិត្យ ហើយក្រុមមកពីកងកម្លាំងឆ្លើយតបគ្រោះមហន្តរាយជាតិបានទៅដល់ទីតាំងកើតហេតុហើយ។
នាយករដ្ឋមន្ត្រីឥណ្ឌាលោក ណារិនដ្រា ម៉ូឌី បាននិយាយនៅក្នុងសារ Twitter ថា “ឈឺចិត្តណាស់ចំពោះការបាត់បង់ជីវិតដោយសារគ្រោះថ្នាក់ក្រឡាប់ទូកនៅស្រុកម៉ាឡាបពូរ៉ាម រដ្ឋកេរ៉ាឡា”៕
មនុស្ស២១នាក់ស្លាប់ដោយសារក្រឡាប់ទូកនៅរដ្ឋកេរ៉ាឡាកាលពីយប់ថ្ងៃអាទិត្យ