ប្រែសម្រួល : កញ្ញាដាលីស (ស៊ីនហួ) ៖ កីឡាករបាល់ទាត់អាហ្សង់ទីន និង Paris Saint-Germain លីអូនែល ម៉េសស៊ី បានបន្ថែមពានរង្វាន់ដ៏មានកិត្យានុភាពចំនួនពីរទៀតទៅក្នុងបញ្ជីសមិទ្ធិផលដ៏អស្ចារ្យរួចជាស្រេចរបស់គាត់ ដោយបានឈ្នះពាន Laureus World Sportsman និង World Team of the Year នៅក្នុងពិធីដ៏ធំកាលពីថ្ងៃចន្ទទី៨ឧសភា។
កីឡាករជើងចាស់អាយុ ៣៥ ឆ្នាំ ដែលបានដឹកនាំអាហ្សង់ទីនឈ្នះពានរង្វាន់ World Cup កាលពីឆ្នាំមុននៅប្រទេសកាតា បានក្លាយជាអត្តពលិកដំបូងគេមិនធ្លាប់មានពីមុនមកដែលឈ្នះពានរង្វាន់ទាំងពីរនេះក្នុងឆ្នាំតែមួយ។
អ្នកជិះស្គីសេរីជនជាតិចិន នាង គូ អៃលីង (Gu Ailing) ដែលជាម្ចាស់ជ័យលាភីមេដាយមាសពីរជំនាន់ក្នុងព្រឹត្តិការណ៍កីឡាអូឡាំពិករដូវរងាក្នុងទីក្រុងប៉េកាំងកាលពីឆ្នាំមុន បានឈ្នះពានរង្វាន់ Action Sportsperson of Year។
ម៉េសស៊ី ដែលបានចែករំលែកពាន Laureus World Sportsman ជាមួយល្វីស ហាមីលតុន (Lewis Hamilton) ក្នុងឆ្នាំ២០២០ បានផ្តួលបេក្ខជនផ្សេងទៀត រួមមាន ម្ចាស់ជ័យលាភីតេន្នីស Grand Slam ២១ សម័យ រ៉ាហ្វាអែល ណាដាល់ (Rafael Nadal) ម្ចាស់ជើងឯកពិភពលោក Formula One បច្ចុប្បន្ន ម៉ាក់ វើស្តាបភិន (Max Verstappen) ម្ចាស់កំណត់ត្រាពិភពលោកខាងលោតដោលកម្ពស់ ម៉ុនដូ ឌូផ្លានទីស (Mondo Duplantis) កីឡាករបាល់បោះ ស្តេហ្វិន ឃើរី (Stephen Curry) និងកីឡាករអន្តរជាតិបាល់ទាត់បារាំង ខាយលៀន អិមបាប៉េ (Kylian Mbappe) ដើម្បីឈ្នះពានរង្វាន់នេះជាលើកទីពីរ។
ម៉េសស៊ីបាននិយាយថា “វាជាកិត្តិយសណាស់ ជាពិសេសដោយសារពាន Laureus World Sports Awards ប្រព្រឹត្តទៅនៅឆ្នាំនេះក្នុងទីក្រុងប៉ារីស ជាទីក្រុងដែលស្វាគមន៍ខ្ញុំ និងក្រុមគ្រួសាររបស់ខ្ញុំ។ ខ្ញុំសូមអរគុណមិត្តរួមក្រុមរបស់ខ្ញុំទាំងអស់ មិនត្រឹមតែក្រុមជម្រើសជាតិប៉ុណ្ណោះទេ តែថែមទាំងក្រុម PSG ផងដែរ។ ខ្ញុំមិនបានសម្រេចអ្វីតែម្នាក់ឯងទេ ហើយខ្ញុំពិតជាអរគុណដែលអាចចែករំលែកពានទាំងអស់នេះជាមួយពួកគេ”។
ម៉េសស៊ីស៊ុតបញ្ចូលទីបាន ៧ គ្រាប់ ក្នុងនោះមាន២គ្រាប់នៅវគ្គផ្តាច់ព្រ័ត្រ និងបានឈ្នះពានបាល់មាសនៅប្រទេសកាតាកាលពីខែធ្នូឆ្នាំមុន នៅពេលដែលគាត់បានដឹកនាំក្រុមអាហ្សង់ទីនឈ្នះពាន World Cup ជាលើកទីបី។ ក្រុមបាល់ទាត់បុរសអាហ្សង់ទីនត្រូវបានផ្តល់ជូននូវពានរង្វាន់ World Team of the Year។
ក្រៅពីនេះ កីឡាករវាយតេន្នីសអេស្ប៉ាញ កាឡូស អាល់ការ៉ាស (Carlos Alcaraz) បានឈ្នះពាន Laureus World Breakthrough of the Year កីឡាការិនីជិះស្គីសេរីរបស់ចិន នាង គូ អៃលីង ឈ្នះពាន Laureus World Action Sportsperson និង កីឡាការិនីរត់ប្រណាំងចាម៉ៃកា នាង ស៊ែលលី-អាន ហ្វ្រាសឺ-ព្រីស (Shelly-Ann Fraser-Pryce) ឈ្នះពាន Laureus World Breakthrough of the Year ក្នុងពិធីប្រគល់ពាន Laureus ក្នុងទីក្រុងប៉ារីសកាលពីយប់ថ្ងៃចន្ទ៕
ម៉េសស៊ីនិងអ្នកកីឡាពិភពលោកដៃទៀតឈ្នះពាន Laureus World Sportsman និង World Team of the Year កាលពីយប់ថ្ងៃចន្ទ