ដោយៈសុផល/ភ្នំពេញ៖នាឱកាសជួបសំណេះសំណាលជាមួយកងកម្លាំងប្រដាប់អាវុធប្រចាំទិសទី១ ទី២ និងទី៣ កាលពីថ្ងៃទី០៨ ខែឧសភា ឆ្នាំ២០២៣ ក្រៅពីការនាំយកអាវភ្លៀង និងសម្ភារសំខាន់ៗជូនបងប្អូនកងកម្លាំង ឯលោក ហ៊ុន ម៉ានី បានមានប្រសាសន៍សំណេះសំណាលជាមួយកងកម្លាំងនិងរំលឹកឡើងវិញពីការយកចិត្តទុកដាក់របស់រាជរដ្ឋាភិបាលកម្ពុជាលើគ្រប់វិស័យរួមទាំងវិស័យសេដ្ឋកិច្ច ដែលបានរីកដុះដាលឡើងវិញ ក្រោមម្លប់សុខសន្តិភាព។
លោកបានបន្តថា សមិទ្ធផលនៃការអភិវឌ្ឍហេដ្ឋារចនាសម្ព័ន្ធ ក៏ដូចជាការទាក់ទាញវិនិយោគទុនជាបន្តបន្ទាប់ កើតចេញពីការដឹកនាំប្រកបដោយទស្សនវិស័យវែងឆ្ងាយ និងមានការគិតគូរខ្ពស់ដល់ប្រជាជនជាធំ។ ភាពរីកចម្រើននៃសេដ្ឋកិច្ច នឹងផ្តល់មកនូវឱកាសការងារ ក៏ដូចជាការតម្លើងប្រាក់បៀវត្សរ៍មន្រ្តីរាជការជាពិសេសកងកម្លាំងប្រដាប់អាវុធ នេះហើយជាគោលដៅអាទិភាពរបស់ប្រមុខរាជរដ្ឋាភិបាល។
ផ្សាភ្ជាប់ជាមួយនឹងការលើកឡើងខាងលើ លោកបានគូសបញ្ជាក់ទៅកាន់កងកម្លាំងថា «សូមឱ្យកងកម្លាំងគ្រប់រូបបន្តជឿជាក់លើការដឹកនាំរបស់រាជរដ្ឋាភិបាលកម្ពុជា ព្រោះថាអ្វីៗដែលរដ្ឋាភិបាលបាននឹងកំពុងអនុវត្តគឺដើម្បីកម្ពុជារស់នៅប្រកបដោយភាពសំបូរសប្បាយ និងលើកកម្ពស់ជីវភាពប្រជាពលរដ្ឋជាលំដាប់ ជាពិសេស ជីវភាពរបស់កងកម្លាំង និងគ្រួសារ»។
ជាមួយគ្នានេះលោក ហ៊ុន ម៉ានី ក៏បានបន្ថែមទៀតថា កងកម្លាំងប្រដាប់អាវុធ បានដើរតួរយ៉ាងសំខាន់ក្នុងការការពារសុខសន្តិភាពនិងធ្វើយ៉ាងណាមិនឱ្យប្រជាជនរស់នៅក្នុងភាពភ័យខ្លាច។ កងកម្លាំងបានត្រៀមខ្លួនជានិច្ចក្នុងការការពារទោះក្នុងកាលៈទេសៈណាក៏ដោយ។
សូមជម្រាបដែរថា កម្មវិធីចែកអាវភ្លៀងនៅតាមគណៈបញ្ជាការឯកភាពប្រចាំទិសទី១ ទី២ និងទី៣គឺជាការបង្ហាញយ៉ាងជាក់ច្បាស់ពីការយកចិត្តទុកដាក់របស់ថ្នាក់នាំកំពូលកម្ពុជាដែលតែងតែខ្វល់ខ្វាយពីសុខទុក្ខរបស់កងកម្លាំងដែលឈរជើងតាមបន្ទាត់ព្រំដែន៕/R
