ប្រែសម្រួលៈបំណង(ស្ត្រេតថែមស៍)៖ បារាំងកាលពីថ្ងៃពុធបាននិយាយថា ចិនមានតួនាទីសំខាន់មួយសំរាប់«សន្តិភាពនិងស្ថិរភាពសកលលោក»នៅពេលរដ្ឋាភិបាលទីក្រុងប៉េកាំងស្វះស្វែងសម្របសម្រួលអោយមានការចរចាបញ្ចប់សង្គ្រាមនៅអ៊ុយក្រែន។
រដ្ឋមន្ត្រីការបរទេសចិនលោក ឈីន ហ្កាង កំពុងធ្វើទស្សនកិច្ចអាល្លឺម៉ង់ បារាំងនិងន័រវ៉េសនៅសប្តាហ៍នេះ និងបានជួបសមភាគីបារាំង កាតរីន កូឡូនណា(Catherine Colonna)កាលពីថ្ងៃពុធនៅទីក្រុងប៉ារីស។
លោកស្រី កូឡូនណា បានប្រាប់លោកឈីននៅពេលចាប់ផ្តើមកិច្ចប្រជុំថា «យើងដឹងអំពីសារសំខាន់នៃតួនាទីរបស់ចិននៅលើឆាកអន្តរជាតិ និងតួនាទីដ៏សំខាន់ដែលចិនអាចធ្វើសំរាប់សន្តិភាពនិងស្ថិរភាពសកល។ចិនគួរធ្វើការបញ្ចុះបញ្ចូលរុស្ស៊ីអោយងាកមកគោរពធម្មនុញ្ញរបស់អង្គការសហប្រជាជាតិអោយពេញលេញឡើងវិញ …»។
រដ្ឋមន្ត្រីការបរទេសបារាំងមុននេះបានប្រាប់កិច្ចប្រជុំគណៈរដ្ឋមន្ត្រីមួយថា រដ្ឋាភិបាលទីក្រុងប៉េកាំងគួរទទូចសុំរុស្ស៊ីអោយ«វិលមករកសន្តិភាព»វិញនិងថា«វាចាំបាច់ដែលចិនប្រើទំនាក់ទំនងរបស់ខ្លួនជាមួយរុស្ស៊ីដើម្បីអោយរដ្ឋាភិបាលទីក្រុងមូស្គូយល់កាន់តែប្រសើរថា វាជាការទាល់ច្រកមួយ និងប្រាប់រុស្ស៊ីថាឈប់ធ្វើរឿងឆ្គួតៗ»។
សំណើនេះធ្វើឡើងក្រោយប្រធានាធិបតីបារាំងបានទៅធ្វើទស្សនកិច្ចចិនកាលពីខែមុន។លោកបានបង្កភាពប្រទូសរ៉ាយដោយនិយាយថា អឺរ៉ុបមិនគួរធ្វើជាបរិវារបស់អាម៉េរិក ឬចិន ឬក៏ធ្វើខ្លួនអោយជាប់ក្នុងជម្លោះណាមួយអំពីអនាគតកោះតៃវ៉ាន់។
សម្តីនេះបានបង្កការរិះគន់ចេញពីសម្ពន្ធមិត្ត រួមមានរដ្ឋមន្ត្រីការពារជាតិអាល្លឺម៉ង់ ដែលបានហៅពាក្យសម្តីទាំងនេះថា«គ្រោះកាច»និងថា«យើងមិនដែលស្ថិតក្នុងស្ថានភាពក្លាយជាខ្ញុំកញ្ជះអាម៉េរិកម្តងណាឡើយ»។
ចិនព្យាយាមពណ៌នាខ្លួនជាភាគីអព្យាក្រិតមួយនៅក្នុងសង្គ្រាមអ៊ុយក្រែនដោយអត់ធ្មត់មិនថ្កោលទោសទង្វើរបស់រុស្ស៊ីលើប្រទេសក្បែរខាងខ្លួន និងកាលពីខែមុនប្រធានាធិបតីចិនបានសន្ទនាតាមទូរស័ព្ទជាមួយមេដឹកនាំអ៊ុយក្រែនជាលើកដំបូងចាប់តាំងពីរុស្ស៊ីបញ្ជូនទ័ពចូលអ៊ុយក្រែនក្រោយពីរដ្ឋាភិបាលទីក្រុងប៉េកាំងដាក់ចេញផែនការសន្តិភាពមួយសំរាប់អ៊ុយក្រែន៕
លោកស្រី កូឡូនណាបានប្រាប់លោកឈីនថា លោកស្រីក៏មានបំណងពិភាក្សាបញ្ហាកូរ៉េខាងជើងជាមួយសមភាគីចិនផងដែរ