ប្រែសម្រួល : កញ្ញាដាលីស (ដេល្លីម៉េល) ៖ ប្រជាជនអាហ្វ្រិកខាងត្បូងបានខឹងសម្បានិងងឿងឆ្ងល់ជាខ្លាំងកាលពីថ្ងៃសុក្រទី១២ឧសភាបន្ទាប់ពីសហរដ្ឋអាម៉េរិកបានចោទប្រកាន់ប្រទេសរបស់ពួកគេថាបានដឹកជញ្ជូនអាវុធដោយសម្ងាត់ឱ្យទៅរុស្ស៊ី ជាការចោទប្រកាន់មួយដែលបង្កឱ្យមានការស្តីបន្ទោសទាំងរដ្ឋាភិបាលប៉ុន្តែនាំឱ្យមានការប្រកាសអំពីការស៊ើបអង្កេតផងដែរ។
ឯកអគ្គរដ្ឋទូតអាម៉េរិក លោក រូបិន ព្រីជេទី (Reuben Brigety) កាលពីថ្ងៃព្រហស្បតិ៍បាននិយាយថា រដ្ឋាភិបាលក្រុងវ៉ាស៊ីនតោនមានទំនុកចិត្តថាសព្វាវុធនិងគ្រាប់ត្រូវបានដឹកតាមនាវាដឹកទំនិញរបស់រុស្ស៊ី ដែលចូលចតនៅមូលដ្ឋានទ័ពជើងទឹកខេបថោន (Cape Town)កាលពីខែធ្នូ។
ការលើកឡើងដ៏កក្រើកនេះបានទាញការឆ្លើយតបយ៉ាងខឹងសម្បាពីប្រធានាធិបតី ស៊ីរីល រ៉ាម៉ាហ្វូសា (Cyril Ramaphosa) ដែលមិនបានបដិសេធការចោទប្រកាន់នេះទេ ប៉ុន្តែនិយាយថា ចៅក្រមចូលនិវត្តន៍ម្នាក់នឹងដឹកនាំការស៊ើបអង្កេតលើបញ្ហានេះ។
រឿងរ៉ាវទាំងនេះក៏ត្រូវបានចាក់សាំងដុតបន្ថែមដោយវិមានក្រឹមឡាំងផងដែរ ដែលកាលពីថ្ងៃសុក្របាននិយាយថា ប្រធានាធិបតីរុស្ស៊ីលោក វ្ល៉ាឌីមៀ ពូទីនបានយល់ព្រមក្នុងការធ្វើឱ្យទំនាក់ទំនងកាន់តែស៊ីជម្រៅជាមួយលោករ៉ាម៉ាហ្វូសា។
អាហ្វ្រិកខាងត្បូងបានចាក់ខ្សែកណ្តាលយ៉ាងប្រយ័ត្នប្រយែងផ្នែកការទូតជុំវិញការឈ្លានពានរបស់រុស្ស៊ីលើអ៊ុយក្រែន ដែលខ្លួនបដិសេធមិនថ្កោលទោសទេ ដោយនិយាយថាខ្លួនចង់បានការសន្ទនាដើម្បីបញ្ចប់សង្គ្រាមជាង។
ប្រទេសនេះមានទំនាក់ទំនងសេដ្ឋកិច្ចនិងពាណិជ្ជកម្មរឹងមាំជាមួយសហរដ្ឋអាម៉េរិកនិងអឺរ៉ុប។ ពាណិជ្ជកម្មជាមួយរុស្ស៊ីមានទំហំតូចជាង ប៉ុន្តែរដ្ឋាភិបាលក្រុងប្រេតូរីយ៉ា (Pretoria) មានទំនាក់ទំនងជាមួយរដ្ឋាភិបាលក្រុងមូស្គូតាំងពីរាប់ទសវត្សរ៍មុន គឺតាំងពីពេលដែលវិមានក្រឹមឡាំងបានគាំទ្រគណបក្សសមាជជាតិអាហ្វ្រិក (ANC) ក្នុងការតស៊ូប្រឆាំងនឹងការរើសអើងជាតិសាសន៍។
ការប្រកាសអំពីការស៊ើបអង្កេតត្រូវបានស្វាគមន៍ដោយសហរដ្ឋអាម៉េរិក ប៉ុន្តែបានជួបនឹងការសើចចម្អកនិងការងឿងឆ្ងល់នៅក្នុងស្រុក។
លោក ដានៀល ស៊ីល (Daniel Silke) អ្នកវិភាគនយោបាយនិងសេដ្ឋកិច្ចបានប្រាប់ទីភ្នាក់ងារសារព័ត៌មាន AFP ថា “វាប្រហែលចង្អុលបង្ហាញថាប្រធានាធិបតីអាហ្វ្រិកខាងត្បូងអត់ដឹងថាមានរឿងអ្វីកើតឡើងសោះក្រោមការដឹកនាំរបស់គាត់”៕
ប្រធានាធិបតីអាហ្វ្រិកខាងត្បូង លោក ស៊ីរីល រ៉ាម៉ាហ្វូសា