ប្រែសម្រួល : កញ្ញាដាលីស (ស្ត្រេតថែមស៍) ៖ កាលពីព្រឹកថ្ងៃចន្ទទី៨ឧសភា កីឡាករទ្រីយ៉ាត្លុងជម្រើសជាតិសិង្ហបុរី ប្រាយស៍ ចុង (Bryce Chong) បានឈរលើឆ្នេរកែប បេះដូងលោតញាប់ និង ញើសបែកពេញបាតដៃ។
ទោះយ៉ាងណា វាមិនមែនជាការប្រកួតទេ ដែលធ្វើឱ្យរូបគេភ័យ។ ផ្ទុយទៅវិញ កីឡាករវ័យ ២៦ ឆ្នាំរូបនេះមានកិច្ចការគួរឱ្យភ័យខ្លាចមួយទៀតត្រូវសម្រេចក្រោយចប់ការប្រកួតស៊ីហ្គេមវគ្គផ្តាច់ព្រ័ត្រតែប៉ុន្មានម៉ោង នោះគឺការសុំរៀបការជាមួយមិត្តស្រីយូរអង្វែង នាង សឺរីល ហ្វ៊ូ (Sheryl Foo)។
ហើយបន្ទាប់មកគឺមានទឹកភ្នែករីករាយនិងការអបអរចំពោះគូស្នេហ៍នេះ ខណៈនាងហ្វ៊ូអាយុ២៦ឆ្នាំបាននិយាយយល់ព្រមរៀបការនៅចំពោះមុខមិត្តរួមក្រុមនិងមិត្តភក្ដិដែលបានមកជួបជុំគ្នាដើម្បីធ្វើជាសាក្សីក្នុងឱកាសដ៏សំខាន់នេះ។
លោកចុង ដែលឈ្នះមេដាយសំរឹទ្ធស៊ីហ្គេមលើកដំបូងសម្រាប់សិង្ហបុរីក្នុងប្រទេសកម្ពុជាក្នុងវិញ្ញាសាហែលទឹកបុរសទ្រីយ៉ាត្លុងកាលពីថ្ងៃសៅរ៍និងបញ្ចប់ក្នុងចំណាត់ថ្នាក់ទីប្រាំក្នុងវិញ្ញាសាទ្រីយ៉ាត្លុងកាលពីថ្ងៃចន្ទបាននិយាយថា ការសុំរៀបការគឺ “តានតឹង” ជាងការប្រកួត ១០ ដង។
លោកបានបន្ថែមថា “គ្រប់គ្នាបានសម្លឹងមកខ្ញុំ ហើយបានដឹងរួចទៅហើយនូវអ្វីដែលនឹងកើតឡើង ប៉ុន្តែនៅពេលដែលពេលវេលានោះមកដល់ អ្នកត្រូវតែធ្វើអ្វីគ្រប់យ៉ាងឱ្យបានត្រឹមត្រូវ ហើយអ្នកមិនចង់មានកំហុសនោះឡើយ។ ខ្ញុំគិតចង់ធ្វើវានៅកន្លែងប្រារព្ធពិធីប្រគល់មេដាយ ប៉ុន្តែខ្ញុំគិតថាវានឹងមានមនុស្សច្រើនពេក”។
“វាពិតជាល្អណាស់ក្នុងការធ្វើវានៅចំណុចចាប់ផ្តើមនៃកីឡាទ្រីយ៉ាត្លុងនៅមាត់ឆ្នេរ ព្រោះវាបង្ហាញពីការចាប់ផ្តើមទៅកាន់ដំណាក់កាលមួយទៀតនៅក្នុងជីវិតរបស់យើងទាំងពីរ”៕
លោកចុងសុំនាងហ្វ៊ូរៀបការកាលពីថ្ងៃចន្ទ