​ប្រែ​សម្រួល : កញ្ញា​ដា​លី​ស (CNA) ៖ នាយករដ្ឋមន្ត្រី​កំពុងកាន់​អំណាច​របស់​ថៃ លោក ប្រា​យុទ្ធ ចាន់​អូ​ចា នឹង​ប្រជែង​ការបោះឆ្នោត​ថ្ងៃទី ១៤ ខែ​ឧសភា ក្រោម​គណបក្ស​ផ្សេង​គឺ គណបក្ស​រួបរួម​ជាតិ​ថៃ បន្ទាប់​ពី​ចែកផ្លូវ​ជាមួយ​គណបក្ស​កាន់អំណាច ផា​ឡាង​ប្រា​ឆា​រ៉ាត់ (Palang Pracharat) ដែល​បាន​ដាក់​គាត់​ជា​ជម្រើស​របស់​ពួកគេ​សម្រាប់​ការងារ​កំពូល​របស់​ប្រទេស​ក្នុង​ឆ្នាំ ២០១៩​។

​ប៉ុន្តែ​បើ​ទោះជា​គាត់​ត្រឡប់​មក​កាន់​តំណែង​វិញ​ក៏ដោយ ក៏​បុរស​អាយុ ៦៩ ឆ្នាំ​រូប​នេះ​អាច​បម្រើ​ការងារ​បាន​តែ​ពីរ​ឆ្នាំ​ប៉ុណ្ណោះ មុន​ពេល​គាត់​ឈាន​ដល់​ដែន​កំណត់​អាណត្តិ​របស់​គាត់​។​

​អតីត​មេទ័ព​ថៃ​រូបនេះ​បាន​ដឹកនាំ​ប្រទេស​ថៃ​អស់​រយៈពេល​ជាង​ប្រាំបី​ឆ្នាំ ចាប់​តាំងពី​គាត់​បាន​ទម្លាក់​រដ្ឋាភិបាល​ស៊ីវិល​ក្នុង​រដ្ឋប្រហារ​ឆ្នាំ ២០១៤​។​

– នាយករដ្ឋមន្ត្រី​ប្រា​យុទ្ធ​ព្យាយាម​បន្ទន់​រូបភាព​

​ខណៈ​គាត់​តស៊ូ​ដើម្បី​បន្ត​ធ្វើ​ជា​មេដឹកនាំ​ប្រទេស ឧត្តមសេនីយ៍ប្រា​យុទ្ធបា​ន​ប្រឹងប្រែង​ឱ្យ​គេ​អាច​មើល​ឃើញ​គាត់​ជា​ញឹកញាប់​និង​អាច​ប្រាស្រ័យ​ទាក់ទង​បាន​ក្នុងអំឡុង​យុទ្ធនាការ​បោះឆ្នោត​។ គាត់​បាន​​ទម្លាក់​ចុះ​អាកប្បកិរិយា​ជា​បុរស​ខ្លាំង​ខាង​យោធា​ទៅ​ធ្វើ​រឿង​មិន​នឹកស្មាន​ដល់​មួយ​ចំនួន​កាលពី​ប៉ុន្មាន​ខែ​មុន ដូចជា ការ​យក​កាំភ្លើង​បាញ់​ទឹក​បាញ់​គ្នា​នៅលើ​ផ្លូវខៅសា​នក្នុងពេល​បុណ្យចូលឆ្នាំ​ថៃ​។​

​ការបង្ហាញ​មុខមាត់​ដែល​មាន​អារម្មណ៍ល្អ​បែប​នេះ​ក៏​បង្ហាញ​ដែរ ថា​តើ​គណបក្ស​រួបរួម​ជាតិ​ថៃ​ជឿជាក់​កម្រិតណា​ថា​គាត់​នឹង​ស្រូប​យក​សន្លឹកឆ្នោត​សម្រាប់​ពួកគេ​។​

​នៅក្នុង​ការបោះឆ្នោត​មួយ ដែល​គូ​ប្រជែង​របស់​គាត់​កំពុង​កេងចំណេញ​លើ​បំណងប្រាថ្នា​របស់​អ្នកបោះឆ្នោត​សម្រាប់​ការផ្លាស់ប្តូរ មេដឹកនាំ​រដ្ឋប្រហារ​យោធា​ប្រែក្លាយ​ជា​អ្នកនយោបាយ​ពេញ​ម៉ោង​រូបនេះ​​កំពុង​ជំរុញ​ឱ្យ​ប្រជាជន​ថៃ​ជ្រើសរើស​យក​ភាព​ជា​ប់លាប់​។​

​ឧត្តមសេនីយ៍ប្រា​យុទ្ធ ដែល​បាវចនា​យុទ្ធនាការ​របស់គាត់​មានន័យថា “​ធ្វើ​រួច កំពុង​បន្ត​ធ្វើ​ទៀត នឹង​បន្ត​ធ្វើ​ទៀត​” បាន​និយាយថា “​យើង​បាន​មកដល់​ផ្លូវ​វែងឆ្ងាយ​ហើយ​។​យើង​មិន​អាច​ត្រឡប់​ទៅ​​កន្លែង​ដែល​យើង​បាន​ចាប់ផ្តើម​ទេ​។ យើង​មាន​ឱកាស​តែមួយ​គត់​នៅ​ពេល​នេះ ដែល​អ្វីៗ​កំពុង​ចង្អុល​ទៅកាន់​ចំណុចកំពូល​”​។​

“​មិន​ថា​មាន​អ្វី​កើត​ឡើង​នៅ​កន្លែង​ផ្សេង​នោះឡើយ ថៃ​ត្រូវ​តែ​ជា​ទឹកដី​នៃ​សុភមង្គល​។ ប្រជាជន​ថៃ​ត្រូវតែ​រួបរួម​គ្នា​”​។​

​រដ្ឋប្រហារ​យោធា​ក្នុង​ឆ្នាំ ២០១៤ គឺជា​ការចាប់ផ្តើម​នៃ​រជ្ជកាល​នយោបាយ​របស់​ឧត្តមសេនីយ៍ប្រា​យុទ្ធខ​ណៈ​មេទ័ព​រូបនេះ​បាន​ផ្តួលរំលំ​រដ្ឋាភិបាលជាប់​ឆ្នោត​តាម​លទ្ធិប្រជាធិបតេយ្យរ​បស់​អតីត​នាយក​​រដ្ឋមន្ត្រី​ថៃ យី​ង​ឡាក់ ស៊ីណា​វ៉ាត់​។​

​រដ្ឋាភិបាល​យោធា ដែល​លោក​មើល​ការខុសត្រូវ ក៏​បាន​ត្រួតពិនិត្យ​លើ​ការសរសេរ​រដ្ឋធម្មនុញ្ញ​ថ្មី​ផង​ដែរ ដែល​អនុញ្ញាត​ឱ្យ​គាត់​ឈរឈ្មោះ​ក្នុង​ការបោះឆ្នោត​ឆ្នាំ ២០១៩​និង​បន្ត​បម្រើ​ការងារ​ចាប់​ពី​ពេល​​នោះមក​។​ប៉ុន្តែ​ត្បិត​ផ្លាស់​ប្តូរ​ពី​ឯកសណ្ឋាន​យោធា​ទៅ​ជា​ឈុត​អាវធំ​ក្រោយ​ទទួលបាន​តំណែង​នាយករដ្ឋមន្ត្រី​ក្នុងនាម​ជា​បេក្ខជន​របស់​បក្ស​ផា​ឡាង​ប្រា​ឆា​រ៉ាត់​ក៏​គាត់​កម្រ​ចូលរួម​ក្នុង​នយោបាយ​របស់​​បក្ស​នោះ​ដែរ​។​

– ជម្លោះ​ក្នុង​បក្ស​កាន់​អំណាច​

​គាត់​បាន​ទុក​អោយ​ឧបនាយករដ្ឋមន្ត្រី​និង​ជា​ឧត្តមសេនីយ៍​យោធា​លោក ប្រា​វីត វ៉ង់​ស៊ូ​វ៉ាន់ (Prawit Wongsuwan)​ដែល​ជា​ប្រធាន​បក្ស​ដើម្បី​ដោះស្រាយ​ជាមួយនឹង​ការបែកបាក់​ក្នុង​បក្ស​កាន់​អំ​​ណា​ច​។ ប៉ុន្តែ​ជម្លោះ​ឥតឈប់ឈរ​រវាង​មនុស្ស​ក្នុង​ក្រុម​ដែល​គាំទ្រ​និង​ប្រឆាំង​លោក​ប្រា​យុទ្ធ​បាន​នាំឱ្យ​មាន​ប្រេះឆា​ហើយ​នៅ​ទីបំផុត​នាំទៅ​ដល់​ការបែកបាក់​។​

​បន្ទាប់មក ឧត្តមសេនីយ៍ប្រា​យុទ្ធបា​ន​សម្រេចចិត្ត​ប្តូរ​គណបក្ស ហើយ​ប្តេជ្ញាចិត្ត​ថា​នឹង​ប្រឹងប្រែង​ជាប់ឆ្នោត​ឡើងវិញ​។​

​គណបក្ស​រួបរួម​ជាតិ​ថៃ​ត្រូវបាន​បង្កើតឡើង​ដោយ​ទីប្រឹក្សា​ជិតស្និទ្ធ​បំផុត​របស់​គាត់​កាលពី​ពីរ​ឆ្នាំមុន គឺ​មុនពេល​ដែល​ការបែកបាក់​ក្នុង​រដ្ឋាភិបាល​ត្រូវបាន​បង្ហាញ​ជា​សាធារណៈ​។​

​បញ្ហា​ប្រឈម​ដំបូង​គឺ​ត្រូវ​ឱ្យ​អ្នកបោះឆ្នោត​ដឹងថា នាយករដ្ឋមន្ត្រី រហស្សនាម “​លោកពូ​ទូ​” ឥឡូវ​នេះ​កំពុង​ស្ថិត​ក្រោម​បដា​គណបក្ស​ថ្មី​។​

​ទោះយ៉ាងណា នោះ​បាន​ចោទ​ជា​សំណួរ​ថា​តើ​សមិទ្ធផល​របស់​រដ្ឋាភិបាល​កន្លងមក​ជា​របស់​គ​ណ​បក្ស​ណា​?

​អគ្គលេខាធិការ​បក្ស​រួបរួម​ជាតិ​ថៃ​លោក អាកា​ណាត ព្រំ​ផាន (Akanat Promphan) ជឿថា ចម្លើយ​គឺ​គេ​ដឹង​ច្បាស់​អស់ហើយ​៕

​លោក​ប្រា​យុទ្ធ​កំពុង​បន្ទន់​មុខមាត់​ដើម្បី​ទាក់ទាញ​សំឡេងឆ្នោត