ប្រែសម្រួលៈបំណង(ដេល្លីម៉េល)៖ មនុស្សយ៉ាងហោចណាស់ប្រាំមួយនាក់ ត្រូវបានសម្លាប់ក្នុងអគ្គិភ័យនៅសណ្ឋាគារកំពស់បួនជាន់មួយកាលពីដើមថ្ងៃអង្គារទី១៦ឧសភាក្នុងរដ្ឋធានីរបស់ប្រទេសនូវែលសេឡង់ ដោយមនុស្សជាច្រើននាក់ទៀតត្រូវបានជួយសង្គ្រោះចេញពីដំបូលអាគារ។
គេអាចមើលឃើញអណ្តាតភ្លើងនិងផ្សែងដ៏ក្រាស់ហុយចេញពីតាមមាត់បង្អួចជាន់លើៗនៃសណ្ឋាគារឡូហ្វើ ឡច់(Loafers Lodge)ក្នុងរដ្ឋធានីវែលីងតោន(Wellington)នៅពេលយប់ នៅពេលអ្នកពន្លត់អគ្គិភ័យ៨០នាក់និងឡានទឹកចំនួន២០ចូលរួមក្នុងប្រតិបត្តិការពន្លត់ភ្លើង។
ផ្នែកសេវាគ្រាអាសន្នបាននិយាយថា មនុស្សជាច្រើនបានស្លាប់នៅក្នុងសណ្ឋាគារមាន៩២បន្ទប់នេះនិងមនុស្ស៥២នាក់ត្រូវបានជួយសង្គ្រោះ។
ក្នុងពេលជាមួយគ្នា នាយករដ្ឋមន្ត្រី គ្រីស ហ៊ីបឃីនស៍(Chris Hipkins)បាននិយយាថា មនុស្សយ៉ាងតិចប្រាមួយនាក់បានស្លាប់ តែចៅហ្វាយក្រុងបាននិយាយថា វាអាចកើនឡើងដោយសារនៅមានមនុស្សបាត់ខ្លួនជាច្រើននាក់។លោកនាយករដ្ឋមន្ត្រីបានពណ៌នាអគ្គិភ័យនេះថាជា«សោកនាដកម្ម»មួយ។
ពួកអ្នកពន្លត់ភ្លើងបានប្រើរថយន្តបំពាក់ជណ្តើរដើម្បីសង្គ្រោះមនុស្សចេញពីដំបូលអាគារ។មនុស្សប្រមាណ៩០នាក់បានស្ថិតនៅក្នុងសណ្ឋាគារនេះនៅពេលអគ្គិភ័យបានចាប់ផ្តើម៕
បុគ្គលិកអគ្គិភ័យនៅក្រៅសណ្ឋាគារដែលឆេះកាលពីថ្ងៃអង្គារក្នុងក្រុងវែលីងតោន