ដោយៈសុផល/ភ្នំពេញ៖ គម្រោងសាងសង់ហេដ្ឋារចនាសម្ព័ន្ធផ្លូវល្បឿនលឿន តភ្ជាប់ពីរាជធានីភ្នំពេញទៅក្រុងបាវិត និងស្ពានតភា្ជប់ នឹងប្រកាសក្នុងពេលឆាប់ៗខាងមុខនេះ ខណៈភាគីពាក់ព័ន្ធកំពុងសកម្មក្នុងរឿងនេះ។
កិច្ចប្រជុំក្រុមការងារត្រៀមរៀបចំពិធីបើកការដ្ឋានគម្រោងសាងសង់ហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពី រាជធានីភ្នំពេញទៅក្រុងបាវិត និងស្ពានតភា្ជប់ បានត្រូវធ្វើឡើងកាលពីថ្ងៃទី១៥ខែឧសភាក្នុងគោលបំណងបែងចែកតួនាទី និងភារកិច្ចជូនដល់សមាជិក សមាជិកាក្រុមការងារ។
លោក ស៊ុន ចាន់ថុល រដ្ឋមន្ត្រីក្រសួងសារធារណការនិងដឹកជញ្ជូនធ្លាប់បានឱ្យដឹងថា ផ្លូវល្បឿនលឿនភ្នំពេញ-បាវិត នឹងបើកការដ្ឋានសាងសង់នៅថ្ងៃទី៧ ខែមិថុនា ដែលគ្រោងចំណាយទឹកប្រាក់ ១. ៤០០លានដុល្លារអាមេរិក។ នេះជាផ្លូវល្បឿនលឿនទីពីរនៅក្នុងប្រទេសកម្ពុជាមានប្រវែង ១៣៥ គីឡូម៉ែត្រ ខណៈផ្លូវគ្រោងស្ថាបនានេះគឺជាផ្លូវថ្មីទាំងស្រុង ដែលត្រូវសាងសង់ជា ៤ គន្លង និងតួផ្លូវមានទទឹង ២៥,៥ម៉ែត្រ។ ផ្លូវមួយខ្សែនេះនឹងចាប់ផ្ដើមចេញពីភ្នំពេញនៅចំណុចផ្លូវក្រវាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម៕ P / N
