ដោយ : ភ្នំស្វាយ / បន្ទាយមានជ័យៈ នាព្រឹកទី១៦ ខែឧសភា ឆ្នាំ២០២៣ នៅឃុំគំរូ ស្រុកថ្មពួក ខេត្តបន្ទាយមានជ័យ អតីតយុទ្ធជនកម្ពុជាខេត្តបន្ទាយមានជ័យ ចំនួន៥៣៨នាក់ បានទទួលនូវពិធីសំណេះសំណាលនិងបំពាក់គ្រឿងឥស្សរិយយសជូនជាលើកទី២ ក្រោមអធិបតីភាព លោក គន់ គីម ទេសរដ្ឋមន្រ្តី អនុប្រធាននិងជាអគ្គលេខាធិការសមាគមអតីតយុទ្ធជនកម្ពុជា ។
លោកឧត្តមសេនីយ៍ត្រី ជីម ប៊ុនអាន ប្រធានសមាគមអតីតយុទ្ធជនកម្ពុជាខេត្ត បានឲ្យដឹងថា នេះជាលើកទី២ហើយ ដែល សមាគមអតីតយុទ្ធជនកម្ពុជាខេត្ត បានធ្វើពិធីនេះជូនអតីតយុទ្ធជន បន្ទាប់ពីឆ្នាំ២០១៨ ។
លោកបានបន្តថា ខេត្តនឹងរៀបចំពិធីនេះសម្រាប់អតីតយុទ្ធជនចំនួន ៥.៤៩៥នាក់ទូទាំងខេត្តបន្ទាយមានជ័យ ក្នុងនោះមានមេដាយថ្នាក់ អស្សឫទ្ធិ ចំនួន ១៣ នាក់, មេដាយថ្នាក់មាស ចំនួន ៦៩៧ នាក់និង មេដាយថ្នាក់ ប្រាក់ ចំនួន ៤.៧៨៥ នាក់។ ដោយឡែក សម្រាប់ស្រុកថ្មពួក នាពេលនេះមានចំនួន ៥៣៨ នាក់ ក្នុងនោះមានមេដាយអស្សឫទ្ធី ចំនូន ១ នាក់ មេដាយថ្នាក់មាស ចំនួន ៧៦ នាក់មេដាយ ប្រាក់ ចំនួន ៤៦១ នាក់ ។
គិតត្រឹមខែ ឧសភា ឆ្នាំ២០២៣ មានអតីតយុទ្ធជន និងគ្រួសារអតីតយុទ្ធជនកំពុងគ្រប់គ្រង ចំនួន ៦.៤៤៨នាក់ និងអ្នកក្នុងបន្ទុក ៨.៦៦១ ក្នុងនោះមាន : -គ្រួសារជនពលី -គ្រួសារជនមរណៈ -និវត្តជនយោធិន- និវត្តជននគរបាល -ជនបាត់បង -ជនពិការ។
នាឱកាសនោះ លោក គន់ គីម បានសំដែងនូវការកោតសរសើរដោយស្មោះ ព្រមជាមួយនៅការដឹងគុណចំពោះនាយទាហាន ពលទាហាននិងកងកម្លាំងប្រដាប់អាវុធទាំងអស់ដែលបានខិតខំបំពេញភារកិច្ចការពារជាតិមាតុភូមិនៃយើង និងថ្លែងអំណរគុណចំពោះថ្នាក់ដឹកនាំខេត្ត ព្រមទាំងកងកម្លាំងប្រដាប់អាវុធទាំងអស់ ក៏ដូចជាអាជ្ញាធរមូលដ្ឋានគ្រប់លំដាក់ថ្នាក់ ក្នុងការចូលរួមចំណែកអភិវឌ្ឍន៍មូលដ្ឋាន លើគ្រប់វិស័យ ជាពិសេស ក្នុងការជួយដោះស្រាយទុក្ខលំបាករបស់អតីតយុទ្ធជនកម្ពុជា៕/R
