ប្រែសម្រួល : កញ្ញាដាលីស (ដេល្លីម៉េល) ៖ ចំនួនអ្នកស្លាប់នៅក្នុងប្រទេសមីយ៉ាន់ម៉ាដែលរងគ្រោះដោយព្យុះស៊ីក្លូនម៉ូកា បានកើនឡើងដល់យ៉ាងហោចណាស់ ៨១ នាក់កាលពីថ្ងៃអង្គារទី១៦ឧសភា នេះបើយោងតាមមេដឹកនាំក្នុងស្រុក មន្ត្រី និងប្រព័ន្ធផ្សព្វផ្សាយរដ្ឋ ខណៈអ្នកភូមិបានព្យាយាមផ្គុំបំណែកផ្ទះសម្បែង និងរង់ចាំជំនួយនិងការគាំទ្រនានា។
ព្យុះម៉ូកា (Mocha) បានមកដល់ដីគោកកាលពីថ្ងៃអាទិត្យជាមួយនឹងល្បឿនខ្យល់បក់រហូតដល់ ១៩៥ គីឡូម៉ែត្រក្នុងមួយម៉ោង ដោយរំលំបង្គោលភ្លើង និងវាយកម្ទេចទូកនេសាទឈើឱ្យបាក់ជាបំណែកៗ។
មេដឹកនាំក្នុងតំបន់បានប្រាប់អ្នកយកព័ត៌មាន AFP នៅកន្លែងកើតហេតុថា យ៉ាងហោចណាស់មនុស្ស ៤៦ នាក់បានស្លាប់នៅក្នុងភូមិប៊ូម៉ា (Bu Ma)នៃរដ្ឋរ៉ាក់ឃីន និងភូមិក្បែរខាង ខួងដូកេកា (Khaung Doke Kar) ជាកន្លែងរស់នៅរបស់ជនជាតិភាគតិចមូស្លីមរ៉ូហ៊ីងយ៉ា ដែលរងការធ្វើទុក្ខបុកម្នេញ។
យោងតាមទូរទស្សន៍រដ្ឋមីយ៉ាន់ម៉ា MRTV មនុស្សចំនួន ១៣ នាក់បានស្លាប់នៅពេលដែលវត្តមួយបានដួលរលំនៅក្នុងភូមិមួយក្នុងសង្កាត់រ៉ាថេឌុង (Rathedaung) ភាគខាងជើងនៃទីក្រុងស៊ីតវេ (Sittwe) របស់រដ្ឋរ៉ាក់ឃីន ហើយស្ត្រីម្នាក់បានស្លាប់នៅពេលដែលអគារមួយបានរលំនៅក្នុងភូមិជិតខាង។
លោកកាឡូ (Karlo) មេភូមិប៊ូម៉ា (Bu Ma) ក្បែរក្រុងស៊ីតវេ បាននិយាយថា “នឹងមានអ្នកស្លាប់ច្រើនថែមទៀត ខណៈមនុស្សជាង១០០នាក់កំពុងបាត់ខ្លួន”។
នៅក្បែរនោះ អា ប៊ុល ហ៊ូ សុន (Aa Bul Hu Son)អាយុ ៦៦ ឆ្នាំបានអធិស្ឋាននៅឯផ្នូរកូនស្រីរបស់គាត់ ដែលសាកសពរបស់នាងត្រូវបានរកឃើញកាលពីព្រឹកថ្ងៃអង្គារ។គាត់បានប្រាប់ទីភ្នាក់ងារសារព័ត៌មាន AFPថា “ខ្ញុំមិនមានសុខភាពល្អទេ មុនពេលព្យុះស៊ីក្លូន ដូច្នេះយើងត្រូវពន្យារពេលក្នុងការផ្លាស់ទីលំនៅទៅកន្លែងផ្សេង”។
“ខណៈពេលដែលយើងកំពុងគិតអំពីការផ្លាស់ទីលំនៅ ព្យុះស្រាប់តែមកភ្លាមៗ ហើយនាំយើងទៅ។ខ្ញុំទើបតែរកឃើញសាកសពនាងនៅក្នុងបឹងក្នុងភូមិ ហើយបញ្ចុះនាងភ្លាមៗ។ ខ្ញុំមិនអាចរកពាក្យណាមួយដើម្បីបង្ហាញពីការបាត់បង់របស់ខ្ញុំទេ”។
ម៉ូកាគឺជាព្យុះស៊ីក្លូនដ៏មានឥទ្ធិពលបំផុតដែលបានវាយលុកតំបន់នេះក្នុងរយៈពេលជាងមួយទសវត្សរ៍ ដោយបក់បោកកម្ទេចភូមិ រំលំដើមឈើ និងផ្តាច់ខ្សែទូរស័ព្ទនៅទូទាំងរដ្ឋរ៉ាក់ឃីន។
ចិនបាននិយាយថា ខ្លួនមានឆន្ទៈក្នុងការផ្តល់ជំនួយសង្គ្រោះបន្ទាន់ នេះបើយោងតាមសេចក្តីថ្លែងការណ៍មួយនៅលើទំព័រ Facebook របស់មីយ៉ាន់ម៉ា៕
ព្យុះម៉ូកាវាយប្រហាររដ្ឋរ៉ាក់ឃីននៅមីយ៉ាន់ម៉ាយ៉ាងធ្ងន់ធ្ងរកាលពីថ្ងៃអាទិត្យ