ដោយៈ ប.ជ័យ / បន្ទាយមានជ័យ: នៅព្រឹកថ្ងៃព្រហស្បតិ៍ ទី១៨ ខែឧសភា ឆ្នាំ២០២៣ លោកឧត្តមសេនីយ៍ត្រី វង្ស ធី មេបញ្ជាការរងកងរាជអាវុធហត្ថ ខេត្តបន្ទាយមានជ័យ បានអញ្ជើញដឹកនាំកិច្ចប្រជុំផ្សព្វផ្សាយ អំពីច្បាប់ស្តីពីការបោះឆ្នោត បទបញ្ជា និងនីតិវិធីសម្រាប់ការបោះឆ្នោត និងក្រមសីលធម៌ សម្រាប់ភ្នាក់ងារសន្តិសុខបោះឆ្នោត ជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ។
កិច្ចប្រជុំនេះ មានការចូលរួមពីសំណាក់លោកមេបញ្ជាការរង កងរាជអាវុធហត្ថខេត្ត លោកនាយសេនាធិការរង លោកប្រធាន–អនុប្រធានមន្ទីរ លោកនាយការិយាល័យ ជំនាញ លោកមេបញ្ជាការ–មេបញ្ជាការមូលដ្ឋាន កងរាជអាវុធហត្ថក្រុងស្រុកទាំង៩ និងនាយ នាយរង កងរាជអាវុធហត្ថ ចំនួន៧៨នាក់។ កិច្ចប្រជុំនេះប្រារព្ធ្វើឡើងនៅ សាលប្រជុំធំជាន់ទី២ អគារសេនាធិការដ្ឋាន កងរាជអាវុធហត្ថ ខេត្តបន្ទាយមានជ័យ។
លោកឧត្តមសេនីយ៍ត្រី វង្ស ធី ក៏បានណែនាំដល់ នាយ នាយរង កងរាជអាវុធហត្ថ ទាំងអស់ ត្រូវចូលរួមថែរក្សា ការពារសន្តិសុខសណ្តាប់ធ្នាប់ ទប់ស្កាត់ ស្រាវជ្រាវ បង្ក្រាប បទល្មើស ជួយសង្គ្រោះនូវរាល់ឧបទ្ទវហេតុ ឱ្យទាន់ពេលវេលា និងមានប្រសិទ្ធភាព ជាពិសេសការពាសន្តិសុខ សណ្តាប់ធ្នាប់ ក្នុងថ្ងៃបោះឆ្នោត ជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ នាពេលខាងមុខ ឱ្យបានល្អប្រសើរបំផុត ។ លោកបានរំលឹកដល់កម្លាំងកងរាជអាវុធហត្ថ ទាំងអស់ ត្រូវមានកិច្ចសហការ ទំនាក់ទំនងល្អ ជាមួយអាជ្ញាធរមូលដ្ឋាន មានសាមគ្គីភាព ល្អក្នុងអង្គភាព។
ព្រមជាមួយគ្នានោះ លោកឧត្តមសេនីយ៍ត្រី វង្ស ធី បានផ្សព្វផ្សាយអប់រំ នយោបាយចិត្តសាស្រ្ត ឆមាសទី១ ដល់កងកម្លាំង និងមេបញ្ជាការមូលដ្ឋានកងរាជអាវុធហត្ថ ក្រុង–ស្រុក ដើម្បីចូលរួមផ្សព្វផ្សាយ នៅមូលដ្ឋានរបស់ខ្លួនផងដែរ ៕/V-PC
