ប្រែសម្រួល : កញ្ញាដាលីស (ស្ត្រេតថែមស៍) ៖ អង្គការសហប្រជាជាតិបានព្រមានកាលពីថ្ងៃពុធថា គេសឹងតែប្រាកដថាឆ្នាំ ២០២៣ ដល់ឆ្នាំ ២០២៧នឹងក្លាយជាអំឡុងពេលប្រាំឆ្នាំដ៏ក្តៅបំផុតមិនធ្លាប់បានកត់ត្រាពីមុនមក ខណៈឧស្ម័នផ្ទះកញ្ចក់ និងបាតុភូត El Nino រួមបញ្ចូលគ្នាធ្វើឱ្យសីតុណ្ហភាពរឹតតែកើនឡើង។
អង្គការឧតុនិយមពិភពលោក (WMO)របស់អ.ស.ប បាននិយាយថាសីតុណ្ហភាពសកលលោកបានត្រៀមកើនឡើងលើសពីគោលដៅមហិច្ឆតាដែលបានកំណត់ក្នុងកិច្ចព្រមព្រៀងអាកាសធាតុទីក្រុងប៉ារីសទៅទៀត ដោយមានឱកាសខ្ពស់ពីរភាគបីនឹងមានអាកាសធាតុក្តៅខ្លាំងក្នុងអំឡុងប្រាំឆ្នាំនោះ។
អំឡុងរយៈពេលប្រាំបីឆ្នាំដែលក្តៅបំផុតមិនធ្លាប់កត់ត្រាគឺនៅចន្លោះឆ្នាំ ២០១៥ និង ២០២២ ប៉ុន្តែសីតុណ្ហភាពត្រូវបានព្យាករណ៍ថានឹងកើនឡើងបន្ថែមទៀតនៅពេលដែលការប្រែប្រួលអាកាសធាតុកើនឡើង។
WMOបាននិយាយថា “មានលទ្ធភាព ៩៨ ភាគរយ ដែលយ៉ាងហោចណាស់មួយក្នុងចំណោមប្រាំឆ្នាំខាងមុខ និងរយៈពេលប្រាំឆ្នាំទាំងមូល នឹងមានសភាពក្តៅបំផុតក្នុងកំណត់ត្រា”។
កិច្ចព្រមព្រៀងទីក្រុងប៉ារីសឆ្នាំ ២០១៥ បានឃើញថាប្រទេសនានាយល់ព្រមទប់ការឡើងកម្តៅផែនដីឱ្យនៅ “ទាបជាង” ២អង្សាសេលើកម្រិតមធ្យមដែលត្រូវបានវាស់នៅចន្លោះឆ្នាំ ១៨៥០ និង ១៩០០ និងក្រោម ១,៥ អង្សាសេ ប្រសិនបើអាចធ្វើទៅបាន។
សីតុណ្ហភាពជាមធ្យមលើពិភពលោកក្នុងឆ្នាំ ២០២២ គឺ ១,១៥ អង្សាសេលើសពីកម្រិតមធ្យមពីឆ្នាំ ១៨៥០ ដល់ ១៩០០៕
សីតុណ្ហភាពត្រូវបានព្យាករណ៍ថានឹងកើនឡើងបន្ថែមទៀត នៅពេលដែលការប្រែប្រួលអាកាសធាតុកើនឡើង