ប្រែសម្រួល : កញ្ញាដាលីស (ស្ត្រេតថែមស៍) ៖ អ្នករៀបចំបេសកកម្មបាននិយាយកាលពីថ្ងៃសុក្រថា អ្នកឡើងភ្នំពីរនាក់ទៀតបានស្លាប់នៅលើភ្នំអេវើរ៉េស ដោយធ្វើឱ្យចំនួនអ្នកស្លាប់នៅលើកំពូលភ្នំខ្ពស់បំផុតរបស់ពិភពលោកក្នុងរដូវឡើងភ្នំនេះកើនដល់៩នាក់។
ជាមធ្យមអ្នកឡើងភ្នំប្រហែលប្រាំនាក់បានស្លាប់នៅលើភ្នំកម្ពស់ ៨.៨៤៩ ម៉ែត្ររៀងរាល់រដូវផ្ការីក។ប៉ុន្តែឆ្នាំនេះចំនួនអ្នកស្លាប់បានកើនឡើងជិតទ្វេដងនៃចំនួនស្លាប់ជាមធ្យម ពោលមិនទាន់ដល់ពាក់កណ្តាលរដូវកាលផង។
តំបន់លើកំពស់ ៨.០០០ ម៉ែត្រត្រូវគេស្គាល់ថាជា “តំបន់មរណៈ” ជាកន្លែងដែលខ្យល់តិចនិងកម្រិតអុកស៊ីសែនទាបនឹងបង្កើនហានិភ័យនៃការឈឺដោយសារកម្ពស់ខ្ពស់ហើយតំបន់នេះមានកេរ្តិ៍ឈ្មោះល្បីអសោចដោយសារស្ថានភាពលំបាករបស់វា។
អ្នកឡើងភ្នំជនជាតិម៉ាឡេស៊ីម្នាក់និងចិនម្នាក់ត្រូវបានបញ្ជាក់ថាជាអ្នកស្លាប់ចុងក្រោយបង្អស់។
លោក នីវេស ម៉ាគី (Nivesh Karki) មកពីក្រុមហ៊ុន Pioneer Adventure បានប្រាប់ទីភ្នាក់ងារសារព័ត៌មាន AFP ថា “អ្នកឡើងភ្នំម៉ាឡេស៊ីអាយុ ៥៥ ឆ្នាំបានស្លាប់នៅថ្ងៃនេះនៅពីលើជំរំ Camp Four ខណៈគាត់កំពុងចុះមកវិញដោយមិនបានទៅដល់កំពូល”។
អ្នកឡើងភ្នំចិនម្នាក់បានស្លាប់កាលពីថ្ងៃព្រហស្បតិ៍៕
នេប៉ាល់ចេញលិខិតអនុញ្ញាតចំនួន ៤៧៨ ដល់អ្នកឡើងភ្នំបរទេសក្នុងរដូវកាលនេះ ដែលដំណើរការរហូតដល់ដើមខែមិថុនា