ប្រែសម្រួល : កញ្ញាដាលីស (អេស៊ាវ័ន) ៖ អ៊ីរ៉ង់កាលពីថ្ងៃសុក្រ ទី១៩ ឧសភាបានប្រហារជីវិតបុរសបីនាក់ដែលខ្លួននិយាយថាមានជាប់ពាក់ព័ន្ធនឹងការស្លាប់សមាជិកបីនាក់នៃកងកម្លាំងសន្តិសុខរបស់ខ្លួនក្នុងអំឡុងបាតុកម្មប្រឆាំងរដ្ឋាភិបាលកាលពីឆ្នាំមុន ដែលបានទាក់ទាញការតវ៉ានៅក្នុងប្រទេសនិងក្រៅប្រទេស។
តុលាការបាននិយាយនៅក្នុងសេចក្តីថ្លែងការណ៍មួយនៅលើ Twitterថា ម៉ាជីដ កាហ្សេមី (Majid Kazemi) សាឡេស មីរ៉ាសេមី (Saleh Mirhashemi) និង សាអ៊ីដ យ៉ាហ្គោប៊ី (Saeed Yaghoubi) ត្រូវបានប្រហារជីវិតនៅកណ្តាលទីក្រុងអ៊ីសហ្វាហាន (Isfahan) ដោយបន្ថែមថា ពួកគេបាន “ធ្វើទុក្ករកម្ម” សមាជិកពីរនាក់នៃកម្លាំងទាហានប៉ារ៉ាបាស៊ីច (Basij)និងមន្ត្រីប៉ូលិសម្នាក់កាលពីថ្ងៃទី ១៦ ខែវិច្ឆិកា។
អង្គការលើកលែងទោសអន្តរជាតិបាននិយាយថា ការកាត់ក្តី ដែលមានការស៊ើបអង្កេតយ៉ាងរហ័សលើបុរសទាំងបី គឺមានកំហុស ហើយបានប្រើ “ការសារភាពដោយធ្វើទារុណកម្ម”។
អ៊ីរ៉ង់បដិសេធថា ការសារភាពទោសមិនត្រូវបានធ្វើឡើងក្រោមការធ្វើទារុណកម្មទេ។
ការប្រហារជីវិតកាលពីថ្ងៃសុក្របាននាំឱ្យក្រុមបាតុករយ៉ាងហោចណាស់៧នាក់ត្រូវបានព្យួរកចាប់តាំងពីការចាប់ផ្តើមនៃការតវ៉ាទូទាំងប្រទេសដែលបានចាប់ផ្តើមកាលពីរដូវស្លឹកឈើជ្រុះឆ្នាំមុន ហើយបានប្រែក្លាយទៅជាការប្រឈមដ៏ក្លាហានបំផុតមួយចំពោះថ្នាក់ដឹកនាំបែបសាសនាចាប់តាំងពីបដិវត្តន៍ឆ្នាំ ១៩៧៩។
ការតវ៉ាទាំងនោះត្រូវបានដុតបញ្ឆេះឡើងដោយការស្លាប់កាលពីថ្ងៃទី ១៦ ខែកញ្ញារបស់ស្ត្រីជនជាតិអ៊ីរ៉ង់អាយុ ២២ ឆ្នាំឈ្មោះ ម៉ាសា អាមីនី (Mahsa Amini)ខណៈកំពុងនៅក្នុងមន្ទីរឃុំឃាំងរបស់ប៉ូលិសសីលធម៌របស់អ៊ីរ៉ង់៕
ការតវ៉ាទូទាំងប្រទេសដែលបានចាប់ផ្តើមកាលពីរដូវស្លឹកឈើជ្រុះឆ្នាំមុន ក្រោយការស្លាប់របស់ស្ត្រីជនជាតិអ៊ីរ៉ង់អាយុ ២២ ឆ្នាំម្នាក់នៅក្នុងមន្ទីរឃុំឃាំងរបស់ប៉ូលិសសីលធម៌របស់អ៊ីរ៉ង់