ប្រែសម្រួលៈបំណង(ដេល្លីម៉េល)៖ ក្រុមប្រទេសឧស្សាហកម្មជឿនលឿននិងប្រកាន់លទ្ធិប្រជាធិបតេយ្យមានទ្រព្យធនទាំងប្រាំពីរ(G7)កាលពីថ្ងៃសៅរ៍បានបើកកិច្ចប្រជុំកំពូលនៅជប៉ុននិងបានទទូចសុំអោយចិនដាក់សម្ពាធលើដៃគូរុស្ស៊ីដើម្បីបញ្ចប់សង្គ្រាមនៅអ៊ុយក្រែន។
នៅក្នុងសេចក្តីថ្លែងការណ៍រួមមួយនៅថ្ងៃ២០ឧសភានេះ ក្រុមមេដឹកនាំG7បានសង្កត់ធ្ងន់ថាពួកគេមិនចង់ប៉ះពាល់ចិនទេ និងស្វះស្វែង«បង្កើតទំនាក់ទំនងបែបស្ថាបនានិងឋិតថេរ»ជាមួយរដ្ឋាភិបាលទីក្រុងប៉េកាំង ដោយ«ទទួលស្គាល់សារសំខាន់នៃការចូលរួមពាក់ព័ន្ធដោយស្មោះត្រង់និងសម្តែងការព្រួយបារម្ភរបស់ពួកយើងចំពោះចិន»។
វាបាននិយាយថា« យើងអំពាវនាវចិនដាក់ការគាបសង្កត់រុស្ស៊ីអោយបញ្ឈប់ការឈ្លានពានដោយយោធា និងដកទាហានរបស់ខ្លួនទាំងអស់ជាបន្ទាន់ ដោយគ្មានលក្ខខណ្ឌពីអ៊ុយក្រែន។យើងលើកទឹកចិត្តអោយគាំទ្រសន្តិភាពគ្រប់ជ្រុងជ្រោយនិងឋិតថែរមួយផ្អែកលើបូរណភាពទឹកដីនិងគោលការណ៍ព្រមទាំងបំណងនៃធម្មនុញ្ញរបស់អង្គការសហប្រជាជាតិ» រួមមានកិច្ចពិភាក្សាផ្ទាល់ជាមួយអ៊ុយក្រែន។
«យើងក៏ត្រូវការផងដែរកិច្ចសហការជាមួយចិន ដោយសារតែតួនាទីសកលនិងទំហំសេដ្ឋកិច្ចរបស់ចិន ។ក្រុមនេះក៏ត្រូវធ្វើការជាមួយចិនដើម្បីប្រយុទ្ធប្រឆាំងនឹងការប្រឈមដូចជាការប្រែប្រួអាកាសធាតុ ជីវចំរុះ បំណុលនិងតំរូវការហិរញ្ញប្បទាននៃប្រទេសងាយរងគ្រោះ ការព្រួយបារម្ភអំពីសុខភាពសកលនិងស្ថិរភាពសេដ្ឋកិច្ច»។
តែក្រុមG7បាន«សម្តែងការព្រួយបារម្ភខ្លាំងក្លា»អំពីស្ថានការណ៍នៅក្នុងសមុទ្រចិនខាងកើតនិងខាងត្បូង កន្លែងដែលរដ្ឋាភិបាលទីក្រុងប៉េកាំងកំពុងពង្រីកវត្តមានយោធានិងគំរាមប្រើកម្លាំងដើម្បីដាក់ការគ្រប់គ្រងលើកោះតៃវ៉ាន់។ពួកគេក៏បានអំពាវនាវអោយមាន«ដំណោះស្រាយដោយសន្តិវិធី»ចំពោះការអះអាងអធិបតេយ្យភាពរបស់ចិនប៉េកាំងលើកោះតៃវ៉ាន់ ។
សេចក្តីថ្លែងការណ៍បាននិយាយថា វាមិនមានមូលដ្ឋានផ្លូវច្បាប់សំរាប់ចិនអះអាងកម្មសិទ្ធិក្នុងដែនទឹកនៅក្នុងសមុទ្រចិនខាងត្បូង ហើយ«យើងប្រឆាំងសកម្មភាពធ្វើយោធូបនីយកម្មរបស់ចិននៅក្នុងតំបន់នេះ»។
ក្រុមមេដឹកនាំG7 រួមមានប្រធានាធិបតីអាម៉េរិក ជួបជុំគ្នានៅក្រុងហ៊ីរ៉ូស៊ីម៉ា ប្រទេសជប៉ុនកាលពីថ្ងៃសៅរ៍
មេដឹកនាំG7 ក៏បានរួមគ្នាបញ្ចេញសម្លេងតែមួយ ដោយបង្ហាញការព្រួយបារម្ភអំពីសិទ្ធិមនុស្ស នៅទីបេតិ៍ ហុងកុងនិងនៅចុងខាងលិចចិន គឺតំបន់ស៊ីនជាំងដែលមានប្រជាជនកាន់សាសនាអ៊ីស្លាមរស់នៅច្រើន។
តែសេចក្តីថ្លែងការណ៍ក៏ព្យាយាមទប់ទល់នឹងការចោទប្រកាន់ថា G7កំពុងស្វះស្វែងរារាំងការកើនឡើងឥទ្ធិពលរបស់ចិនលើសកលលោក។វាបាននិយាយថា«គោលនយោបាយរបស់យើងមិនមែនបង្កើតឡើងសំរាប់បំផ្លាញចិន ឬក៏រារាំងរំខានការរីកចំរើននិងការអភិវឌ្ឍសេដ្ឋកិច្ចចិន»ទេ។
សេចក្តីថ្លែងការណ៍បានរំលេចអំពីការមូលមតិគ្នាមួយ ដើម្បីខិតខំធ្វើអោយខ្សែសង្វាក់ផ្គត់ផ្គង់ដល់រោងចក្រឧស្សាហកម្មមានចម្រុះភាព និងធានាការចូលប្រើឬទទួលធនធានរ៉ែសំខាន់ផ្នែកយុទ្ធសាស្ត្រនិងប្រភពធនធានដទៃទៀតដោយឋិតថេរ។
ក្នុងពេលជាមួយគ្នា សមាជិកG7ក៏ប្តេជ្ញាចាត់វិធានការប្រឆាំងនឹង«ការបង្ខិតបង្ខំសេដ្ឋកិច្ច»ក្នុងទំរង់ផ្សេងៗ ដូចជាការតំរូវអោយផ្ទេរបច្ចេកវិទ្យាឬការបញ្ចេញទិន្នន័យ ក៏ដូចជាការកំហិតពាណិជ្ជកម្មនិងការវិនិយោគ។
មន្ត្រីចិនបានប្រតិកម្មនឹងសេចក្តីថ្លែងការណ៍របស់G7អំពីការបង្ខិតបង្ខំសេដ្ឋកិច្ចនិងបញ្ហាដទៃទៀត ដោយចោទប្រកាន់អាម៉េរិកនិងសមាជិកG7ដទៃទៀតថា និយាយបំប៉ោងសភាពការណ៍។ទីភ្នាក់ងារសារព័ត៌មានរដ្ឋចិន ស៊ីនហួរ បានពណ៌នាការចោទប្រកាន់ដូច្នេះថាជា«ការស្វែងតាមរកកំហុស ជាការសម្លុតគំរាមនិងគាបសង្កត់មហាអំណាច»។ស៊ីនហួរបាននិយាយថា«បើនិយាយអំពីការសម្លុតគំរាម ជនទីមួយអឺអាម៉េរិកនេះឯង។សម្ពន្ធមិត្តG7របស់អាម៉េរិក គួរតែគំគួនការដែលរដ្ឋាភិបាលទីក្រុងវ៉ាស៊ីនតោនបានកេងប្រវ័ញ្ញនិងជញ្ជក់ឈាមរបស់គេអស់រាប់ឆ្នាំ»៕