ប្រែសម្រួល : កញ្ញាដាលីស (ដេល្លីម៉េល) ៖ យានជំនិះអគ្គិសនីត្រូវបានចាត់ទុកថាជាអនាគតនៃការដឹកជញ្ជូនគ្មានការបំភាយឧស្ម័នប៉ុន្តែរថយន្តដែលមិនប៉ះពាល់ដល់បរិស្ថានចុងក្រោយនេះអាចដំណើរការដោយពន្លឺព្រះអាទិត្យ។
អ្នកស្រាវជ្រាវបានបង្កើត “ស្លឹកសិប្បនិម្មិត” ដែលប្រើពន្លឺព្រះអាទិត្យដើម្បីបំប្លែងទឹកនិងកាបូនឌីអុកស៊ីតទៅជាឥន្ធនៈដែលមានការបំភាយទាប គឺ អេតាណុលនិងប្រូផាណុល។
ប្រសិនបើនេះស្តាប់ទៅដូចធ្លាប់ឮ ស្លឹកសិប្បនិម្មិតនេះធ្វើត្រាប់តាមរស្មីសំយោគ ពោលជាដំណើរការដ៏ល្បីល្បាញដែលប្រើដោយរុក្ខជាតិដើម្បីបង្កើតថាមពលរបស់វា។
នៅក្នុងមន្ទីរពិសោធន៍ អ្នកជំនាញបានជ្រលក់ស្លឹកឈើនេះនៅក្នុងទឹកដែលបញ្ចូលឧស្ម័ន CO2 មុននឹងបញ្ចេញពន្លឺមកលើវា ដើម្បីបង្កឱ្យមានប្រតិកម្មនិងបង្កើតឥន្ធនៈពណ៌បៃតង។ប៉ុន្តែនៅពេលអនាគត រថយន្តអាចនឹងត្រូវបានសាងសង់ឡើងជាមួយនឹងបច្ចេកវិជ្ជានេះដើម្បីចាប់យកពន្លឺព្រះអាទិត្យ ឧស្ម័នកាបូនិក និងចំហាយទឹកនៅក្នុងខ្យល់ ហើយផលិតប្រេងឥន្ធនៈក្នុងពេលធ្វើដំណើរ។
បច្ចេកវិជ្ជានេះត្រូវបានពណ៌នានៅក្នុងការសិក្សាថ្មីមួយដែលដឹកនាំដោយអ្នកស្រាវជ្រាវនៃសាកលវិទ្យាល័យខេមប្រ៊ីច (Cambridge) និងបោះពុម្ពផ្សាយនៅក្នុងទស្សនាវដ្តី Nature Energy ។
លោកបណ្ឌិត ម៉ូធៀ រ៉ាហាម៉ាន់ (Motiar Rahaman) ជាអ្នកនិពន្ធការសិក្សានេះ បាននិយាយថា “ការចាំងពន្លឺថ្ងៃនៅលើស្លឹកសិប្បនិម្មិត និងការទទួលបានឥន្ធនៈរាវពីកាបូនឌីអុកស៊ីតនិងទឹកគឺជាគីមីសាស្ត្រដ៏អស្ចារ្យ”។
“នៅក្នុងការងារនេះ យើងបានបង្កើតឧបករណ៍ស្លឹកសិប្បនិម្មិតដើម្បីបង្កើតជាតិអាល់កុលកាបូនពី CO2 និងទឹកដោយប្រើពន្លឺព្រះអាទិត្យជាប្រភពថាមពលតែមួយគត់”។
អ្នកស្រាវជ្រាវបានបង្កើត “ស្លឹកសិប្បនិម្មិត” របស់ពួកគេពីស្រទាប់ច្រើនផ្នត់ រួមទាំងទង់ដែង កញ្ចក់ ប្រាក់ និងធ្យូងថ្ម។
ស្លឹកសិប្បនិម្មិតនេះមានសារធាតុស្រូបយកពន្លឺ គឺស្រដៀងទៅនឹងម៉ូលេគុលនៅក្នុងរុក្ខជាតិដែលប្រមូលផលពន្លឺព្រះអាទិត្យ ដែលផ្សំជាមួយកាតាលីករ។
កាតាលីករនេះត្រូវបានផលិតចេញពីធាតុពីរគឺទង់ដែង និងផាល់ឡាដ្យូម (palladium)។
ក្នុងវត្តមាននៃពន្លឺព្រះអាទិត្យ កាតាលីករបំប្លែងឧស្ម័ន CO2 ទៅអេតាណុលនិងប្រូផាណុល ហើយទឹកទៅជាអុកស៊ីសែន។
លោកបណ្ឌិតរ៉ាហាម៉ាន់បានប្រាប់ MailOnline ថា “ការផលិតអាល់កុលអាចចម្រាញ់ចេញពីឧបករណ៍ផ្ទុកប្រតិកម្ម ហើយបន្ទាប់មកអាចប្រើក្នុងឡានបាន”៕
ឡានអនាគតគឺប្រើតែពន្លឺព្រះអាទិត្យដើម្បីផ្តល់ថាមពលទៅមុខ