ប្រែសម្រួលៈបំណង(CNA)៖ ប្រធានាធិបតីអាម៉េរិកលោកចូ បៃដិន បាននិយាយកាលពីថ្ងៃអាទិត្យថា លោកបានទទួល«ការធានាមែនទែន»មួយពីប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គីថា អ៊ុយក្រែននឹងមិនប្រើយន្តហោះប្រយុទ្ធF-16ផ្តល់ដោយលោកខាងលិច ដើម្បីវាយប្រហារចូលទឹកដីរុស្ស៊ីទេ។
លោកបៃដិន បានប្រាប់អ្នកយកព័ត៌មាននៅក្រុងហ៊ីរ៉ូស៊ីម៉ា ប្រទេសជប៉ុននៅពេលបញ្ចប់ជំនួបកំពូលG7ថា យន្តហោះF-16អាចប្រើនៅពេលណាដែលទាហានរុស្ស៊ីនៅក្នុងប្រទេសអ៊ុយក្រែននិងតំបន់ហើយយន្តហោះប្រភេទនេះទំនងជានឹងមិនមានវត្តមានក្នុងការវាយប្រហាររបស់អ៊ុយក្រែនណាមួយនៅប៉ុន្មានសប្តាហ៍ខាងមុខទេ តែទាហានអ៊ុយក្រែនអាចត្រូវការសព្វាវុធដូច្នេះដើម្បីការពារខ្លួនទល់នឹងកងកម្លាំងរុស្ស៊ីទៅហួសពីចម្ងាយអាចវាយដល់នៅពេលបច្ចុប្បន្ន។
ក្រុមមេដឹកនាំG7កាលពីថ្ងៃអាទិត្យបាននិយាយថា ពួកលោកនឹងមិនបន្ថយការគាំទ្រអ៊ុយក្រែនឡើយ ចំពេលរុស្ស៊ីអះអាងអំពីការចាប់យកទីក្រុងបាឃ្មុតភាគខាងកើតក្រោយការប្រយុទ្ធគ្នារាប់ខែ។លោកបៃដិន ក្នុងឳកាសនេះក៏បានប្រកាសផ្តល់ជំនួយយោធាមួយកញ្ចប់ថ្មីតំលៃ៣៧៥លានដុល្លារ រួមមានគ្រាប់រំសេវ និងរថក្រោះ រថពាសដែកសំរាប់អ៊ុយក្រែន។
ក្នុងកិច្ចប្រជុំកំពូលនៅជប៉ុន លោកបៃដិនបានប្រាប់ក្រុមមេដឹកនាំG7ថា រដ្ឋាភិបាលទីក្រុងវ៉ាស៊ីនតោនគាំទ្រកម្មវិធីបណ្តុះបណ្តាលអាកាសយានិចអ៊ុយក្រែនអោយចេះប្រើF-16 ទោះជាយ៉ាងណារដ្ឋាភិបាលទីក្រុងគៀវមិនទាន់ទទួលបានការសន្យាអំពីការប្រគល់យន្តហោះប្រយុទ្ធជំនាន់ទីបួននេះជាក់លាក់នៅឡើយទេ។
ហ្សេឡេនស្គី បាននិយាយកាលពីថ្ងៃអាទិត្យថា លោកមានជំនឿថា រដ្ឋាភិបាលទីក្រុងគៀវនឹងទទួលបានយន្តហោះF-16ពីលោកខាងលិចក្រោយការបញ្ចុះបញ្ចូលរាប់ខែសំរាប់យន្តហោះពហុមុខនាទីផលិតនៅអាម៉េរិកនេះ៕
បៃដិន ដាក់ដៃលើស្មាលោកហ្សេឡេនស្គី និងបានប្រាប់មេដឹកនាំG7ថាលោកបានអនុញ្ញាតអោយមានកម្មវិធីបង្ហាត់អាកាសយានិចអ៊ុយក្រែនសំរាប់ប្រើយន្តហោះF-16