ប្រែសម្រួល : កញ្ញាដាលីស (ស្ត្រេតថែមស៍) ៖ សាក្សីនៅក្នុងរដ្ឋធានីស៊ូដង់បានរាយការណ៍ពីការប៉ះទង្គិចគ្នានិងការវាយប្រហារតាមផ្លូវអាកាសនៅប៉ុន្មាននាទីបន្ទាប់ពីបទឈប់បាញ់មនុស្សធម៌រយៈពេលមួយសប្តាហ៍បានចូលជាធរមានកាលពីយប់ថ្ងៃចន្ទទី២២ឧសភា ដោយក្លិនផ្សែងរំសេវនៅតែធុំក្លិននៅឡើយបន្ទាប់ពីការបាញ់កាំភ្លើងនិងការផ្ទុះគ្រាប់បែកបានអង្រួនទីក្រុងកាទុំពេញមួយថ្ងៃ។
សាក្សីបានរាយការណ៍ពីការប្រយុទ្ធគ្នានៅភាគខាងជើងទីក្រុងកាទុំនិងការវាយប្រហារតាមផ្លូវអាកាសនៅភាគខាងកើតរដ្ឋធានី ភ្លាមៗបន្ទាប់ពីម៉ោង ៩៖៤៥ យប់នៅពេលដែលបទឈប់បាញ់ហៀបនឹងចូលជាធរមាន។
ការប្រកាសបទឈប់បាញ់ពីមុនៗទាំងអស់ត្រូវបានបំពានដោយមេទ័ពដែលកំពុងធ្វើសង្គ្រាមនឹងគ្នា ប៉ុន្តែសហរដ្ឋអាម៉េរិកនិងអារ៉ាប៊ីសាអូឌីត ដែលសម្របសម្រួលកិច្ចព្រមព្រៀងនេះ បាននិយាយថា កិច្ចព្រមព្រៀងលើកនេះគឺខុសគ្នា ពីព្រោះវាត្រូវបាន “ចុះហត្ថលេខាដោយគូភាគី” ហើយនឹងត្រូវគាំទ្រដោយ “យន្តការត្រួតពិនិត្យបទឈប់បាញ់”។
សាក្សីម្នាក់នៅភាគខាងត្បូងទីក្រុងកាទុំបានរាយការណ៍ពីការវាយប្រហារតាមអាកាស អមដោយភាពស្ងៀមស្ងាត់ ភ្លាមៗមុនពេលបទឈប់បាញ់ត្រូវចូលជាធរមាន។
ការវាយប្រហារតាមអាកាសនិងការបាញ់កាំភ្លើងជាធម្មតាមានភាពស្ងប់ស្ងាត់ពេញមួយយប់ក្នុងអំឡុងសង្គ្រាម ដែលមានរយៈពេលជាងប្រាំសប្តាហ៍នេះ។
នៅព្រឹកថ្ងៃចន្ទ ប្រជាជនក្នុងរដ្ឋធានី ដែលបារម្ភពីការលុបចោលបទឈប់បាញ់ដើម្បីឱ្យពួកគេអាចទៅជួបសាច់ញាតិដែលជាប់គាំង រួចភៀសខ្លួនទៅកាន់ទីសុវត្ថិភាព ឬទទួលជំនួយមនុស្សធម៌ បាននិយាយថា មានសញ្ញាតិចតួចណាស់បង្ហាញថា អ្នកប្រយុទ្ធកំពុងត្រៀមផ្អាក ដោយរាយការណ៍ពីការវាយប្រហារតាមអាកាសនិងការបាញ់កាំភ្លើងប្រឆាំងយន្តហោះសម្រាប់ថ្ងៃទី ៣៧ ជាប់ៗគ្នា។
លោក ម៉ាម៉ូដ សាឡាស អែលឌីន (Mahmoud Salah el-Din) ជាអ្នកក្រុងកាទុំ បានប្រាប់ទីភ្នាក់ងារសារព័ត៌មាន AFP នៅប៉ុន្មានម៉ោងមុនពេលបទឈប់បាញ់ចូលជាធរមានថា “យន្តហោះចម្បាំងកំពុងទម្លាក់គ្រាប់បែកនៅសង្កាត់របស់យើង”។
សមរភូមិបានចាប់ផ្តើមនៅថ្ងៃទី ១៥ ខែមេសារវាងកងទ័ពដែលដឹកនាំដោយមេដឹកនាំជាក់ស្តែងនៃប្រទេសស៊ូដង់លោក អាប់ឌែល ហ្វាតតា អាល់បឺហាន (Abdel Fattah al-Burhan) និងកងកម្លាំងគាំទ្ររហ័ស ដែលបញ្ជាដោយអតីតអនុប្រធានរបស់លោកបឺហាន លោក ម៉ូហាម៉េដ ហាមដាន ដាកឡូ (Mohamed Hamdan Daglo)៕
ផ្សែងហុយនៅទីក្រុងកាទុំនៅព្រឹកថ្ងៃអង្គារទី២៣ឧសភានេះ ខណៈការប្រយុទ្ធគ្នានៅតែបន្ត