ប្រែសម្រួល : កញ្ញាដាលីស (ស្ត្រេតថែមស៍) ៖ នាឡិកា ដែលធ្លាប់ជាកម្មសិទ្ធិរបស់អធិរាជចុងក្រោយនៃរាជវង្សឈីងរបស់ចិន ដែលជីវិតរបស់ទ្រង់បានបង្កើតជាមូលដ្ឋាននៃខ្សែភាពយន្តឈ្នះពានអូស្ការ The Last Emperorនោះ ត្រូវបានលក់ក្នុងតម្លៃកំណត់ត្រា ៤០ លានដុល្លារហុងកុង (៥,១ លានដុល្លារ) នៅឯការដេញថ្លៃនៅហុងកុងកាលពីថ្ងៃអង្គារទី២៣ឧសភា។
អ្នកទិញអនាមិកម្នាក់បានទិញនាឡិកាម៉ាក Patek Philippe ដ៏កម្រដែលជាកម្មសិទ្ធិរបស់ព្រះចៅអធិរាជ អៃស៊ីន ជីអូរ៉ូ ពុយអ៊ី (Aisin-Gioro Puyi) ។ តម្លៃនេមិនរាប់បញ្ចូលថ្លៃឈ្នួលរបស់ក្រុមហ៊ុនដេញថ្លៃទេ។
លោក ថូម៉ាស ប៉េរ៉ាហ្សហ្ស៊ី (Thomas Perazzi) ប្រធានផ្នែកនាឡិកានៅក្រុមហ៊ុនដេញថ្លៃ Phillips Asia បានប្រាប់ទីភ្នាក់ងារសារព័ត៌មានរ៉យទ័រថា វាជា “លទ្ធផលខ្ពស់បំផុត” សម្រាប់នាឡិកាដៃដែលធ្លាប់ជារបស់អធិរាជ។
ក្រុមហ៊ុនដេញថ្លៃបាននិយាយថា វាជានាឡិកាមួយក្នុងចំណោមនាឡិកាម៉ាក Patek Philippe Reference 96 Quantieme Lune ដែលគេស្គាល់តែប្រាំបីគ្រឿងប៉ុណ្ណោះហើយត្រូវបានព្រះចៅអធិរាជពុយអ៊ីប្រគល់ជូនជាអំណោយដល់អ្នកបកប្រែជនជាតិរុស្ស៊ីរបស់ទ្រង់ នៅពេលដែលទ្រង់កំពុងជាប់ពន្ធនាគារនៅសហភាពសូវៀត។ តម្លៃនេះបានផ្តួលតម្លៃព្យាករណ៍មុនលក់៣លានដុល្លារយ៉ាងងាយ។
នាឡិកាផ្សេងទៀតដែលជាកម្មសិទ្ធិរបស់អធិរាជនិងបានលក់ដេញថ្លៃដែរនោះរួមមាននាឡិកា Patek Philippe ដែលជាកម្មសិទ្ធិរបស់អធិរាជអេត្យូពីចុងក្រោយ ហៃឡេ សេឡាសស៊ី (Haile Selassie) ដែលបានលក់ក្នុងតម្លៃ ២,៩ លានដុល្លារក្នុងឆ្នាំ ២០១៧។
នាឡិកាម៉ាក Rolex ដែលជាកម្មសិទ្ធិរបស់អធិរាជចុងក្រោយរបស់វៀតណាម បាវ ដាយ (Bao Dai) លក់បាន ៥ លានដុល្លារក្នុងការដេញថ្លៃមួយក្នុងឆ្នាំ ២០១៧៕
នាឡិកាម៉ាក Patek Philippe របស់ព្រះចៅអធិរាជ អៃស៊ីន ជីអូរ៉ូ ពុយអ៊ី លក់បាន ៥,១ លានដុល្លារ