ប្រែសម្រួល : កញ្ញាដាលីស (ស្ត្រេតថែមស៍) ៖ លោកស្រី ធីណា ធឺន័រ (Tina Turner) ជាតារាចម្រៀងកើតនៅសហរដ្ឋអាម៉េរិកដែលបានចាកចេញពីសហគមន៍កសិកម្មដ៏លំបាកនិងទំនាក់ទំនងបែបរំលោភបំពានដើម្បីក្លាយជាតារាចម្រៀងកំពូលគ្រប់សម័យកាលនោះ បានទទួលមរណភាពកាលពីថ្ងៃពុធទី២៤ឧសភា ក្នុងជន្មាយុ ៨៣ ឆ្នាំ។
អ្នកតំណាងរបស់លោកស្រីបាននិយាយថា លោកស្រីបានលាចាកលោកដោយស្ងប់សុខ បន្ទាប់ពីឈឺរ៉ាំរ៉ៃយូរនៅក្នុងផ្ទះរបស់គាត់នៅតំបន់គូសណាច់ (Kusnacht) ក្បែរទីក្រុងហ្សួរីច (Zurich) ប្រទេសស្វីស។
លោកស្រីធឺន័របានចាប់ផ្តើមអាជីពក្នុងទសវត្សរ៍ឆ្នាំ ១៩៥០ ក្នុងអំឡុងឆ្នាំដំបូងៗនៃចង្វាក់រ៉ុកនិងរ៉ូល (Rock and Roll) ហើយបានវិវត្តទៅជាចង្វាក់ល្បីលើប៉ុស្តិ៍ MTV ។
នៅក្នុងវីដេអូសម្រាប់បទចម្រៀងជាប់ចំណាត់ថ្នាក់លេខមួយរបស់លោកស្រី គឺបទ What’s Love Got To Do With It ដែលក្នុងនោះលោកស្រីហៅស្នេហាថាជា “អារម្មណ៍មួយទឹក” លោកស្រីធឺន័របានបង្ហាញស្ទីលទសវត្សរ៍ឆ្នាំ ១៩៨០ នៅពេលដែលលោកស្រីដើរកាត់តាមដងផ្លូវនៅទីក្រុងញូវយ៉ក ជាមួយនឹងសក់ទង់ដែងរលើបរលោង អាវកាក់ខូវប៊យ សំពត់ខ្លីនិងស្បែកជើងកែងចោត។
ជាមួយនឹងរសអារម្មណ៍របស់លោកស្រីសម្រាប់ការពិសោធតន្ត្រីនិងបទមនោសញ្ចេតនាដែលនិយាយពាក្យត្រង់ៗ លោកស្រីធឺន័របានបញ្ចេញភាពល្អឥតខ្ចោះជាមួយនឹងបទបែបប៉ុបនាទសវត្សរ៍ឆ្នាំ ១៩៨០ ដែលក្នុងនោះអ្នកគាំទ្រតន្ត្រីបានឱ្យតម្លៃទៅលើសំឡេងដែលផលិតដោយអេឡិចត្រូនិកនិងឧត្តមគតិសម័យហ៊ីបហប។
ពេលខ្លះមានរហស្សនាមថា រាជនីរ៉ុកនិងរ៉ូល លោកស្រីធឺន័របានឈ្នះពាន Grammy ចំនួនប្រាំមួយក្នុងចំណោមពាន Grammy ចំនួនប្រាំបីរបស់លោកស្រីក្នុងទសវត្សរ៍ឆ្នាំ ១៩៨០។ ទសវត្សរ៍មួយនេះបានឃើញបទចម្រៀងជាង១០បទរបស់លោកស្រីឈរនៅលើទីកំពូលទាំង ៤០ រួមមានបទ Typical Male, The Best, Private Dancer និង Better Be Good to Me។ ការសម្តែងបទចម្រៀងឆ្នាំ ១៩៨៨ របស់លោកស្រីនៅទីក្រុងរីយ៉ូដេជេនីរ៉ូ (Rio de Janeiro) បានទាក់ទាញមនុស្ស ១៨០.០០០ នាក់ ដែលនៅតែជាទស្សនិកជនតន្ត្រីដ៏ធំបំផុតសម្រាប់អ្នកសម្តែងតែមួយរូប៕
លោកស្រីធឺន័រទទួលមរណភាពនៅថ្ងៃពុធក្នុងប្រទេសស្វីស