ប្រែសម្រួលៈបំណង(ដេល្លីម៉េល)៖ អ៊ុយក្រែនបាននិយាយកាលពីថ្ងៃព្រហស្បតិ៍ថា ដ្រូនផលិតនៅអ៊ីរ៉ង់ចំនួន៣៦គ្រឿងដែលត្រូវបានបង្ហោះដោយកងកម្លាំងរុស្ស៊ី ក្នុងការវាយប្រហារកាលពីយប់មិញត្រូវបានបាញ់ទម្លាក់ទាំងអស់។ដ្រូនទាំងនេះប្រហែលជាមានគោលដៅវាយប្រហារទីតាំងយោធានិងហេដ្ឋារចនាសម្ពន្ធសំខាន់ៗ។
ប្រធានាធិបតីហ្សេឡេនស្គី បាននិយាយថា វាជា«យប់មិនស្រួល»មួយតែបានសរសើរការងាររបស់កងការពារដែនអាកាស។
លោកបានសរសេរបង្ហោះថា «ដោយបន្តធ្វើភេរវកម្មអ៊ុយក្រែន សត្រូវបានប្រើដ្រូនShahedចំនួន៣៦គ្រឿង តែគ្មានមួយណាបានទៅដល់គោលដៅរបស់វាទេ។អរគុណកងកម្លាំងការពារដែនអាកាសរបស់យើងចំពោះលទ្ធផល១០០ភាគរយ»។
ប្រធានាធិបតីហ្សេឡេនស្គី ថតជាមួយដ្រូនShahedដែលត្រូវបានបាញ់ទម្លាក់
ចាប់តាំងពីខែតុលាឆ្នាំមុនមក រដ្ឋាភិបាលទីក្រុងមូស្គូតែងបញ្ជូនដ្រូនមកវាយប្រហារគោលដៅនានាក្នុងប្រទេសអ៊ុយក្រែន។ទោះជាពួកវាហោះយឺត តែដ្រូនប្រភេទនេះថោកនិងងាយបំផ្លាញចោល។
កងកម្លាំងទ័ពអាកាសអ៊ុយក្រែនបាននិយាយថា« សត្រូវទំនងជាចង់វាយប្រហារហេដ្ឋារចនាសម្ពន្ធនិងទីតាំងយោធារបស់យើងនៅតំបន់ខាងលិច។ពួកវាជាដ្រូនShahed 136 និង Shahed 131 ផលិតនៅអ៊ីរ៉ង់»។
ប្រធានរដ្ឋបាលយោធាទីក្រុងគៀវបាននិយាយថា រដ្ឋធានីនេះបានស្ថិតក្រោមការវាយប្រហារពីដ្រូនជាច្រើនជុំ តែត្រូវបានបាញ់ទម្លាក់ទាំងអស់។លោកបាននិយាយថាវាជាការវាយប្រហារលើកទី១២នៅក្នុងខែនេះ។ចំណែកអាជ្ញាធរយោធានិងតំបន់ខាងត្បូងនិងខាងលិចអ៊ុយក្រែន ក៏បានរាយការណ៍អំពីការបាញ់ទម្លាក់ដ្រូនផងដែរ៕