ប្រែសម្រួល : កញ្ញាដាលីស (ដេល្លីម៉េល) ៖ រុស្ស៊ីបាននិយាយកាលពីថ្ងៃព្រហស្បតិ៍ទី២៥ឧសភាថា ខ្លួនបានបញ្ជូនយន្តហោះចម្បាំងទៅបញ្ឈប់យន្តហោះទម្លាក់គ្រាប់បែកយុទ្ធសាស្ត្ររបស់អាម៉េរិកពីរគ្រឿងកុំឱ្យ “រំលោភព្រំដែនរដ្ឋ” លើសមុទ្របាល់ទិក ដែលជាឧបទ្ទវហេតុលើកទីពីរក្នុងសប្តាហ៍នេះ។
ក្រសួងការពារជាតិរុស្ស៊ីបាននិយាយថា ខ្លួនបានបញ្ជូនយន្តហោះចម្បាំង Su-27និង Su-35ទៅប្រដេញ ដោយនិយាយថា ខ្លួនបានកំណត់អត្តសញ្ញាណ”គោលដៅអាកាសនោះជាយន្តហោះទម្លាក់គ្រាប់បែកយុទ្ធសាស្ត្រ B-1B ពីរគ្រឿងរបស់កងទ័ពអាកាសអាម៉េរិក”។
គោលការណ៍ជាមូលដ្ឋាននៃច្បាប់អាកាសអន្តរជាតិគឺថា គ្រប់រដ្ឋទាំងអស់មានអធិបតេយ្យភាពពេញលេញនិងផ្តាច់មុខលើដែនអាកាសពីលើទឹកដីរបស់ខ្លួន រួមទាំងដែនសមុទ្ររបស់ខ្លួន នេះបើយោងតាមអង្គការអាកាសចរណ៍ស៊ីវិលអន្តរជាតិ។
ក្រសួងការពារជាតិបាននិយាយថា “ការរំលោភព្រំដែនរដ្ឋត្រូវបានទប់ស្កាត់។ យន្តហោះរុស្ស៊ីបានត្រឡប់ទៅមូលដ្ឋានអាកាសរបស់ខ្លួនវិញដោយសុវត្ថិភាព”។
ក្រសួងបានបន្ថែមថា ការហោះហើរនេះត្រូវបានអនុវត្តដោយអនុលោមតាមច្បាប់អន្តរជាតិយ៉ាងតឹងរ៉ឹងសម្រាប់ការប្រើប្រាស់ដែនអាកាស។
វាគឺជាឧបទ្ទវហេតុស្រដៀងគ្នាជាបន្តបន្ទាប់ចុងក្រោយបង្អស់ ដោយរដ្ឋាភិបាលក្រុងមូស្គូនិយាយថា ខ្លួនបានស្ទាក់យន្តហោះលោកខាងលិចជាច្រើនគ្រឿងនៅជិតសមុទ្របាល់ទិកក្នុងប៉ុន្មានសប្តាហ៍ថ្មីៗនេះ។
ទន្ទឹមនេះដែរ ជប៉ុនបាននិយាយថា ខ្លួនបានបញ្ជូនយន្តហោះចម្បាំងចេញស្ទាក់ បន្ទាប់ពីបានរកឃើញយន្តហោះ “ស៊ើបការណ៍” របស់រុស្ស៊ីនៅក្បែរឆ្នេរសមុទ្ររបស់ខ្លួនតាមបណ្តោយមហាសមុទ្រប៉ាស៊ីហ្វិកនិងសមុទ្រជប៉ុន។
ជប៉ុនក៏បញ្ជូនយន្តហោះស្ទាក់យន្តហោះស៊ើបការណ៍របស់រុស្ស៊ីនៅជិតដែនអាកាសជប៉ុនផងដែរ
ការិយាល័យសេនាធិការរបស់ក្រសួងការពារជាតិជប៉ុនបាននិយាយនៅក្នុងសេចក្តីថ្លែងការណ៍ខ្លីមួយថា យន្តហោះរុស្ស៊ីមួយគ្រឿងបានធ្វើដំណើរពីភាគខាងជើងរបស់ជប៉ុនចុះមកតាមបណ្តោយឆ្នេរសមុទ្រភាគខាងលិចរបស់ខ្លួន ខណៈយន្តហោះផ្សេងទៀតបានធ្វើដំណើរដូចគ្នានៅតាមបណ្តោយឆ្នេរសមុទ្រទល់មុខនោះ ហើយត្រឡប់ទៅវិញតាមរបៀបដូចគ្នា។
ការិយាល័យនេះបានបន្ថែមថា “ជាការឆ្លើយតប យន្តហោះចម្បាំងនៃកងកម្លាំងស្វ័យការពារដែនអាកាសនៃកងកម្លាំងការពារអាកាសភាគខាងជើង និងអង្គភាពផ្សេងទៀតបានចេញស្ទាក់”៕
រុស្ស៊ីបញ្ជូនយន្តហោះចម្បាំងស្ទាក់យន្តហោះ B-1B ពីរគ្រឿងរបស់កងទ័ពអាកាសអាម៉េរិក