ប្រែសម្រួល : កញ្ញាដាលីស (បាល់ទាត់) ៖ ការប្រកួត English Premier League នឹងឈានដល់ជុំចុងក្រោយនៅថ្ងៃអាទិត្យនេះ ដោយក្រុមជើងឯកត្រូវបានរកឃើញហើយគឺ Man City ដោយឡែក ២ ក្រុមទៀតដែលត្រូវកាត់ចោល នៅមិនទាន់រកឃើញទេ គឺរវាង Everton, Leeds និង Leicester ខណៈ Southampton បានធ្លាក់ទៅក្របខ័ណ្ឌ Championship រួចទៅហើយ។
ការព្យាករណ៍ ៖
– Everton vs Bournemouth
* Bournemouth បានឈ្នះការជួបគ្នា ៤ លើកចុងក្រោយជាមួយនឹង Everton ។
* Everton យកបានត្រឹមតែ១ពិន្ទុប៉ុណ្ណោះពីការប្រកួតក្នុងផ្ទះចំនួន៤លើកចុងក្រោយ។
* Bournemouth បានឈ្នះ ៣ លើកពីការប្រកួតក្រៅដី ៤ លើកចុងក្រោយ។
Everton ប្រឈមមុខនឹងលទ្ធភាពពិតប្រាកដក្នុងការធ្លាក់ចេញពីក្របខ័ណ្ឌកំពូលជាលើកដំបូងចាប់តាំងពីឆ្នាំ ១៩៥៤ ប៉ុន្តែការទទួលជ័យជម្នះលើក្រុម Bournemouth នៅថ្ងៃអាទិត្យនឹងគ្រប់គ្រាន់ដើម្បីធានាការរស់រានមានជីវិត ទោះបីជាអ្វីៗអាចមិនដំណើរការដោយរលូនសម្រាប់ក្រុមស្ករគ្រាប់ដែលកំពុងធ្លាក់ជើងក៏ដោយ។
ការមកលេងចុងក្រោយរបស់ Bournemouth ទៅកាន់ទឹកដី Goodison Park គឺនៅថ្ងៃចុងក្រោយនៃរដូវកាល Premier League ២០១៩/២០ នៅពេលដែល Bournemouth ឈ្នះ ៣-១ តែមិនអាចគេចផុតពីការធ្លាក់។ ទោះយ៉ាងណា លើកនេះតួនាទីត្រូវបានប្តូរគ្នា។
ក្រុមរបស់លោក Gary O’Neil ដែលគេទាយតាំងពីមុនរដូវកាលថានឹងធ្លាក់នោះ បានធានាសុវត្ថិភាពរួចទៅហើយ ហើយឥឡូវនេះកំពុងសម្លឹងបញ្ចប់រដូវកាលជាមួយនឹងជ័យជម្នះ។
អ្នកគាំទ្រម្ចាស់ផ្ទះមិនសូវបានអបអរជ័យជម្នះច្រើនទេក្នុងរដូវកាលនេះ ហើយឈានដល់ថ្ងៃចុងក្រោយនៃរដូវកាលទទួលបានត្រឹម១ពិន្ទុពីការប្រកួតក្នុងផ្ទះ៤លើកចុងក្រោយ ដោយការចាញ់៣លើកជាប់ៗគ្នាបានធ្វើឱ្យពួកគេរបូត១០គ្រាប់។
ពួកគេបានឈ្នះតែ៣ប្រកួតក្នុងផ្ទះប៉ុណ្ណោះចាប់តាំងពីឈានចូលឆ្នាំ២០២៣ ហើយឥឡូវនេះត្រូវជួបក្រុម Bournemouth ដែលបានឈ្នះ៣ក្នុងចំណោមការប្រកួតក្រៅដី៤លើកចុងក្រោយ។
កាន់តែអាក្រក់ទៀតនោះ Everton មានកំណត់ត្រាអន់ទល់នឹង Bournemouth។ ពួកគេបានចាញ់ក្នុងការជួបគ្នា៤លើកចុងក្រោយរវាងក្រុមទាំងពីរ ហើយឈ្នះតែម្តងគត់ក្នុងការជួបគ្នា៧លើកចុងក្រោយរបស់ពួកគេ។ ខណៈក្រុម Everton កាន់តែដុនដាប ក្រុម Bournemouth មើលទៅកាន់តែមានឱកាសឈ្នះខ្ពស់ជាងថ្ងៃនេះ។
Everton បានរបូត ១១ គ្រាប់ក្នុង ៤ ប្រកួតចាប់តាំងពីការឈ្នះក្នុងផ្ទះចុងក្រោយរបស់ពួកគេ ហើយ Bournemouth បានឈ្នះ ៣ នៃការប្រកួតក្រៅដី ៤ លើកចុងក្រោយរបស់ពួកគេ ដូច្នេះតាមការទស្សនទាយ Bournemouth យ៉ាងអន់ណាស់ក៏អាចយកឈ្នះបាន ២-១ ដែរ។
– Leeds vs Tottenham
* គ្រាប់បាល់លើស ២,៥ បានកើតឡើង ១១ ដងនៃការប្រកួត ១២ លើកចុងក្រោយរបស់ Leeds ។
* គ្រាប់បាល់លើស ២,៥ បានកើតឡើង ៧ ដងនៃការប្រកួត ៨ លើកចុងក្រោយរបស់ Spurs។
* Harry Kane រកបាន ១១ គ្រាប់ក្នុងចំណោម ១៣ ប្រកួតចុងក្រោយរបស់គេសម្រាប់ក្លិបនិងប្រទេស។
បរាជ័យក្នុងលទ្ធផល ៣-១ នៅទឹកដី West Ham កាលពីចុងសប្តាហ៍មុន បានធ្វើឱ្យក្រុម Leeds រកកល់នឹងធ្លាក់ ហើយពួកគេត្រូវការរឿងអព្ភូតហេតុដើម្បីគេចចេញពីតំបន់កាត់ចោលនៅថ្ងៃចុងក្រោយនៃរដូវកាល។
ក្រុមក្ងោកសឈរនៅលេខរៀងទី ១៩ ក្នុងតារាង ហើយមិនត្រឹមតែត្រូវយកឈ្នះលើ Spurs នៅថ្ងៃអាទិត្យប៉ុណ្ណោះទេ តែថែមទាំងត្រូវបន់ឱ្យ Everton និង Leicester ចាញ់ផងដែរ។ ប្រសិនបើ Everton ស្មើ នោះ Leeds ត្រូវការឈ្នះដាច់៣គ្រាប់ ដើម្បីផ្ដួលគូប្រជែងដោយគិតលើគម្លាតគ្រាប់បាល់។
ទោះយ៉ាងណា ថ្ងៃនេះពួកគេត្រូវតែឈ្នះជាដាច់ខាត។ បរាជ័យនៅទឹកដីក្រុម West Ham បានធ្វើឱ្យពួកគេមាន ២ ពិន្ទុពីការប្រកួតលីកចំនួន ៨ លើកចុងក្រោយ ហើយពួកគេបានរបូតគ្រាប់បាល់រហូតដល់ទៅ ២៥ គ្រាប់ក្នុងអំឡុងពេលនោះ តែពួកគេក៏រកគ្រាប់បាល់បានរហូតផងដែរក្នុង១២ប្រកួតចុងក្រោយ។
Tottenham ក៏មិនសូវលេងល្អនោះដែរ ដោយចាញ់ Brentford ៣-១ ក្នុងការប្រកួតចុងក្រោយ ដែលធ្វើឱ្យពួកគេឈរនៅលេខរៀងទី៨ក្នុងតារាង និងមិនអាចប្រជែងយកកៅអី Europa League បានទេ។ ពួកគេនៅសល់តែឱកាសដណ្តើមកៅអី Europa Conference League ដូច្នេះពួកគេនឹងមិនចង់ជ្រុះពិន្ទុនៅទឹកដី Elland Road នោះទេ។
ក្រុមមាន់ខ្នាយមាសបានចាញ់ ៣ ប្រកួតក្នុងចំណោម ៤ ប្រកួតចុងក្រោយរបស់ពួកគេ ហើយបានរបូតគ្រាប់បាល់ ៩ គ្រាប់នៅក្នុងអំឡុងពេលនោះ ប៉ុន្តែពួកគេក៏ស៊ុតចូលទីបានរហូតដែរក្នុងការប្រកួត ១១ លើកចុងក្រោយ ដោយស៊ុតចូលសរុបចំនួន ២០ គ្រាប់។
ដោយ Leeds និង Spurs ចង់ឈ្នះដូចគ្នា ដូច្នេះលទ្ធភាពស្មើគឺមានច្រើន។ លទ្ធផលទស្សនទាយ ២-២។
– Leicester City vs West Ham
* Leicester ឈ្នះតែ១ប្រកួតគត់ក្នុងចំណោមការប្រកួត ១៦ លើកចុងក្រោយ។
* West Ham បានឈ្នះ ៤ លើកក្នុងចំណោម ៥ លើកចុងក្រោយរបស់ពួកគេ រួមទាំងការទទួលជ័យជម្នះ ១-០ ចំនួនពីរដង។
* ក្រុមកញ្ជ្រោងអាចស៊ុតចេញត្រឹមតែ ៥ ជើងនិងមិនរកបានគ្រាប់បាល់ទេក្នុង២ប្រកួតចុងក្រោយរបស់ពួកគេ។
Leicester ត្រូវការសំណាងពីការប្រកួតនៅកន្លែងផ្សេង ប្រសិនបើពួកគេចង់គេចពីការកាត់ចោលពី Premier League ប៉ុន្តែមិនមានការធានាថាពួកគេអាចឈ្នះការប្រកួតថ្ងៃនេះទេ បន្ទាប់ពីទម្រង់លេងធ្លាក់ចុះដុនដាបហៅលែងឮ។
ក្រុមកញ្ជ្រោងមិនដែលឈ្នះសោះក្នុងការប្រកួត ៥ លើកចុងក្រោយរបស់ពួកគេរហូតឈានដល់ថ្ងៃចុងក្រោយនៃរដូវកាល ប៉ុន្តែហាក់សុំចុះចាញ់ក្នុងពីរបីសប្តាហ៍ចុងក្រោយនេះ ដោយបង្ហាញទម្រង់លេងយ៉ាប់បំផុតទល់នឹង Newcastle កាលពីសប្តាហ៍មុន។
ក្រុមរបស់លោក Dean Smith ស៊ុតចេញបានតែ១ជើងគត់នៅកីឡដ្ឋាន St James’ Park បន្ទាប់ពីចាញ់ Liverpool ៣-០ ដែលក្នុងនោះពួកគេស៊ុតបាន៤ជើងប៉ុណ្ណោះ។ ទោះបីជា West Ham មិនចង់ឈ្នះ ក៏ Leicester គ្មានសមត្ថភាពឈ្នះពីការប្រកួតនេះដែរ។
លទ្ធផលទស្សនទាយ West Ham ឈ្នះ ១-០៕
ម្ចាស់ជើងឯក EPL ឆ្នាំ២០១៦ Leicester អាចនឹងធ្លាក់ទៅ Championship នៅថ្ងៃអាទិត្យនេះ