ប្រែសម្រួលៈបំណង(ស្ត្រេតថែមស៍)៖នាយករដ្ឋមន្ត្រីឥណ្ឌាលោក ណារិនដ្រា ម៉ូឌី (Narendra Modi)កាលពីថ្ងៃអាទិត្យបានសម្ពោធដាក់អោយប្រើប្រាស់អាគារសភាឥណ្ឌាថ្មីដែលធំជាងមុនក្នុងព្រឹត្តិការណ៍សំខាន់ជាប្រវត្តិសាស្ត្រមួយសំរាប់ប្រទេសកាន់លទ្ធិប្រជាធិបតេយ្យធំបំផុតក្នុងលោកនេះ តែឳកាសនេះត្រូវធ្វើអោយស្រអាប់ដោយសារតែក្រុមសភាប្រឆាំងធ្វើពហិការមិនចូលរួម។
គណបក្សប្រឆាំងដល់ទៅ២១ រួមមានគណបក្សសមាជ(ខុនហ្ក្រេស) បានស្ថិតនៅក្រៅពិធី និងនិយាយថា អាគារសភាថ្មីនេះគួរតែសម្ពោធក្រោមអធិបតីភាពរបស់ប្រធានាធិបតី ដ្រៅផាឌី មួរមូ(Droupadi Murmu)ក្នុងនាមលោកស្រីជាប្រមុខរដ្ឋ។
ទោះជាយ៉ាងណា គណបក្សប្រឆាំងផ្សេងទៀត រួមមានគណបក្សមិននៅក្នុងក្រុមចម្រុះរបស់ម៉ូឌី បានចូលរួមពិធី។
ពួកគេក៏សម្តែងការព្រួយបារម្ភអំពីចំណាត់ការរបស់រដ្ឋាភិបាល ដែលពួកគេនិយាយថា បាន«លេបព្រលឹងប្រជាធិបតេយ្យ»ពីសភា។ទោះជាយ៉ាងណាគណបក្សកាន់អំណាច Bharatiya Janata Party (BJP)បានហៅពហិការរបស់គណបក្សប្រឆាំងថា«មិនគោរពលទ្ធិប្រជាធិបតេយ្យ»និងបានចោទប្រកាន់ពួកគេថាខ្វះ«ស្មារតីជាតិនិងអារម្មណ៍មោទនភាព»។
អាគារសភាថ្មីនៅក្រុងញូវដេល្លី សាងសង់ឡើងលើផ្ទៃដី៦៤.៥០០ម៉ែត្រការ៉េ ធំជាងអាគារសភាចាស់។វាត្រូវនាយករដ្ឋមន្ត្រីម៉ូឌី សម្ពោធដាក់អោយប្រើកាលពីថ្ងៃអាទិត្យ តែក្រុមប្រឆាំងមិនពេញចិត្ត
ក្នុងអំឡុងពេលសម្ពោធ លោកម៉ូឌី ដាក់តម្កល់ដំបងមាសដ៏សំខាន់ជាប្រវត្តិសាស្ត្រមួយយកមកពីរដ្ឋតាមិល ណាឌូ(Tamil Nadu)នៅក្នុងអាគារថ្មី និងក៏បានសរសើរពួកកម្មករដែលបានខិតខំធ្វើការឆ្លងកាត់ពេលប្រទេសជួបប្រទះការវាយប្រហារពីកូវីដ១៩ ដើម្បីស្ថាបនាអាគារនេះអោយចប់តាមផែនការ។សារមួយមកពីប្រធានាធិបតី ដែលពណ៌នាការសម្ពោធអាគារសភាថ្មី ក៏ត្រូវបានគេអាន។
លោកម៉ូឌីបន្ទាប់មកបានថ្លែងសុន្ទរកថានៅក្នុងឡុក សាបា(Lok Sabha)ឬសភាជាន់ទាប ដោយអបអរអាគារសភាថ្មីនេះថាជា«ប្រផ្នូលមួយសំរាប់មិនត្រឹមតែការអភិវឌ្ឍរបស់ឥណ្ឌា តែពិពភលោក»។
សំណង់អាគារថ្មីកំពស់បីជាន់ ដែលនៅជាប់នឹងអាគារសភាចាស់ បានចាប់ផ្តើមកាលពីខែមករា ឆ្នាំ២០២១ លើផ្ទៃដី៦៤.៥០០ម៉ែត្រការ៉េ ទំហំប៉ុនតារាងបាល់ទាត់ប្រាំបួនដង។សូមបញ្ជាក់ថា សភាជាន់ទាបឥណ្ឌាថ្មីនេះមានកៅអី៨៨៨ នៅពេលអាគារចាស់មានត្រឹមតែ ៥៤៣កៅអី ៕
លោកម៉ូឌី ដាក់តម្កល់ដំបងមាសដ៏សំខាន់ជាប្រវត្តិសាស្ត្រមួយយកមកពីរដ្ឋតាមិល ណាឌូ ក្នុងពិធីសម្ពោធអាគារសភាថ្មីនៅក្រុងញូវដេល្លី កាលពីថ្ងៃ២៨ឧសភា