ដោយ៖ សុវណ្ណកុម្ភៈ / ភ្នំពេញ៖ ក្រុមបាល់ទាតអាយុក្រោម ២៣ ឆ្នាំ កម្ពុជា នឹងចូលរួមប្រកួត ក្នុងព្រឹត្តិការណ៍ AFF U23 Championship 2023 ដែលជាពានរង្វាន់ សម្រាប់តំបន់អាស៊ីអាគ្នេយ៍។
ព្រឹត្តិការណ៍នេះ នឹងចាប់ផ្ដើមពីថ្ងៃទី១៧ ដល់ ២៦ ខែសីហា ឆ្នាំ២០២៣។ ក្នុងការចាប់ឆ្នោត បែងចែកពូលនោះ ក្រុមកម្ពុជា ស្ថិតនៅពូល A ជាមួយ ថៃ ព្រុយណេ និង មីយ៉ាន់ម៉ា ។
មុននឹងព្រឹត្តិការណ៍នេះ មកដល់ក្រុម U23 កម្ពុជា នឹងប្រកួតជាមិត្តភាព ជាមួយក្រុមបង់ក្លាដែស នាថ្ងៃទី១៥ មិថុនា នៅពហុកីឡដ្ឋានជាតិអូឡាំពិក។
ក្រៅពីព្រឹត្តិការណ៍ AFF U23 Championship 2023 ក្រុមបាល់ទាត់ អាយុក្រោម ២៣ ឆ្នាំ (U-23) កម្ពុជា នឹងចូលរួមក្នុងព្រឹត្តិការណ៍ ប្រកួតជម្រុះពានរង្វាន់ សហព័ន្ធកីឡាបាល់ទាត់អាស៊ី ឆ្នាំ២០២៤ ( Qualification AFC Asian Cup 2024) នៅប្រទេសអារ៉ាប៊ីសាអ៊ូឌីត។
ព្រឹត្តិការណ៍នេះ កម្ពុជា ស្ថិតនៅក្នុងពូល J ជាមួយក្រុមម្ចាស់ផ្ទះអារ់ាប៊ីសាអ៊ូឌីត លីបង់ និង ម៉ុងហ្គោលី។ សម្រាប់ពូល J គ្រប់ការប្រកួតទាំងអស់ ធ្វើនៅប្រទេសអារ៉ាប៊ីសាអ៊ូឌីត ចាប់ពីថ្ងៃទី៦ ដល់ ១២ ខែកញ្ញា ឆ្នាំ២០២៣។
ក្រុម U23 កម្ពុជា ជួបក្រុមលីបង់ នាថ្ងៃទី៦ កញ្ញា បន្ទាប់មក ជួបក្រុមម៉ុងហ្គោលី នៅថ្ងៃទី៩ កញ្ញា និងចុងក្រោយ ជួបក្រុមម្ចាស់ផ្ទះអារ៉ាប៊ីសាអូឌី នៅថ្ងៃទី១២ ខែកញ្ញា ឆ្នាំ២០២៣។
វគ្គជម្រុះនេះ មានចំនួន ៤៣ ក្រុមចូលរួម ដោយបែងចែកជា ១១ ពូល ។ ក្នុងចំណោម ៤៣ ក្រុម ដែលចូលរួមប្រកួតជម្រុះនេះ នឹងយកតែ ១៥ ក្រុមប៉ុណ្ណោះ ដែលនឹងទទួល បានកៅអី ទៅកាន់ការប្រកួត AFC U23 Asian Cup នៅប្រទេសកាតា ឆ្នាំ២០២៤ ៕/V-PC