ដោយ៖សុក្ខារិន/ពោធិ៍សាត់៖រដ្ឋបាលខេត្តពោធិសាត់កាលពីរសៀលថ្ងៃ២៩ខែឧសភា បានអញ្ជើញតំណាងរោងចក្រ សហគ្រាសដែលមានមូលដ្ឋាននៅក្នុងខេត្តពោធិ៍សាត់ជួបប្រជុំជាមួយ លោក ខូយ រីដា អភិបាលខេត្តទាក់ទងនឹងការត្រៀមរៀបចំផែនការទទួលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្នុងឱកាសជួបសំណេះសំណាលជាមួយកម្មករ កម្មការនី រោងចក្រ សហគ្រាសនៅថ្ងៃទី២៣ ខែមិថុនាឆ្នាំ២០២៣ ។
លោក កុល ប៊ុន ធឿន ប្រធានមន្ទីរការងារបណ្តុះបណ្តាល វិជ្ជាជីវៈ ខេត្តពោធិ៍សាត់ បានឱ្យដឹងថា សម្តេចតេជោហ៊ុន សែន នឹងអញ្ជើញជួបសំណេះសំណាលជាមួយកម្មករ កម្មការនី រោងចក្រសហគ្រាសដែលមានមូលដ្ឋានក្នុងខេត្តពោធិ៍សាត់នៅថ្ងៃទី២៣ខែមិថុនា ដែលមានកម្មករ និយោជិតមកពី១១រោងចក្រក្នុងនោះ រោងចក្រកាត់ដេរចំនួនបី និងសេវាផ្សេងៗចំនួនប្រាំបួន។ មានប្រសាសន៍ក្នុងឱកាសនោះលោក ខូយ រីដា អភិបាលខេត្ត បានណែនាំដល់ថ្នាក់ដឹកនាំមន្ទីរការងារបណ្តុះ បណ្តាលវិជ្ជាជីវៈខេត្តសហការជាមួយក្រុមហ៊ុនរោងចក្រសហគ្រាសដែលមានមូលដ្ឋាននៅក្នុងខេត្តដើម្បីធ្វើការងារលំអិតមួយចំនួនថែមទៀត៕សរន/R
